ކުރައްވާ ކޮންމެ ކަމެއް، އިދިކޮޅަށް ދިއުމާއި ވިދާޅުވާ ކޮންމެ އެއްޗެއް ދިމާ އިދިކޮޅަށް ދިއުން އެއީ ރައީސް ޑރ. މުޢިއްޒުއަށް ނިސްބަތްކުރާއިރު، އެހާ އައު ކަމެއް ނޫނެއެވެ. އެއީ ގިނަ ރައްޔިތުން ރައީސް މުޢިއްޒުއާއި މެދު ގަބޫލުކުރާ ގޮތްވެސްމެއެވެ. ނަމަވެސް މިފަހަރު ދިމާވެގެން މިއުޅެނީ އަދި ތަފާތު ކަމަކާއެވެ.

ރާއްޖޭގެ ފަތުރުވެރިކަން އިޝްތިހާރު ކުރެއްވުމަށް އިނގިރޭސި ޕްރިމިއަރ ލީގުގެ، އެންމެ އުހުގައި އޮތް ލިވަޕޫލްއާއި އެކު އެމްއެމްޕީއާރްސީން އެއްބަސްވުމެއް ހެދި ވާހަކަ އިވޭތާ ދުވަސްކޮޅެއް ވެއްޖެއެވެ. ފިތުރު އީދުގެ ބަންދު ފެށުމާއި އެކު ރައީސް މުޢިއްޒު އިނގިރޭސި ވިލާތަށް ފުރާވަޑައިގެންފިއެވެ. ފުރާވަޑައިގަންނަވަމުން ވިދާޅުވީ މިވަޑައިގަންނަވަނީ ރާއްޖެ އިޝްތިހާރު ކުރައްވަން ކަމަށެވެ. ލިވަޕޫލްއާއި އެކު ހަދާފައިވާ އެއްބަސްވުމުގެ ދަށުން ލިވަޕޫލްގެ ދަނޑުގައި ވިޒިޓް މޯލްޑިވްސްގެ އިޝްތިހާރު ދައްކަން ފެށުން ކިކްއޮފް ކުރައްވަން ކަމަށެވެ. އެމަސްދަރުތަކުން މައުލޫމާތު ލިބުނުގޮތުގައި މިކަމަށްޓަކައި ދިވެހި ސަރުކާރުން ލިވަރޕޫލްއަށް ދެމިލިއަނަށް ހައި ޕައުންޑް ވަނީ ދައްކާފައެވެ. އިޤްތިޞާދު މިހާދަށްވެފައި އޮތް ދަނޑިވަޅެއްގައި މިހާ ބޮޑު ޚަރަދެއް ކުރައްވައިގެން ރާއްޖެ އިޝްތިހާރު ކުރުމުގެ މަސައްކަތް ފެށުމާއި ޚާއްސަކޮށް މިކަން ފެށުމަށް ރައީސް ސީދާ ވަޑައިގެންނެވުމުން، އެންމެނަށްވެސް ހީވީ މިއީ ލައްކަ ބޮޑު ކަމެއް ކަމަށެވެ. މިފަހަރު މުޅި އިނގިރޭސިވިލާތުގައި ރާއްޖެ ވިދާލާނެ ކަމަށެވެ. ވިޒިޓް މޯލްޑިވްސް އަޑު ގުގުމާލާނެ ކަމަށެވެ. އެކަމަކު ކަން ހިނގާދިޔަ ގޮތް ބައްލަވާށެވެ.

ރާއްޖޭގެ ރައީސް ލިވަޕޫލް ދަނޑަށް ވަޑައިގެން އުޅުއްވީ ވިޒިޓާ ފާހެއް ބައްލަވައިގަނެގެންނެއެވެ. ފަސްދޮޅަހަކަށް ޕައުންޑަށް ލިބޭ މިފާހަކީ އެތަނަށް ވަންނަން ބޭނުން ކޮންމެ މީހަކަށްވެސް ގަނެވޭނެ ފާހެކެވެ. ރައީސް ރިސީވް ކުރާކަށް ލިވަޕޫލްގެ އިސް މީހަކު ނެތެއެވެ. ލިވަޕޫލްގެ ސޯޝަލް މީޑިއާ އަކު ރައީސް ޒިޔާރަތުގެ ވާހަކައެއް ނެތެއެވެ. އިށީނދެ ވަޑައިގެން އިންނެވީވެސް ވިޒިޓަރުން ތިބޭ ތަނުގައެވެ. އެއަށްވުރެ ހިތާމަވެރި އަނެއް ވާހަކައަކީ ބޮޑު ޓީމެއް ގޮވައިގެން ބޮޑު ހަރަދުކުރައްވާފައި، އިނގިރޭސިވިލާތުގެ ލިވަޕޫލްއަށް ވަޑައިގެން ލިވަޕޫލް ފުޓްބޯޅަ ކްލަބަށް ދެމިލިއަން ޕައުންޑް ހަރަދުކުރައްވައިގެން މިކުރެއްވި ކަންތަކުގެ ނަތީޖާއެވެ. ރައީސް މިދަތުރުފުޅަށްފަހު، މުޅި ރާއްޖޭގައި ދައްކަނީ ލިވަޕޫލްގެ ވާހަކައެވެ. ލިވަޕޫލްގެ މެޗްތައް ބަލާ މީހުން ގިނަވެއްޖެއެވެ. އެތައް ބަޔަކަށް އަލަށް ލިވަޕޫލް ދަސްވެއްޖެއެވެ. އެޓީމުގެ ކުޅުންތެރިންނާއި ޓީމުގެ ކުޅުންތެރިންގެ މައުލޫމާތާއި ޓީމްގެ ހިސްޓްރީ ސަރޗްކުރާ މީހުން ގިނަވެއްޖެއެވެ. މިއަދު ރަށްރަށުގައިވެސް ދައްކަނީ ލިވަޕޫލްގެ ވާހަކައެވެ. މަގު ކުނިކަހަން ނިކު އުޅޭ އަންހެން ވެރިންވެސް، ދޮށި އަޅަންތިބޭ މަސްވެރިންވެސް ދައްކާތީ އަޑުއިވެނީ ލިވަޕޫލް އެންމެ ފަހުން ކުޅުނު މެޗުން ބަލިވި ވާހަކައެވެ.

މިވީ ކިހިއްނެއްތޯއެވެ. ރާއްޖެއަށް މިކުރި ޚަރަދުގެ ނަތީޖާ މިނިކުތީ ކިހިއްނެއްތޯއެވެ. މަޝްހޫރުކުރައްވަން ވަޑައިގެންނެވީ ކޮންތަނެއްތޯއެވެ. މަޝްހޫރުމިވީ ކޮން އެއްޗެއްތޯއެވެ. ޓެކްސް ޕޭޔަރުންގެ ފާއިސާ ޚަރަދުކުރައްވައިގެން އިނގިރޭސި ފުޓްބޯޅަ ކްލަބެއް ރާއްޖޭގައި އިޝްތިހާރުކުރުމުގެ މެންޑޭޑް ރައީސްއަށް ދިނީ ކޮން ބައެއްތޯއެވެ. އެއަށްވުރެ ދެރަ އަނެއް ޚަބަރަކީ ރައީސްގެ ޒިޔާރަތައްފަހު ލިވަޕޫލު ކުޅުނު ފުރަތަމަ މެޗުންވެސް އެޓީމް ބަލިވި ކަމެއެވެ.

ޤަބޫލުފުޅުކުރައްވާށެވެ. ވަޑައިގެންނެވީ ރާއްޖެ އިޝްތިހާރުކުރައްވަން ނޫންތޯއެވެ. އެކަމަކު ދެމިލިއަން ޕައުންޑް ހަރަދުކުރައްވައިގެން އިޝްތިހާރު ތިޔަ ކުރެއްވުނީ ލިވަޕޫލް ނޫންތޯއެވެ.