ދޮންބައްޕައަކު ކުޑަ ދެކުއްޖަކަށް ޖިންސީ ގޯނާކުރި މައްސަލަ ފުލުހުން ބަލަން ފަށައިފި
8 އެޕްރީލު 2025 | އަންގާރަ 03:25އެ ކުދިންގެ މަންމައަށް އެކަން އިނގުނު ނަމަވެސް ސިއްރު ކޮށްފައިވާ ކަމަށް ތުހުމަތު ކޮށްފައިވޭ
ޖިންސީ އަނިޔާގެ މަންޒަރެއް ދައްކައިދޭ ފޮޓޯއެއް
ދޮންބައްޕައަކު ކުޑަ ދެކުއްޖަކަށް ޖިންސީ ގޯނާކުރި މައްސަލަ ފުލުހުން ބަލަން ފަށައިފިއެވެ.
އުމުރުން 17 އަހަރާއި، 14 އަހަރުގެ އަންހެން ދެ ކުދިންނަށް ދޮން ބައްޕައެއް ޖިންސީ ގޯނާ ކޮށްފައިވާ ކަމަށާއި، އެ މައްސަލަ 4 އޭޕްރީލް 2025 ގައި ފުލުހުންނަށް ރިޕޯޓު ކޮށްފައިވާ ކަމަށް އެ ކުދިންގެ އާއިލާއިން ވަނީ ބުނެފައެވެ.
އެ ކުދިންނަށް ޖިންސީ ގޯނާ ކުރާތާ 4 އަހަރަށް ވުރެ ގިނަ ދުވަސްވެފައިވާ ކަމަށާއި، އެކުދިންގެ މަންމައަށް އެކަން އިނގުނު ނަމަވެސް ސިއްރު ކޮށްފައިވާ ކަމަށް ތުހުމަތު ކޮށްފައިވެއެވެ. އާއިލާއަށް މިކަން އެނގުނީ އެކުދިން ދެބެއިންގެ ދެދަރި ކުއްޖަކާ މިކަން ހިއްސާ ކުރުމުން ކަމަށެވެ.
މި މައްސަލައާ ގުޅިގެން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ޓީމެއް ރަށަށް އައިސް، ބަޔާން ނަގާފައިވާ ކަމަށާއި، އެކުދިން، އެކުދިންގެ ބޮޑުދައިތައާއި، މާމަގެ ބެލުމުގެ ދަށަށް ގެނެސްފައިވާ ކަމަށް އާއިލާއިން ބުނެފައިވެއެވެ.
މީގެ އިތުރުން އެ ކުދިންގެ ދޮން ބައްޕަ، އެކުދިންނަށް ބިރު ދައްކާފައިވާ ކަމަށާއި، އެކުދިންގެ ބަރަހަނާ ފޮޓޯތަކެއް ލީކުކޮށްލާނެ ކަމުގެ އިންޒާރު ދީފައިވާ ކަމަށް ވެސް އާއިލާއިން ބުނެފައިވެއެވެ.
މި މައްސަލަ ފެންމަތިވުމާ ގުޅިގެން އެމީހާ ހައްޔަރުކުރި ނަމަވެސް ކޯޓު އަމުރެއް ނެތުމުން ދޫކޮށްލާފައިވާ ކަމަށް އާއިލާއިން ބުނެއެވެ.
ފުލުހުން ބުނީ އއ. އަތޮޅުގެ ރަށެއްގައި އިތުބާރު ކުރެވޭ މަގާމެއްގައި ހުރި މީހަކު 18 އަހަރުން ދަށުގެ ދެ އަންހެން ކުއްޖަކާ ގަދަކަމުން ޖިންސީ ގޯނާ ކުރިކަމަށް ތުހުމަތުކުރެވޭ މައްސަލައެއް އެޕްރީލް 5 ވަނަ ދުވަހުގެ ދަންވަރު 12:13 ރިޕޯޓްކޮށްފައިވާ ކަމަށެވެ.
އަދި މި މައްސަލަ ފުލުހުން ބަލަމުން އަންނަ ކަމަށް އެ އިދާރާއިން ވަނީ ބުނެފައެވެ.
