ސަސްޕެންޝަންގައި ތިއްބެވި ސުޕްރީމް ކޯޓުގެ ދެ ފަނޑިޔާރުންކަމަށް ވާ ޑރ. އަޒްމިރާލްދާ ޒާހިރާއި މަހާޒް އަލީ ޒާހިރު އާދިއްތަ ދުވަހު ޖުޑީޝަލް ސާވިސް ކޮމިޝަނަށް ހާޒިރުވާން އަންގައިފިއެވެ.

މި ދެ ބޭފުޅުން ޖޭއެސްސީ އަށް އާދިއްތަ ދުވަހު ހާޒިރު ކުރަނީ ކްރިމިނަލް ކޯޓުގެ ފަނޑިޔާރުންނަށް އެ ދެ ފަނޑިޔާރުން ވެސް ނުފޫޒު ފޯރުވާފައިވާ ކަމަށް ތުހުމަތުކުރާ މައްސަލައިގައެވެ. މި ދެ ފަނޑިޔާރުން އާދިއްތަ ދުވަހު ހާޒިރު ކުރަނީ މި މައްސަލައިގެ ފަހު އަޑު އެހުމަށެވެ.

އަޒްމިރަލްދާ ޖޭއެސްސީ އަށް ހާޒިރުކުރުމަށް ނިންމާފައި ވަނީ ހެނދުނު 10:00 އަށެވެ. ފަނޑިޔާރު މަހާޒް ހާޒިރުކުރުމަށް ހަމަޖެހިފައި ވަނީ އާދިއްތަ ދުވަހު މެންދުރު 12:00އަށެވެ.

މި ދެ ފަނޑިޔާރުންގެ މައްޗަށް ކުރާ ތުހުމަތަކީ ފަނޑިޔާރު އަޒްމިރާލްދާގެ ފިރިކަލުން މައްސަލައެއްގައި ހައްޔަރު ކުރުމުން އޭނާ ބަންދުން ދޫކޮށްލުމަށް އެ މައްސަލަ ބަލަމުން ދިޔަ ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވިކަމުގެ ތުހުމަތެވެ. މި މައްސަލަ އާއި ގުޅިގެން އަޒްމިރަލްދާ އާއި މަހާޒްގެ ބަޔާން ވަނީ ނަގާފައެވެ.

މި ދެ ފަނޑިޔާރުންގެ އިތުރު ސުލޫކީ މައްސަލަ އެއް ވެސް ޖޭއެސްސީން ދަނީ ބަލަމުންނެވެ. އެ މައްސަލަ އަކީ ސުޕްރީމް ކޯޓަށް މައްސަލަ އަކާއި ގުޅިގެން ލިބެންޖެހޭ މުހިންމު ލިޔެކިޔުންތަކެއް ފޯރުކޮށްދިނުމަށް ދެކޮޅު ހަދައިގެން ހައި ކޯޓުގެ ކުރީގެ ރަޖިސްޓްރާ ހުސެއިން މުހައްމަދު ހަނީފު ހާޒިރުކޮށް ޖަވާބުދާރީ ކުރި އިރު އެތަނުގައި މި ދެފަނޑިޔާރުން ތިބި ކަމަށް ބުނާ މައްސަލައެކެވެ.

ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުގެ މައްސަލައިގައި މެންބަރުން ވަކިނުކުރެވޭ ގޮތަށް ސުޕްރީމް ކޯޓުން ވަގުތީ އަމުރެއް ނެރެދިނުމުގެ މައްސަލަ ތާވަލުކޮށްފައި އޮއްވާ 3 ފަނޑިޔާރަކު ސަސްޕެންޑްކުރީ މިދިޔަ ފެބުރުއަރީ މަހުގެ 26 ވަނަ ދުވަހުއެވެ. އެ ތިން ފަނޑިޔާރުންނަކީ ފަނޑިޔާރު ހުސުނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު އެވެ. އޭގެ ތެރެއިން ފަނޑިޔާރު ހުސްނުއް ސުއޫދު ވަނީ މަޤާމުން އިސްތިއުފާދެއްވާފައެވެ.

ފަނޑިޔާރުން ސަސްޕެންޑު ކުރީ އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ކުރަމުންދާ މައްސަލައަކާ ގުޅިގެން ކަމަށް ބުނެއެވެ. ނަމަވެސް އެއީ ކޮން މައްސަލައެއް ކަމެއް އޭސީސީން ހާމައެއް ނުކުރެއެވެ.

މީގެ އިތުރުން ބަލަމުންދާ މައްސަލައިގެ ތަފްސީލެއް ވެސް ޖޭއެސްސީ އިން ހާމަކޮށްފައި ނުވެއެވެ. ދެ ފަނޑިޔާރުންގެ މައްސަލަ ޖޭއެސްސީން ބަލަމުން އަންނަކަމަށް ބުނެފައިވާ އިރު، ފަނޑިޔާރު އަޒްމިރަލްދާ ޒާހިރުގެ ފަރާތުން ނޫސްބަޔާން ނެރޭތީ ސުލޫކީ މައްސަލައެއްގެ ގޮތުގައި ވަކި މައްސަލައެއް ވެސް އަންނަނީ ބަލަމުންނެވެ.