ފަހުމުނާމާތަކުގައި ސޮއިކުރީ ރައިީސް މުއިއްޒު އެސްސީއޯ ސަމިޓުގައި ބައިވެރިވެވަޑައިގަތުމަށް ޗައިނާ އަށް ކުރައްވަމުން ގެންދަވާ ދަތުރުފުޅުގެ ތެރެއިން
ފަހުމުނާމާ ތަކުގައި ސޮއިކުރުމަށް ބޭއްވި ރަސްމިޔާތުގައި، ރައީސް މުއިއްޒު އަރިހުގައި ދައުލަތުގެ ބައެއް ވަޒީރުން
ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި އޮބްޒާވަރެއްގެ ގޮތުގައި ބައިވެރިވެވަޑައިގަތުމަށް ރައީސް މުހައްމަދު މުއިއްޒު ޗައިނާއަށް ކުރައްވަމުންގެންދަވާ ދަތުރުފުޅުގެ ތެރެއިން އެގައުމުގެ ސަރުކާރާއެކު ރާއްޖެއިން 11 ފަހުމުނާމާއެއްގައި ސޮއިކޮށްފި ކަމަށް ރައީސް އޮފީހުން ބުނެފިއެވެ.
ޗައިނާގެ ވެރިރަށް ބެއިޖިންގްގެ ވަންގްފުޖިންގް ހިލްޓަން ހޮޓެލްގައި ބޭއްވުނު ރަސްމިއްޔާތެއްގައި ސޮއިކުރެވުނު މި ފަހުމުނާމާ ތަކުގެ ސަބަބުން ދިވެހިރާއްޖެއާއި ޗައިނާއާ ދެމެދު އޮތް ގުޅުން އިތުރަށް ހަރުދަނާވެގެންދާނެކަމަށް ރައީސް އޮފީހުން މައުލޫމާތު ދީފައިވެއެވެ.
މި ފަހުމުނާމާތަކުގެ ތެރޭގައި އިގްތިސާދީ ތަރައްގީއާއި، އުމްރާނީ ތަރައްގީގެ އިތުރުން އިޔާދަކުރަނިވި ހަކަތައިގެ ދާއިރާއިން ދެ ގައުމުގެ މެދުގައި އެއްބާރުލުން އިތުރުކުރުމުގެ ފަހުމުނާމާތައް ހިމެނޭކަމަށް ރައީސް އޮފީހުން ހާމަކޮށްފައި ވެއެވެ.
ރައީސް އޮފީހުން އިތުރަށް ފާހަގަ ކޮށްފައިވަނީ މި ފަހުމުނާމާތަކަކީ ކުރިއަށް އޮތް ތަނުގައި ދެ ގައުމުގެ މެދުގައި އޮތް ޒަމާންވީ ގުޅުން އިތުރަށް ވަރުގަދަކޮށް، ދެމެހެއްޓެނިވި ތަރައްގީއަށް މަގުފަހިކޮށްދޭނެ މުހިންމު ފިޔަވަޅުތަކެއް ކަމުގައެވެ.
ނަމަވެސް މި އެއްބަސްވުންތަކުގައި ހިމެނޭ ވަކިވަކި ތަފްސީލުތައް މިހާތަނަށް ސަރުކާރުން ހާމަކޮށްފައެއް ނުވެއެވެ.
ރައީސް މުއިއްޒު ވެރިކަމަށް ވަޑައިގެން އެންމެ ފުރަތަމަ ރަސްމީދަތުރުވެސް ކުރައްވާފައިވަނީ ޗައިނާ އަށެވެ. އެ ދަތުރުގައިވެސް ވަނީ 20 ފަހުމުނާމާއެއްގައި ޗައިނާ އެކު ސޮއިކޮށްފައެެވެ. ނަމަވެސް އޭގެ ސަބަބުން އެކަށީގެންވާ ފައިދާއެއް ރާއްޖެއަށް ކޮށްފައިނުވާކަން ފާހަގަކުރެއެވެ.
ސަރުކާރަށް ދެ އަހަރުވާން ކައިރިވެފައި ވާއިރު މި ސަރުކާރުން ތަރައްގީ އަށް އެކަށީގެންވާ މަސައްކަތްތަކެއް ނުކުރާ އިރު ގިނަ އަދަދަކަށް ރާއްޖެ އިން ބޭރަށް ދަތުރު ކުރައްވާތީ ފާޑުކިޔުން މުއިއްޒަށް އަމާޒުވެފައިވެއެވެ.
ފާއިތުވި ސަރުކާރުތަކުންވެސް ދިވެހިރާއްޖެއާއި ޗައިނާއާ ދެމެދު ގިނަ އެއްބަސްވުންތަކެއްގައި ސޮއިކުރެވި، ތަފާތު އެކި މަޝްރޫއުތައް ކުރިއަށް ގެންގޮސްފައިވެއެވެ.
މިއީ ވެރިކަމަށް ވަޑައިގެންނެވި ފަހުން މުއިއްޒު ޗައިނާ އަށް ކުރެއްވި ދެވަނަ ރަސްމީ ދަތުރުފުޅެވެ.
