ކުޅުމުގެ މައިދާން އެއް ހަމަކުރުން - އިޖުތިމާއީ ހަމަހަމަ ކަމަށް ކުޅިވަރު

ބައިނަލްއަގްވާމީ ޑޭ އޮފް ސްޕޯޓް ފޯ ޑިވެލޮޕްމަންޓް އެންޑް ޕީސް (އައިޑީއެސްޑީޕީ) އަކީ ކޮންމެ އަހަރަކުވެސް 6 އޭޕްރީލްގައި ފާހަގަކުރާ ދުވަހެކެވެ. މިއީ ހެޔޮ ބަދަލުތަކެއް ގެނައުމާއި، ހުރަސްތައް ނައްތާލުމާއި، ވަކި ޙައްދުތައް ފަހަނައަޅައި ދިއުމުގައި ކުޅިވަރުގެ ބާރު ކުރިއެރުވުމަށް ފާހަގަކުރާ ދުވަހެކެވެ.

2025 ވަނަ އަހަރު ބާއްވާ ދެވަނަ ވޯލްޑް ސަމިޓް ފޯ ސޯޝަލް ޑިވެލޮޕްމަންޓްގެ ކުރިން އައިޑީއެސްޑީޕީ 2025 ގައި ވެސް މި ދުވަހާއި މެދު ވާހަކަ ދެއްކުމަށް ވަނީ ހަމަޖެހިފައެވެ. މީޑިއާ ރިޕޯޓްތައް ބުނާ ގޮތުން އެ ސަމިޓްގައި ބޮޑަށް އަލިއަޅުވާލާނީ ‘ސޯޝަލް އިންކްލޫޝަން’ ގެ މައުޟޫއަށެވެ.

އެގޮޮތުން އެންމެ ބޮޑަށް ބާކީވެފައިވާ ގްރޫޕްތަކުގެ އިތުރުން އުމުރާއި ޖިންސާއި ނަސްލުގެ ސަބަބުން ބާކީވާ ވުމަށް ވެސް އަލިއަޅުވާލާނެ ކަމަށް ރިޕޯޓްތައް ބުނެއެވެ. މިއަހަރުގެ ތީމްގެ މަޤްޞަދަކީ އާއްމުކޮށް ގަބޫލުކުރާ ނުރަނގަޅު ޤަބޫލުކުރުންތަކަށް ގޮންޖަހާ، ހަމަހަމަ ފުރުޞަތުތައް ކުރިއެރުވުމާއި، އުމުރާއި ޖިންސާއި ނަސްލަށް ބެލުމެއްނެތި އެންމެންނަށް ވެސް މައިވެރވިވެވޭނެހެން ކުޅިވަރުތައް ބޭވުމަށް ފަހިކޮށްދިނުމެވެ.

އިންކްލޫޝަން އާއި އިތުރަށް ހަމަހަމަ މުޖުތަމައުތައް އުފެއްދުމަށް ބާރުއަޅާ އެއްބައިވަންތަ ބާރެއްގެ ގޮތުގައި ކުޅިވަރުގެ ދައުރު ފުޅާކުރުމަށް މިކަމުގެ ސަބަބުން މަގުފަހިވެގެންދެއެވެ. މީގެ އިތުރުން ތަފާތުކުރުންތަކާ ކުރިމަތިލައި، މުޅި ދުނިޔޭގައި ހެޔޮ ބަދަލެއް ގެނައުމަށް މަޝްވަރާ ކުރުމަށް ވެސް މި ސަމިޓް ވެގެން ދާނީ ވަރުގަދަ ޕްލެޓްފޯމަކަށެވެ.

ބައިނަލްއަގްވާމީ ސްޕޯޓް ފޯ ޑިވެލޮޕްމަންޓް އެންޑް ޕީސް (އައިޑީއެސްޑީޕީ) ދުވަހުގެ ބުނާސަބަތުގައި ނިއުޔޯކުގައި ހުންނަ އދ. ތަފާތު ހަރަކާތްތަކެއް ބޭއްވުމަށް ވަނީ ހަމަޖެހިފައެވެ. މިއީ ކުޅިވަރާއި، ޖެންޑަރ އިކުއަލިޓީއާއި، ދުޅަހެޔޮ މުސްކުޅިވުމާއި، ނަސްލީ ހަމަހަމަކަމުގެ ގުޅޭ މައްސަލަތަކާ ގުޅޭގޮތުން މާނަހުރި މަޝްވަރާތަކެއް ކުރުމަށް ލިބޭނެ ފުރުސަތެކެވެ.

އެހެނިހެން އާއްމުން ޝައުގުވެރިކުރުވާ ވާހަކަތަކުގެ ތެރެއިން އައިޑީއެސްޑީޕީން މަސައްކަތް ކުރަނީ ހޭލުންތެރިކުރުމަށާއި، ކާމިޔާބީގެ ވާހަކަތައް ފާހަގަކުރުމާއި، ޕާޓްނަޝިޕްތައް ހަރުދަނާކުރުމާއި، މުހިންމު ގޮންޖެހުންތަކަށް ހައްލު ހޯދުމަށް ވަކާލާތުކުރުމަށެވެ. އައިޑީއެސްޑީޕީ 2025 އަކީ ކުޅިވަރަކީ އިޖުތިމާއީ ގޮތުން ހުރި ގޮންޖެހުންތައް ނައްތާލާ، ކުރިއެރުން ހޯދުމަށް ވަސީލަތެއްގެ ގޮތުގައި ވެގެންދާނެ ކަމަށް ޔޫއެން އިން ބުނެއެވެ. އަދި އިޖުތިމާއީ ގޮތުން ހިދުމަތް ކުރެވޭނެ ގޮތްތައް ހޯދާ، މުޖުތަމައުގައި ހުރި މައްސަލަތައް ހައްލުތައް ހޯދުމަށް ޕްލެޓްފޯމެއްގެ ގޮތުގައި މި ޕްލެޓްފޯމްގެ ބޭނުން ހިފިދާނެ ކަމަށް ޔޫއެން އިން ބުނެއެވެ.

6 އޭޕްރީލްގައި ފާހަގަކުރާ މި ދުވަހަކީ އިންސާނީ ހައްގުތައް ކުރިއެރުވުމަށް، އަދި އިޖުތިމާއީ އަދި އިގްތިސާދީ ތަރައްގީއަށް ކުޅިވަރުން ކޮށްފާނެ ހެޔޮ ނުފޫޒު ދައްކުވައިދިނުމުގެ މަގްސަދުގައި ފާހަގަކުރާ ދުވަހެކެވެ. ޔޫއެން އިން ފާހަގަކުރާ ގޮތުގައި ކުޅިވަރަކީ ސުލްހައާއި ތަރައްގީގެ މަގުސަދުތައް ކުރިއެރުވުމުގައި ޚަރަދު ކުޑަ އަދި ފަސޭހަ ވަސީލަތެއްކަން ސާބިތުވެފައިވެއެވެ.

އެހެންކަމުން 2030 ވަނަ އަހަރުގެ އެޖެންޑާ ފޯ ސަސްޓެއިނަބަލް ޑިވެލޮޕްމަންޓްގައި އިޖުތިމާއީ ކުރިއެރުމަށް ކުޅިވަރުގެ ދައުރު އިތުރަށް ފުޅާ ކުރުމަށް ޔޫއެން އިން ދަނީ މަސައްކަތް ކުރަމުންނެވެ. ކުޅިވަރަކީ ވެސް ދެމެހެއްޓެނިވި ތަރައްގީއަށް މަގުފަހިކޮށްދޭ މުހިންމު ކަމެއް ކަމަށާއި، ތަޙައްމަލުކުރުމާއި އިޙްތިރާމް ކުރިއެރުވުމުގައި ކުޅިވަރުގެ ޙިއްޞާ އިތުރުވަމުންދާކަމަށް ވެސް ޔޫއެން އިން ފާހަގަކުރެއެވެ.

އެސްޑީޖީތަކަށް މަގުފަހިކޮށްދޭ ޒަރިއްޔާ އެއްގެ ގޮތުގައި ކުޅިވަރުގެ ދައުރު ހަރުދަނާ ކުރުމަށްޓަކައި އައިއޯސީން ވަނީ އޮލިމްޕިޒަމް 365 ސްޓްރެޓެޖީ ތައާރަފްކޮށްފަ އެވެ.

އޮލިމްޕިޒަމް 365 ސްޓްރެޓެޖީ މެދުވެރިކޮށް އައިއޯސީން ދަނީ އޮލިމްޕިކް މޫވްމަންޓްގެ އެތެރެ އާއި ބޭރުގެ ޖަމިއްޔާތަކާ ގުޅިގެން މަސައްކަތްތަކެއް ކުރަމުންނެވެ. އެގޮތުން 176 ގައުމެއްގައި ހިންގާ 550 ހަރަކާތަކަށް ދަނީ އެހީތެރިވަމުންނެވެ. އެ ހަރަކާތްތަކަކީ އޭގެ ސަބަބުން އިޖުތިމާއީ ހެޔޮ އަސަރު ފޯރާނެ ޕްރޮގްރާމްތަކާއި އިސްނެގުންތައް ކަމަށް އެ އިދާރާއިން ފާހަގަކޮށްފައިވެއެވެ.

އެފަދަ ފިޔަވަޅުގެ ތެރެއިން އައިއޯސީން ދަނީ އަހަރަކު 365 ދުވަހު ދިހަ މިލިއަން މީހުންނާ ހަމައަށް ވާސިލްވެ، އެމީހުންގެ ސިއްޙަތާއި ދުޅަހެޔޮކަން ރަނގަޅުކޮށް، ތަޢުލީމުގެ ފުރުޞަތު އިތުރުކޮށް، ކުޅިވަރުގެ ތެރެއިން އިތުރަށް ހިމެނޭ އަދި ސުލްޙަވެރި މުޖުތަމަޢުތައް އުފައްދަމުންނެވެ. އެހެންކަމުން މުޖުތަމައުތަކަށް ދިމާވާ މައްސަލަތަކަށް ހައްލު ހޯދުމުގައި ކުޅިވަރު ހޭދަކުރާ މުހިންމު ދައުރު އެ ފަރާތްތަކުން ފާހަގަކުރެއެވެ.

ކުޅިވަރުގެ ތެރެއިން ސުލްހަވެރި މުޖުތަމަޢަކަށް މަގުފަހިވާގޮތާއި، އެތުލީޓުންނާއި މުޅި އޮލިމްޕިކް މޫވްމަންޓުން ގެނެސްދޭ ޕޮޒިޓިވް އިމްޕެކްޓް، ޙިއްޞާކުރުމަށް މި ދުވަސް ފާހަގަކުރުމުން އެހީތެރިކަން ލިބިގެންދެއެވެ.

މިކަމުގެ އެންމެ ބޮޑު އެއް ހެއްކަކީ ޚުދު އޮލިމްޕިކް ގޭމްސް ކަމަށްވާއިރު، މި ގޭމްސްގައި 206 ނޭޝަނަލް އޮލިމްޕިކް ކޮމިޓީ (އެންއޯސީ) އާއި އައިއޯސީ ރެފިއުޖީ އޮލިމްޕިކް ޓީމުގެ އެތުލީޓުން އެއްތަނަކަށް އެއްވެ އެވެ. އޮލިމްޕިކް ގޭމްސްގައި އެއްކޮޅުން އެތުލީޓުން އެކަކު އަނެކަކާ ދެކޮޅަށް ވަރުގަދަ ވާދަތަކެއް ކުރާއިރު، އޮލިމްޕިކް ވިލެޖުގެ އެއް ފުރާޅެއްގެ ދަށުގައި ސުލްހަވެރިކަމާއެކު އެކުގައި އުޅެ އެވެ.