ރާއްޖެއަށް މިހާރު ޒިޔާރަތްކުރަމުންދާ ޓިކްޓޮކްގެ އިސް ފަރާތްތަކެއް ހިމެނޭ ވަފުދާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވައިފި އެވެ.

އެ ވަފުދާއި ރައީސް ބައްދަލުކުރައްވާފައި ވަނީ ރައީސް އޮފީހުގަ އެވެ.

ރައީސް އޮފީހުން ބުނެފައިވަނީ އެ ބައްދަލުވުމުގައި ރާއްޖެ އާއި ޓިކްޓޮކާއި އެކުގައި އެކު މަސައްކަތް ކުރެވޭނެ އެކި ދާއިރާތަކާ މެދު މަޝްވަރާކުރެައްވާފައިވާ ކަމަށެވެ.

އެގޮތުން ރާއްޖެ ޑިޖިޓަލައިޒް ކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށް ޓިކްޓޮކާއި ބައްދަލުކުރައްވާ ވާހަކަދައްކަވަމުން ރައީސް ވަނީ ވިދާޅުވެފަ އެވެ. އެ އަމާޒަށް ވާސިލްވުމަށް ރާވާފައިވާ ކަންތައްތައް ވެސް ޓިކްޓޮކްގެ ޓީމާއި ރައީސް ހިއްސާކުރެއްވި އެވެ.

މީގެ އިތުރުން ޓިކްޓޮކްގެ ޓީމުން ވަނީ އެ އަމާޒަށް ވާސިލްވުމަށް އެހީތެރިވާނެކަމުގެ ޔަޤީންކަން ދީފައެވެ.

ރައީސް މިފަދަ ބައްދަލުވުމެއް ޓިކްޓޮކްގެ އިސް ފަރާތްތަކާއި އެކު ބާއްވާފައިވާ އިރު އިކޮނޮމިކް މިނިސްޓަރ މުހައްމަދު ސައީދު ވަނީ ދާދި ފަހުން، ޓިކްޓޮކް އަދި ޔޫޓިއުބް ފަދަ ޕްލެޓްފޯމްތަކުން ފައިސާ ލިބޭނެ ގޮތް ހެދުމުގެ މަސައްކަތް ކުރެމުންދާ ކަމަށް ވިދާޅުވެފަ އެވެ.