މުޅި މި ހަފްތާ އެއްކޮށް ރައީސް އޮފީހާއި ސަރުކާރުގެ މީޑިއާ ކުދިންކޮޅު އުޅެނީ ވަރަށް ބިޒީކޮށެވެ. ވާނީ ވެސް އެހެންތާއެވެ. ރައީސުލްޖުމްހޫރިއްޔާ އިނގިރޭސި ވިލާތަށް ކުރައްވާ ޒިޔާރަތުގެ ޔައުމިއްޔާ ލިޔަން ވަގުތުން ވަގުތަށް އެ ވެރިން ތިބީ ވަރަށް ހުށިޔާރު ވެގެންނެވެ.

މާޗު 13، ގައި އިއުލާނުކުރި އެއްބަސްވުމުގައި ވާގޮތުން ލިވަޕޫލާ ގުޅިގެން ރާއްޖެ އިސްތިހާރުކުރާ ސަރުކާރުގެ ކުންފުނި އެމްއެމްޕީއާރުސީން މި ކެމްޕޭން ކުރިއަށް ގެންދާނީ ތިން އަހަރާއި ހަ މަސްދުވަހަށް ކަމަށްވެސް ރައީސް އޮފީހުން ހާމަކޮށްފައިވެ އެވެ.

ރައީސް ޑރ.މުހައްމަދު މުއުއިއްޒު އެ ޤައުމުގެ ލިވަޕޫލް ފުޓްބޯލް ކްލަބް (އެލް.އެފް.ސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސްއާ ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑިންގ ކެމްޕޭން ފެށުމުގެ ހަރަކާތުގައި ބައިވެރިވެވަޑައިގަތުމަށް ކުރައްވާ ދަތުރުފުޅުގެ ވާހަކައިން މުޅި މީޑިއާ އާއި މީސްމީޑިއާ އިސާހިތަކު ފުރާލައިފިއެވެ.

ރައީސް ފުރާވަޑައިގަތުމުން ފެށިގެން، ފަރިއްކުޅުއްވުމާއި، ހިންގަވާ މަގުމަގާއި ބައްލަވާލައްވާ ދިމަދިމާލަށް ބަލަންދެން ފޮޓޯ އާއި އެކު އާއްމު ކުރަމުން ދިޔަ އިރު ހީވަނީ މިއީ ލައްކަ ބޮޑު މަޝްރޫޢު އެއް ހެންނެވެ.

އަދި އެ ވަރަކުން ނުނިމެއެވެ. އޭޕްރިލްގެ ރައީސް އޮފީހުގެ ބޮޑު ޚަބަރަކީ ރައީސުލްޖުމްހޫރިއްޔާ، ލިވަޕޫލްގެ އަކްސާ ޓްރެއިނިންގ ސެންޓަރަށް ޒިޔާރަތް ކުރެއްވި ވާހަކައެވެ. ފުޓުބޯޅައިގެ ކޯޗިންގްގެ އަދި ތަމްރީނުތައް ބައްލަވާލައްވަން އެ މަނިކުފާނު ކުރެއްވި ފުރިހަމަ ދަތުރުފުޅުގެ ވާހަކަ ރައީސް އޮފީހާއި އެކްޓިވިސްޓު ކުދިންކޮޅު ދައްކާ ވަރުބަލި ނުވާ ކަހަލައެވެ.

ޖެހިގެން އައި ދުވަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިނގިރޭސިވިލާތަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ފުޓްބޯލް ފޮރ ޕީސްގެ އިސް އޮފިޝަލުންނާ ބައްދަލުކުރެއްވި ވާހަކަ ވެސް އެހާމެ ފަލަ ސުރުހީގައި ގެނައެވެ. ފުޓްބޯލް ފޮރ ޕީސްގެ ފަރާތުން ރައީސުލްޖުމްހޫރިއްޔާއަށް މަރުޙަބާ ވިދާޅުވި ބޭފުޅުންގެ ތަފްސީލްތަކާއި ރައީސް ފޮޓޯ ނަންގަވަން އެ ބޭފުޅުންނާއި އެކު ހުހުއްޓިވަޑައިގެންނެވި ވާހަކަ އަށް ދާންދެން ކަވަރުކުރިއެވެ. އަދި އެ ތަނުގައި ސާފުކުރެއްވި މައުލޫމާތެއް ވިއްޔާ އެ ވާހަކަ ވެސް ދަތުރުފުޅުގެ ޔައުމިއްޔާގައި ހިމަނާފައި އޮތެވެ. މިހެން ގޮސް މި ދަތުރުގެ ލައްކަ ވާހަކަ ފުލު ފުލުގައި މި ސަރުކާރުން އައީ ޕޯސްޓްކުރަމުންނެވެ.

އަވަހަށް އުފަލުން އަޅުގަނޑުވެސް ލިވަރޕޫލްގެ މީޑިއާ ޚަބަރުތައް ބަލާލައިފީމެވެ. އަސްތާ ކަމަކުދާކަށް ނެތެވެ. ޓީމު ލިވަޕޫލް އެފްސީ ގެ ރަސްމީ ޓޫރިސްޓު މަންޒިލަކަށް ރާއްޖެ ހަމަޖައްސާ އެ ކްލަބާ ގުޅިގެން ރާއްޖެ އިޝްތިހާރު ކުރުމަށް ކުރިއަށް ގެންދާ ހަރަކާތުގެ ހާސަރު ދިވެހި ސަރުކާރުން ނަމާ ނަގަނީއެވެ. އެކަމަކު ކްލަބުގެ ދަނޑަށް ކުރެއްވި ޒިޔާރަތުގެ ފޮޓޯއެއްހާ މިންވަރުވެސް އެ ކްލަބުން ޕޯސްޓު ކޮށްފަ އެއް ނެތެވެ.

ސަރުކާރުން ބުނާ ގޮތުން މިއީ ލިވަޕޫލްގެ ސީއީއޯގެ ދައުވަތަކަށް ރައީސްކުރައްވާ ދަތުރުފުޅެކެވެ.

ރައީސް މަނިކުފާނު މި ދަތުރުފުޅުގައި ފުރާވަޑައިގެންނެވީ އެޕްރީލް 1، ގަ އެވެ. ނުވިތާކަށް ލިވަޕޫލްގެ ޓްރެއިނިން ގްރައުންޑް، އަކްސާ ޓްރެއިނިން ސެންޓަރަށް ރައީސް ކުރެއްވި ޒިޔާރަތުގެ ފޮޓޯތައްވެސް ޕޯސްޓުކުރީ ރައީސް އޮފީހުން އެކަންޏެވެ. ލިވަޕޫލުން އެ ފޮޓޯތައް ވެސް ޕޯސްޓްކޮށްފައެއް ނުވެއެވެ.

ލިވަޕޫލްގެ ދަނޑުގައި އެވަޓަންއާ ދެކޮޅަށް ކުޅުނު ލީގު މެޗަށް ވެސް ރައީސް އާއި ދިވެހި ސަރުކާރުގެ އިސް ވަފުދެއް ވަޑައިގަތެވެ. މެޗުގެ ކުރިން ރާއްޖެ އިޝްތިހާރު ކުރުމަށް ފަށާފައިވާ ކެމްޕެއިން ލޯންޗް ކުރާނެ ވާހަކަ ބުނުމުން އަޅުގަނޑު ވެސް ހުރީ ނިކަން އުފަލުންނެވެ. ދައުލަތުގެ މީޑިއާ އިން މިކަން އިޝްތިހާރު ކުރަން ގެނައި މާ ކުލަގަދަ ޝޯ އެއް ބަލަން އަޅުގަނޑު ވެސް އިނީމެވެ. އެހެންނަމަވެސް އެ ބުނާ ކުލަ ގަދަ ޝޯ ނިންމާލީ ރާއްޖެ އިޝްތިހާރުކުރުމުގެ ހަރަކާތެއްގެ ކުލަ ވަރެއް، ދަނޑުގައި ރައީސް ކުރެއްވި ކަމެއްގެ ހިލަމެއް ނުވެއެވެ.

ރައީސް އޮފީހުން ފަހުން ހިއްސާ ކުރި ފޮޓޯތަކުން އެ ދެ ޓީމުގެ ކުޅުންތެރިން މެޗަށް ތައްޔާރުވަމުންދިޔަ ވަގުތު އެ ތަނުގައި އެ ތިން ބޭފުޅުންނާއެކު ރައީސް މުއިއްޒު ނަންގަވާފައިވާ ފޮޓޯތަކެއް ފެނުނެވެ. މި ބޭފުޅުންގެ އަތްޕުޅުގައި 'ވިޒިޓް މޯލްޑިވްސް' ޖަހާފައިވާ 25 ނަމްބަރުގެ ލިވަޕޫލް ޖޯޒީ އެއް އޮތެވެ. ހައިރާންވާ ކަމަކީ މި ފޮޓޯތަކުގެ ލިވަޕޫލުގެ އެއްވެސް އޮފިޝަލަކު އަދި ވެރިއަކު ވެސް ފެންނަން ނެތުމުންނެވެ.

ކޮންމެއަކަސް އަޅުގަނޑަކީ މާބޮޑަކަށް ފުޓްބޯޅައިގެ ކަންކަން އެނގޭ މީހެއް ނޫނެވެ. އެކަމަކު އާއްމުންގެ ކޮމެންޓްތަކަށް ބެލުމުން މާ ބޮޑު ޚަރަދެއްކޮށްގެން ރާއްޖެ އިޝްތިހާރުކުރުމުގެ ނަމުގައި މިވެރިން ކުޅުނު ޗަރުކޭހަކާއި މެދު ނިކަން ސުވާލު އުފެދިއްޖެއެވެ.

މިތަނަށް ވަޑައިގެން ރައީސް ކުރެއްވި ކަމެއް، ނުވަތަ ރައީސް މުއިއްޒު އެންފީލްޑަށް ޒިޔާރަތް ކުރެއްވި ކަމެއްވެސް ލިވަޕޫލުގެ އެއްވެސް ސޯޝަލް މީޑިއާ އެކައުންޓަކުން ނުވަތަ ވެބްސައިޓުން ނުފެނުމުން މި ވަރު ޚަރަދެއްކޮށްގެން ހާސިލްވި ކަމަކާއި މެދު އާއްމުން ވެސް ސުވާލު އުފައްދަން ފަށައިފިއެވެ. އެންމެ ކުޑަ މިނުން ފޮޓޯއެއްހާ މިންވަރު ވެސް ޕޯސްޓުކޮށްފައެއް ނުވެ އެވެ. އާދައިގެ މީހަކަށް ވެސް ވިޒިޓަރސް ފާހެއް އަޅައިގެން އެންފީލްޑަށް ޒިޔާރަތްކޮށްލެވިދާނެއެވެ. އެކަމުން ރާއްޖެ އިޝްތިހާރުކުރުމަށް ހުޅުވޭ މަގެއް އަދި އެއް ހަމަގައިމުވެސް ސަރުކާރަކަށް ބުނެ އެއް ނުދެވުނެވެ. އެހެންވީމަ ބޮޑު ޚަރަދުކޮށްގެން ރާއްޖެ އިޝްތިހާރު ކުރުމުގެ ނަމުގައި މި ދެއްކެވީ ކޮން އަވާމެންދުރެއްތޯއެވެ. މިކަމުން ވެސް ނިކުތް ނަތީޖާ ހަމަ ސުމެކެވެ. މިއީ ޓުއަރިޒަމް ޕްރޮމޯޓްކުރުމުގައި ކުރި ބޮޑު އިސްރާފެއް ނޫންތޯއެވެ.