މާލޭގެ ހަނި ގޯޅިތައް ތަރައްގީ ކުރުމުގެ މަސައްކަތް ފަށައިފި
މާލޭގެ ބައެއް ގޯޅިތައް ހަލާކުވުމުން ވެސް މަރާމާތު ނުކޮށް އޮންނަތާ ގިނަ އަހަރުތަކެއް ވަނީ ވެފައި
މާލޭގެ ހަނި ގޯތިއެއް ތަރައްގީ ކުރުމުގެ މަސައްކަތްތައް ކުރަނީ
މާލޭގެ ހަނި ގޯޅިތައް ތަރައްގީ ކުރުމުގެ މަސައްކަތް، މާލެ ސިޓީ ކައުންސިލުން ފަށައިފި އެވެ.
މާލޭގައި ދިރިއުޅޭ ރައްޔިތުންނަށް ހިތްފަސޭހަ ރައްކާތެރި މަގުތަކެއް ގާއިމް ކުރުމަށް ކުރަމުންދާ މަސައްކަތްތަކާ ގުޅޭގޮތުން މާލެސިޓީގެ މޭޔަރު އާދަމް އާޒިމް ވިދާޅުވީ މާލޭގެ ހަނި ގޯޅިތަކުގައި ހުރި ގެތަކުގައި ދިރިއުޅޭ މީހުންނާއި، އަދި ވެސް ގާ އަތުރައި ޕޭމެންޓް ހެދިފައިނުވާ ގޯޅި ތަކުގައި ހުރި ގެތަކުގައި ދިރިއުޅޭ ފަރާތްތަކުން، އެ ގޯޅިތަކުގެ ހާލަތު ކައުންސިލްގެ ސަމާލުކަމަށް ގެނެސްދިނުމުން، އެ ގޯޅި ތަރައްގީ ކުރުމުގެ މަސައްކަތް ކައުންސިލުން ކުރާނެ ކަމަށެވެ.
މި މަސައްކަތްތައް ކުރިއަށް ގެންދިއުމަށް ރައްޔިތުންގެ ފަރާތުން ލިބޭ އެއްބާރުލުން ފާހަގަކުރައްވައި އާޒިމް ވިދާޅުވީ ރައްޔިތުންގެ ފަރާތުން މި ފަދަ މައުލޫމާތު ލިބިއްޖެނަމަ، އެ މަގުތަކުގެ ހާލަތު ރަނގަޅުކޮށް، މިހާރު ދިމާވާދަތިތައް ހައްލު ކުރުމަށް އަވަސް މަސައްކަތްތަކެއް ކުރާނެ ކަމަށެވެ.
މީގެ އިތުރުން އާޒިމް ވިދާޅުވީ މާލޭގެ ބައެއް ގޯޅިތައް ހަލާކުވުމުން ވެސް މަރާމާތު ނުކޮށް އޮންނަތާ ގިނަ އަހަރުތަކެއް ވެފައިވެފައިވާ ކަމަށާއި، އެ ގޯޅި ތަކުގައި ދިރިއުޅޭ މީހުންނަށް ގިނަ އުދަނގޫތަކާ ކުރިމަތިލާން ޖެހިފައިވާ ކަމަށެވެ.
އެގޮތުން ހަނި ގޯޅިތަކުގައި ރަނގަޅަށް ގާ އެތުރިފައިނުވާކަމާއި، އަޑިގުޑަންތައް ހުރުމުގެ ސަބަބުން ހިނގާ ބިނގާވެ އުޅޭ މީހުންނަށް އަނިޔާވެ، ގެއްލުންތައް ލިބޭ ކަމަށް އާޒިމް ވިދާޅުވިއެވެ. އަދި ވިދާޅުވީ ހަނިގޯޅިތަކުގައި ބުޅަލުގެ ނަޖިސް ހުންނަ ކަމުގެ ޝަކުވާ ވެސް ރައްޔިތުންގެ ފަރާތުން ވަރަށް ބޮޑަށް ލިބޭ ކަމަށެވެ.
އާޒިމް ވިދާޅުވީ ކައުންސިލްގެ އަމާޒަކީ މި ފަދަ ތުރާތަކުން ރައްޔިތުން ސަލާމަތްކޮށް ހިތް ފަސޭހަ މާހައުލަކަށް މާލެ ސިޓީ ހެދުން ކަމަށެވެ. މި ކަންކަން ހާސިލް ކުރުމަށް ކައުންސިލްގެ އެންމެހައި މުވައްޒަފުން ގުޅިގެން، ހަލުވިދުވެލީގައި މަސައްކަތް ކުރުމަށް، އަމާޒު ހިފާފައިވާ ކަމަށް އާޒިމް ވިދާޅުވި އެވެ.
މާލެސިޓީގެ މަގުތައް ތަރައްގީ ކުރުމުގެ އިތުރުން، މަގުތަކުގައި ހުރި ކާނުތައް ސާފުކުރުމުގެ މަސައްކަތް ވެސް ކައުންސިލުން ދަނީ ކުރަމުންނެވެ.
