ސަރުކާރުން ސުޕްރީމް ކޯޓުގެ ފަނޑިޔާރުންނަށް ބިރު ދައްކާ އެ ކޯޓުގެ ޝަރީއަތް ހުއްޓުވި މައްސަލަ އާއި ގުޅިގެން އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހަށް ހުށަހެޅި މައްސަލަ އަށް ޖަވާބުދާރީ ވާން ދިވެހި ސަރުކާރަށް އަންގައިފިއެވެ.

އިތުބާރު ހުރި ގޮތަކަށް ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި މި މައްސަލަ އަށް ޖަވާބުދާރީ ވާން ސަރުކާރަށް އަންގާފައި ވަނީ ޖޫން މަހުގެ 2 ވަނަ ދުވަހުގެ ކުރިން ޖަވާބުދާރި ވުމަށެވެ. އަދި އެ އެންގުން ސަރުކާރަށް އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހުގެ ފަރާތުން އަންގާފައި ވަނީ އެޕްރިލް މަހުގެ ދެ ވަނަ ދުވަހު ކަމަށް ވެސް ރާއްޖެ އެމްވީ އަށް ވަނީ އިތުބާރު ހުރި މަސްދަރަކުން މައުލޫމާތު ލިބިފައެވެ.

މިކަމާއި ގުޅޭ ގޮތުން ސަރުކާރުގެ ބަހެއް ހޯދުމަށް ކުރި މަސައްކަތް ވަނީ ކާމިޔާބު ނުވެފައެވެ. އެގޮތުން ފޮރިން މިނިސްޓަރ ޑރ.އަބްދުﷲ ހަލީލް އާއި ބަންޑާރަނައިބު އަހުމަދު އުޝާމްގެ އިތުރުން ކަމާއި ގުޅުން ހުރި އިދާރާތަކާއި މިކަމާއި ގުޅިގެން ސުވާލުކުރުމުން އެކަމަށް އެއްވެސް ކޮމެންޓެއް އެ ފަރާތްތަކުން ދެއްވާފައެއް ނުވެއެވެ.

އެ މައްސަލަ އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހަށް ހުށަހަޅާފައި ވަނީ މާރޗް 17 ވަނަ ދުވަހުއެވެ.

އެ މައްސަލަ ހުށަހެޅުއްވީ ސުޕްރީމް ކޯޓުން އިސްތިއުފާ ދެއްވި ފަނޑިޔާރު ހުސްނުއްސުއޫދް އެވެ. ސުއޫދު އިސްތިއުފާ ދެއްވާފައި ވަނީ ރައީސް މުހައްމަދު މުއިއްޒާއި ބަންޑާރަ ނައިބު އަހުމަދު އުޝާމް ސުޕްރީމް ކޯޓުގެ ފަނޑިޔާރުންނަށް ބިރު ދައްކަވަމުންދާ ކަމަށާއި ނުފޫޒު ފޯރުއްވާ ކަމަށް ފާހަގަކުރައްވާފައެވެ.

ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރާ އާއި ހުސްނުއްސުއޫދް އާއި މަހާޒް އަލީ ޒާހިރު ސަސްޕެންޑު ކުރީ، މެންބަރުން ވަކިކުރެވޭ މައްސަލައިގައި ވަގުތީ އަމުރެއް ނެރެދިނުމަށް އެ ކޯޓަށް ހުށަހަޅައި މައްސަލައިގެ އަޑުއެހުމެއް ތާވަލުކޮށް ފަނޑިޔާރުން މާލަމުގައި ތިއްބަވަނިކޮށެވެ. ތިން ފަނޑިޔާރުން ސަސްޕެންޑް ކުރީ ޖޭއެސްސީން ކުއްލި ބައްދަލުވުމެއް ބާއްވާ 10 މިނެޓުގެ ތެރޭގައި ގޮތް ނިންމުމަށްފަހު 26 ފެބްރުއަރީ 2025 ގައެވެ.

އޭގެފަހުން 4 މާރޗް 2025 ވަނަ ދުވަހު ރައީސް މުއިއްޒު ގާނޫނު އަސާސީ އާ ޚިލާފުވެއްޖެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފައެވެ. އަދި ޖޭއެސްސީން މިހާރު ބަލަމުން އަންނަނީ ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރުގެ މައްސަލައެވެ.

ސުޕްރީމް ކޯޓު މިހާރު އޮތްގޮތުން ދުސްތޫރީ މައްސަލައެއް ބެލޭނީ އެ ކޯޓުގެ ހުރިހާ ފަނޑިޔާރުން ހިމެނޭ ބެންޗަކުންނެވެ. އެއީ 7 ފަނޑިޔާރުންގެ ބެންޗުންނެވެ. ހުސްނުއްސުއޫދު އިސްތިއުފާ ދެއްވުމުން އޭނާގެ ބަދަލު އެ މަގާމަށް އަލްއުސްތާޛު ޙުސައިން ޝަހީދު ވަނީ އައްޔަން ކުރައްވާފައެވެ. އެހެންކަމުން މިހާރު ކޯޓުގައި ތިބީ 5 ފަނޑިޔާރުންނެވެ.