މިފްކޯގެ ބޯޑު މެމްބަރު ސޮލާހު ޝަރީފް، މިހާރުގެ ރައީސް ޑރ.މުއިއްޒު އަށް 7 މިލިއަން ރުފިޔާ ދިން ކަމަށް ބުނެ އޭނާ ވަނީ މުޅި މިފްކޯ އަކީ އޭނާގެ ވަތްގަނޑަށް ހަދާފައި ކަމަށް މިފްކޯގެ ކުރީގެ ޕަބްލިކް ރިލޭޝަންސް ޑެޕިއުޓީ މެނޭޖަރުގެ މަގާމުން އިބްރާހިމް ސައީދު (ކޭޑު) ވިދާޅުވެއްޖެ އެވެ.

އޭނާ އެފަދައިން ވިދާޅުވީ އޭނާ މަޤާމުން ވަކިކުރުމުން އެކަމާއި ގުޅޭގޮތުން ރާއްޖެއެމްވީން ކުރި ސުވާލަށް ޖަވާބުދެއްވަމުންނެވެ. އޭނާ ރާއްޖެއެމްވީ އަށް ވިދާޅުވީ މަޤާމުގައި އަދާކުރެއްވި ދުވަސްތަކުގައި އޭނާ އަށް އެކަށީގެންވާ ވަސީލަތްތަކެއް ފޯރުކޮށްދީފައި ނުވާ ކަަމަށެވެ. ނަމަވެސް އޭނާ ވާނީ އޭނާގެ ޒިންމާތައް އިޚުލާސްތެރިކަމާއި އެކު އަދާކޮށްފައި ކަމަށް ކޭޑް ވިދާޅުވިއެވެ.

އޭނާ ވަނީ ކޮންޓްރެކްޓު އައު ނުކޮށް އޭނާ ވަޒީފާއިން ވަކިކުރީ ވައްކަމާ ދެކޮޅަށް ވާހަކަދައްކާތީ ކަމަށް ވެސް ފާހަގަކުރައްވާފައެވެ. އެގޮތުން ކުންފުނީގެ ބޯޑު މެމްބަރު ސޮލާހު ޝަރީފްގެ ނުފޫޒު އެ ކުންފުނީގައި ވަރަށް ބޮޑު ކަމަށް ކޭޑު ވިދާޅުވިއެވެ. އޭނާ ވިދާޅުވި ގޮތުގައި ސޮލާހު ދަނީ އޭނާ ރައީސް މުއިއްޒު އަށް 7 މިލިއަން ރުފިޔާ ދެއްވާފައިވާނެ ކަމަށާއި، ރައީސް މުއިއްޒު އަށް ޖެހިވަޑައިގަންނަވާނީ އޭނާ ގުޅުމުން ފޯނަށް ޖަވާބުދެއްވަން ކަމަށް ތަކުރާރުކޮށް މިފްކޯގެ ތެރޭގައި ވިދާޅުވަމުންނެވެ.

ހަމައެހެންމެ ސޮލާހު އާއި އޭނާގެ ގާތް މީހުންނަށް މަންފާވާ ގޮތަށް އުސޫލުން ބޭރުން ގިނަ ކަންތައްތަކެއް ކުރަމުންދާ ކަމަށާއި ކުންފުނީގެ މަޤާމުތަކަށް ވެސް އައްޔަން ކުރަނީ އޭނާ ރުހޭ އޭނާގެ ގާތް މީހުން ކަމަށް ކޭޑު ވިދާޅުވިއެވެ.

މީގެ އިތުރުން އެތަނަށް މަސައްކަތަށް ގެންނަ ބިދޭސީންގެ އަތުން ސޮލާހު އާއި އޭނާގެ ގާތް ބައެއް މީހުން ފައިސާ ނަގަމުންދާ ކަމަށް ކޭޑު ތުހުމަތުކުރެއްވިއެވެ. އެކަން ރައީސް ޑރ.މުހައްމަދު މުއިއްޒު އާއި ހިއްސާކޮށްފައިވާނެ ކަމަށާއި އެކަންކަން މިހާރު ހިނގަނީ ރައީސަށް ވެސް އެނގިގެން ކަމަށް ޤަބޫލުކުރެވޭ ކަމަށް ކޭޑު ވަނީ ވިދާޅުވެފަ އެވެ.

މިފްކޯގެ ހިންގުން ހަރަދަނާކުރަން ކަމަށް ބުނެ ފެބްރުއަރީ މަހު އެ ކުންފުނިން ވަކިކުރި ތިން ޖެނެރަލް މެނޭޖަރުންނަށް ވެސް މިދިޔަ މަހު އަލުން ވަޒީފާ ދީފައިވާ ކަމަށް ކޭޑު ވިދާޅުވިއެވެ. ކޭޑު ވަނީ އޭނާ ވަކި ކުރީ އެފަދަ ކަންކަމާއި ދެކޮޅަށް އަޑު އުފުލާތީ ކަމަށް ވެސް ވިދާޅުވެފަ އެވެ.

މިފްކޯ އަކީ ސަރުކާރު ކުންފުނިތަކުގެ ތެރެއިން ހާލަތު އެންމެ ގޯސް އެއް ކުންފުނި ކަމަށް ވާއިރު އެތަނުގެ ހަޑި ތާރީހު ރަނގަޅުކުަން އޭނާ ކުރި މަސައްކަތަށް އެއްބާރުލުން ނުލިބުނު ކަމަށް ކޭޑު ވަނީ ވިދާޅުވެފަ އެވެ.