ޕޮލިސީ އޮތް ގޮތުން އަޒްމިރަލްދާ އާއި މަހާޒުގެ މައްސަލައިގެ ތަފްސީލެއް ދެވެން ނެތް - ޖޭއެސްސީ
3 ފަނޑިޔާރަކު ސަސްޕެންޑްކޮށްފައިވަނީ ސުޕްރީމް ކޯޓުގައި ދުސްތޫރީ މައްސަލައެއް ބަލަމުންދަނިކޮށް
ފަނޑިޔާރު އަޒްމިރަލްދާ ޒާހިރު (ވ) އަދި މަހާޒު އަލީ ޒާހިރު (ކ)
ޖުޑީޝަލް ސަރވިސް ކޮމިޝަން (ޖޭއެސްސީ) އިން އަމަލުކުރަމުން އަންނަ ޕޮލިސީ އޮތް ގޮތުން އަޒްމިރަލްދާ އާއި މަހާޒުގެ މައްސަލައިގެ ތަފްސީލެއް ދެވެން ނެތް ކަމަށް އެ ކޮމިޝަނުން ބުނެފިއެވެ.
ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތައް ގާނޫނު އަސާސީ އަށް ގެނައި ބަދަލުގެ މައްސަލައިގައި މެންބަރުން ވަކިނުކުރެވޭ ގޮތަށް ސުޕްރީމް ކޯޓުން ވަގުތީ އަމުރެއް ނެރެދިނުމުގެ މައްސަލަ ތާވަލުކޮށްފައި އޮއްވާ 3 ފަނޑިޔާރަކު ސަސްޕެންޑްކުރީ މިދިޔަ ފެބުރުއަރީ މަހުގެ 26 ވަނަ ދުވަހުއެވެ. އެ ތިން ފަނޑިޔާރުންނަކީ ފަނޑިޔާރު ހުސުނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު އެވެ.
26 ފެބްރުއަރީ 2025 ވީ ބުދަ ދުވަހު ޖޭއެސްސީން ކުރިއަށް ގެންދިޔަ ބައްދަލުވުމުގައި ފަނޑިޔާރު ހުސްނުއް ސުޢޫދާއި، ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރު ވަނީ ސަސްޕެންޑް ކޮށްފައެވެ. އޭގެފަހުން 4 މާރޗް 2025 ވަނަ ދުވަހު ރައީސް މުއިއްޒު ގާނޫނު އަސާސީ އާ ޚިލާފުވެއްޖެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފައެވެ. އަދި ޖޭއެސްސީން މިހާރު ބަލަމުން އަންނަނީ ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރުގެ މައްސަލައެވެ.
މި ދެފަނޑިޔާރުންގެ މައްސަލަ ބަލަމުންދޭތޯއާއި، މައްސަލައިގެ ފަހުގެ މައުލޫމާތު ހޯދުމަށް ޖޭއެސީއާއި ސުވާލުކުރުމުން އެ ކޮމިޝަނުގެ މުވައްޒަފަކު ރާއްޖެއެމްވީއަށް ވިދާޅުވީ ޖޭއެސްސީ އިން ތަހުގީގުކުރާ މައްސަލައިގެ ތަފްސީލު ހިއްސާ ނުކުރާނެ ކަމަށެވެ. އަދި ޖޭއެސްސީ އިން މައުލޫމާތު ހިއްސާކުރާނީ ފަނޑިޔާރެއްގެ މައްސަލަ ބެލުމަށްފަހު އެ މައްސަލަ ފަނޑިޔާރެއްގެ މައްޗަށް ސާބިތުވާނަމަ ޖޭއެސްސީގެ ނިންމުން ކަމަށެވެ. ތަކުރާރުކޮށް ސުވާލުކުރުމުންވެސް ޖޭއެސްސީގެ މުވައްޒަފު ވިދާޅުވީ ޖޭއެސްސީ އިން އަމަލުކުރާ ޕޮލިސީގައި އިންނާނީ ތަހުގީގުތަކާއި ގުޅިގެން ފިޔަވަޅު އަޅާ ފަނޑިޔާރުންގެ މައުލޫމާތު އެކަނި ހާމަކުރުން ކަމަށެވެ.
ފަނޑިޔާރުން ސަސްޕެންޑު ކުރީ އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ކުރަމުންދާ މައްސަލައަކާ ގުޅިގެން ކަމަށް ބުނެއެވެ. ނަމަވެސް އެއީ ކޮން މައްސަލައެއް ކަމެއް އޭސީސީން ހާމައެއް ނުކުރެއެވެ.
މީގެ އިތުރުން ބަލަމުންދާ މައްސަލައިގެ ތަފްސީލެއްވެސް ޖޭއެސްސީ އިން ހާމަކޮށްފައި ނުވެއެވެ. ދެ ފަނޑިޔާރުންގެ މައްސަލަ ޖޭއެސްސީން ބަލަމުން އަންނަކަމަށް ބުނެފައިވާ އިރު، ފަނޑިޔާރު އަޒްމިރަލްދާ ޒާހިރުގެ ފަރާތުން ނޫސްބަޔާން ނެރޭތީ ސުލޫކީ މައްސަލައެއްގެ ގޮތުގައި ވަކި މައްސަލައެއް ވެސް އަންނަނީ ބަލަމުންނެވެ.
