ޓްރަމްޕާއި ދެކޮޅަށް އެތައް ހާސް ބަޔަކު މަގުތަކަށް ނުކުމެއްޖެ

އެމެރިކާގެ ރައީސް ޑޮނަލްޑް ޓްރަމްޕް ވެރިކަމަށް އެނބުރި ވަޑައިގެންނެވި ފަހުން ބާއްވާ އެންމެ ބޮޑު މުޒާހަރާތަކުގައި އެމެރިކާގެ ބޮޑެތި ސިޓީތަކުގެ މަގުތަކުގައި ފުރާލާ، ޓްރަމްޕުގެ ޕޮލިސީތަކާއި ދެކޮޅަށް އަޑު އުފުލައިފި އެވެ.

އެގޮތުން ޓްރަމްޕުގެ ސިޔާސަތުތަކާ ދެކޮޅު ހަދައި، ސަރުކާރުގެ މުވައްޒަފުން ކުޑަކުރުމުން ފެށިގެން ވިޔަފާރީގެ ޓެރިފްތަކާއި މަދަނީ މިނިވަންކަން ގެއްލިގެން ދިއުމާ ހަމައަށް ވޮޝިންޓަން، ނިއުޔޯކް، ހުސްޓަން، ފްލޮރިޑާ، ކޮލޮރާޑޯ އަދި ލޮސް އެންޖެލިސް ފަދަ ތަންތަނުގައި އެއްވެ މުޒާހަރާކޮށްފައިވެ އެވެ.

ވޮޝިންޓަންގައި އެތައް ހާސް މުޒާހަރާ ކުރި އިރު އެތަނުގައި ގިނައީ އެމެރިކާގެ އެކި ހިސާބުތަކުން ދަތުރުކޮށްފައި އައި މީހުންނެވެ. އެތައް ހާސް މުޒާހަރާގެ ބައިވެރިން ނޭޝަނަލް މޯލް އަށް އެއްވެ ޓްރަމްޕާއި ދެކޮޅަށް މުޒާހަރާކޮށްފައިވެ އެވެ.

މުޒާހަރާގެ ބައިވެރިން ބުނަމުންދިޔައީ ޓްރަމްޕުގެ ސިޔާސަތުގެ ސަބަބުން އެމެރިކާއާއި ގާތް އެކުވެރި ގައުމުތަކާއި ގުޅުން ކެނޑި، އެކމަުގެ ސަބަބުން އެމެރިކާގެ ރައްޔިތުންނަށް ތަކުލީފުތަކާއި ކުރިމަތިލާން ޖެހިފައިވާ ކަމަށެވެ. މުޒާހަރާގެ ބައިވެރިން ބުނަމުންދަނީ ސަރުކާރު ހަލާލުކޮށްލާފައިވާ ކަމަށެވެ.

ލޮސް އެންޖެލިސްގައި ޑިސްޓޯޕިއަން ނޮވެލް "ދަ ހޭންޑްމެއިޑްސް ޓޭލް" ގެ ކެރެކްޓާއެއްގެ ގޮތުގައި ހެދުން އަޅައިގެން ހުރި އަންހެނަކު ބޮޑު ދިދައެއްގައި ޓްރަމްޕް ގެ އެބޯޝަން އާ ދެކޮޅު ސިޔާސަތުތަކަށް ފާޑުކިޔާ މެސެޖުތައް ލިޔެފައިވާއިރު، މުޒާހަރާގެ ބައިވެރިންގެ ޕޯސްޓަރުތަކުގައި އެމެރިކާއަށް ރަސްކަލަކު ބޭނުން ނުވަ ކަމަށްވެސް ބުނެފައިވެއެވެ.

އެމެރިކާގައި ކުރި މުޒާހަރާ ފުޅާވެ ޔޫރަޕުގެ ބައެއް ގައުމުތަކުގެ ވެރިރަށްތަކުގައި ވެސް ޓްރަމްޕުގެ ޓްރޭޑް ޕޮލިސީއާއި ދެކޮޅަށް އަޑު އުފުލާފައިވެއެވެ. މީގެ އިތުރުން ލަންޑަންގެ އެއްވުމުމުގައި އެމެރިކާގައި ހިނގަމުންދާ ކަންކަމަކީ އެންމެންގެ ވެސް މައްސަލައެއް ކަމަށް ބުނެ އަޑު އުފުލާފައިވާއިރު، އެމެރިކާއިން ދުނިޔޭގެ ރިސެޝަނަކަށް ވައްޓާލާނެ ކަމަށް ބައިވެރިން ވަނީ އަޑު އުފުލާފައެވެ.

ލަންޑަނުގައި މުޒާހަރާކުރަމުން ދިޔަ ފަރާތްތަކުން ބުނަމުން ދިޔައީ، ޓްރަމްޕް އުފެއްދެވީ ދުސްތޫރީ ކާރިސާއެއް ކަމަށާއި އޭނާ އަކީ މޮޔައެއް ކަމަށެވެ.

އެމެރިކާގައި މޫވްއޮން އާއި ވިމެންސް މާޗް ފަދަ ވާތު ފިކުރުގެ ޖަމާއަތްތަކުގެ އިއްތިހާދުން 1،000 އަށް ވުރެ ގިނަ ސިޓީތަކާއި ކޮންގްރެސްގެ ކޮންމެ ޑިސްޓްރިކްޓެއްގައި "ހޭންޑްސް އޮފް" ހަރަކާތްތައް ބާއްވާފައިވާ ކަމަށް އެ ޖަމާއަތްތަކުން ބުނެއެވެ.

ޓްރަމްޕް ވަނީ ސަރުކާރު ނިކަމެތިކޮށް، ކޮންޒަވޭޓިވް ވެލިއުސް އެއްފަރާތްކޮށް، ބޯޑަރުތަކާއި ވިޔަފާރީގެ މައްސަލާގައި ރަހުމަތްތެރި ގައުމުތަކަށް ވެސް ވަރަށް ބޮޑަށް ޕްރެޝަރު ކޮށް، ހިއްސާގެ ބާޒާރުތައް ޓޭންކް ކުރުމަށް ހަރުކަށި ފިޔަވަޅުތަކެއް އަޅައި، އެމެރިކާގެ ގިނަ ބައެއްގެ ނުރުހުން ހޯއްދަވާފައެވެ.

ބޮސްޓަންގައި އޭއެފްޕީއަށް ދިން އިންޓަވިއުއެއްގައި މުޒާހަރާގެ ބައިވެރިއެއް ބުނެފައިވަނީ މުޒާހަރާއަށް ނުކުތީ ތެދުވެރިކަމާއެކު 'ފެސިޒަމް' ނުވަތަ ހަރުކަށި ފިކުރުގެ ވެރިކަމުގެ ވައްޓަފާޅިއާ އެއްގޮތަށް ގައުމުގެ ވެރިކަމުގެ ބޮޑު ބައެއް އެއް ވެރިއެއްގެ ދަށަށް ނުވަތަ މަދުބައެއްގެ އަތްދަށުގައި އޮތުން ހުއްޓުވަން ކަމަށެވެ. އަދި މިކަން ކުރަނީ އިދިކޮޅު ފަރާތްތައް ޖަލަށްލުން ހުއްޓުވުމާއި، ހިޖުރަކޮށްފައިވާ ފަރާތްތައް ޖަލަށްލުން ހުއްޓުވުމަށް ކަމަަށެވެ.

ކޮންގްރެސްގެ ދެ ގޭގެ މައިނޯރިޓީގައި އޮތް އިދިކޮޅު ޕާޓީ، ޓްރަމްޕްގެ ފިޔަވަޅުތަކާ ދެކޮޅު ހެދުމަށް ނިކަމެތިވެފައިވާ ކަމަށް ބުނުމުން ޑިމޮކްރެޓުން ތިބީ ރުޅިގަދަވެފަ އެވެ.

ވައިޓް ހައުސްއާ ތަންކޮޅެއް ދުރުގައި އޮންނަ ނޭޝަނަލް މޯލްގައި އެތައް ހާސް ބަޔަކު ވަނީ ޓްރަމްޕްގެ ދެވަނަ އިމްޕީޗްމަންޓްގައި އިމްޕީޗްމަންޓް މެނޭޖަރުކަން ކުރެއްވި ޑިމޮކްރެޓިކް ޕާޓީގެ ރެޕްރެޒެންޓޭޓިވް ޖޭމީ ރަސްކިން ފަދަ ފަރާތްތައް ވަނީ މި އެއްވުމުގައި ވާހަކަ ދައްކާފައެވެ. މުޒާހަރާގެ ބައިވެރިން ވަނީ މަޑުން ނުތިބޭނެ ކަމަށާއި، ހިމޭނުން ނުތިބޭނެކަމަށާއި، އަދި ފެއަށްވެސް ނުޖެހޭނެކަމަށް ގޮވާލާފައެވެ.

ހޮނިހިރު ދުވަހު ކުރިއަށް ގެންދިޔަ މުޒާހަރާތައް ދިޔައީ އަމާންކަމާއެކު ކަމަށް ވަނީ ރިޕޯޓްކޮށްފައެވެ. އަދި މި މުޒާހަރާތަކުގައި އުމުރުން ދުވަސްވީ މީހުންނާއި ޒުވާނުންވެސް ގިނަ އަދަދަކަށް ބައިވެރިވެފައިވެއެވެ. ޓްރަމްޕް ފުރަތަމަ 2016 ވަނަ އަހަރު ވެރިކަމާއި ހަވާލުވިތަނާހެން ވެސް އަންހެނުން އިސްނަގައިގެން ބޭއްވި އެއްވުމެއްގައި ބައި މިލިއަނަށްވުރެ ގިނަ މީހުން ވޮޝިންޓަނުގެ މަގުތަކަށް މުޒާހަރާއަށް ނުކުތެވެ.

އަދި ޓްރަމްޕުގެ ނުފޫޒު ގަދަވެފައިވާއިރު، ވެރިކަމާ ހަވާލުވެވަޑައިގަތުމަށްފަހު ޓްރަމްޕްގެ އެޕްރޫވަލް ރޭޓިން ވަނީ އެންމެ ދަށަށް ގޮސްފައި ކަމަށް ދާދި ފަހުން ނެގި ވޯޓުތަކުން ދައްކަ އެވެ. ނަމަވެސް ދުނިޔޭގެ އެކި ކަންކޮޅުތަކުގައި އޭނާގެ ޓެރިފްތަކަށް ބާރު އެޅުމާއި އެމެރިކާގެ ގިނަ ބައެއްގެ ނުރުހުން ބޮޑުވެފައިވީ ނަމަވެސް ވައިޓް ހައުސްއިން ވަނީ މުޒާހަރާތައް ދޮގުކޮށްފައެވެ.

އެމެރިކާގައި އުފެދިފައިވާ ނުތަނަވަސްކަމާއި ގުޅިގެން ޓްރަމްޕް ހުކުރު ދުވަހު ވިދާޅުވެފައިވަނީ އޭނާގެ ސިޔާސަތުތަކަށް ދުވަހަކުވެސް ބަދަލެއް ނާންނާނެ ކަމަށެވެ.