ބާސެލޯނާއިން ޑޯޓްމުންޑް ބަލިކުރީ ފަސޭހަކަމާއި އެކު ބޮޑުތަފާތަކުން

ޔުއެފާ ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި ބުދަ ދުވަހުގެ ރޭ ޖަރުމަނުގެ ބޮރޫޝިޔާ ޑޯޓްމުންޑާ ދެކޮޅަށް ކުޅުނު މެޗު 4-0 ގެ ނަތީޖާއަކުން ސްޕެއިންގެ ބާސެލޯނާއިން ކާމިޔާބުކޮށްފިއެވެ.

ބާސެލޯނާގެ އަމިއްލަ ދަނޑުގައި ކުޅުނު މި މެޗުގައި ބާސެލޯނާގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، މި މެޗުގައި އެ ޓީމުން ކުރި ހޯދާފައިވަނީ މެޗުގެ 25 ވަނަ މިނިޓުގައި ރަފީނިއާ ކާމިޔާބުކޮށްދިން ލަނޑުންނެވެ. މިއީ މި ސީޒަނުގެ ޗެމްޕިއަންސް ލީގުގައި އޭނާ ޖެހި 12 ވަނަ ލަނޑެވެ. އަދި އޭނާ އަކީ 12 ގޯލާ އެކު މުބާރާތުގެ ޓޮޕްސްކޯރާ ވެސް މެއެވެ.

ރަފީނިއާގެ ލަނޑާއި އެކު ބާސާއިން މެޗުގެ ފުރަތަމަ ހާފު ނިންމާލީ އެއްލަނޑުގެ ފަރަގުން ކުރީގައި އޮވެގެންނެވެ.

ދެވަނަ ހާފަށް ވެސް ބާސާއިން ނުކުތީ ވަރުގަދަކޮށެވެ. އެގޮތުން މި މެޗުގެ ދެވަނަ ހާފުގެ ކުޅުން ފެށުނުތާ ތިންވަނަ މިނިޓުގައި ރޮބަޓް ލެވަންޑޯސްކީ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. އަދި މެޗުގެ 66 ވަނަ މިނިޓުގައި އޭނާ ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފަ އެވެ. މިއީ އޭނާ ބާސެލޯނާއަށް ޖަހައިދިން 99 ވަނަ ލަނޑެވެ.

ބާސެލޯނާއިން މި މެޗުގައި ޖެހި ހަތަރުވަނަ ލަނޑު މެޗުގެ 77 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ރަފީނިއާ ދިން ޕާހަކުން ލަމީން ޔަމާލް އެވެ.

މި މެޗުގެ ފުރަތަމަ 11 ގައި ހިމެނުމާއިއެކު ލަމީން ޔަމާލް ވެފައިވަނީ ޗެމްޕިއަންސް ލީގުގެ 20 މެޗުގެ ފުރަތަމަ ޓީމުގައި ހިމެނިގެން ކުޅުނު އެންމެ ޒުވާން ކުޅުންތެރިޔާއަށް ވެފަ އެވެ.

މި ނަތީޖާއާއި އެކު ސެމީގެ ޖާގައެއް ހޯދުމަށް ޑޯޓްމުންޑް އިން ކުރަން ޖެހޭ މަސައްކަތް އިތުރުވެފައިވާއިރު، ސެމީއަށް ދިއުމަށް ބާސާއަށް އޮތީ ވަރަށް ބޮޑަށް ފުރުސަތު ތަނަވަސް ވެފައެވެ. މި ދެ ޓީމުގެ ދެވަނަ ކުރިމަތިލުން އޮންނާނީ އަންނަ ހަފްތާގައެވެ. މި މެޗު ކުޅޭނީ ޑޯޓްމުންޑްގެ ދަނޑުގަ އެވެ.