ރަސްދޫގައި ފިހުނު ފިރިހެން މީހާ ވެންޓިލޭޓަރުން ނަގައިފި
6 އެޕްރީލު 2025 | އާދީއްތަ 10:40ފަރުވާ ދެމުންދަނީ އައިސީޔޫގައި، ހާލަތާ ގުޅޭގޮތުން އެއްޗެއް ދަންނަވަން ދަތި
އައިޖީއެމްއެޗް
އއ. ރަސްދޫގައި ފިހުނު ފިރިހެން މީހާ ވެންޓިލޭޓަރުން ނަގައިފި އެވެ.
ރާއްޖެއެމްވީއަށް، އައިޖީއެމްއެޗްގެ މީޑީއާ އޮފިޝަލް ވިދާޅުވީ އޭނާ ވެންޓިލޭޓަރުން މިހާރު ނަގާފައިވާ ކަމަށާއި، ނަމަވެސް ފަރުވާ ދެމުންދަނީ އައިސީޔޫގައި ކަމަށެވެ.
ސިއްހީ ޚިދުމަތްތެރިއެއް ވިދާޅުވީ އެ ޒުވާނާގެ ހާލަތާ ގުޅޭގޮތުން ވަކި އެއްޗެއް ދަންނަވަން ދަތި ކަމަށެވެ. އެއީ ހާލަތު ރަނގަޅުވުމަށް ވަރަށް ދުވަސް ނަގާނެ ކަމަށާއި، އެއީ ހަށިގަނޑުގެ ބޮޑު ބައެއް ފިހައިވާތީ ކަމަށް އޭނާ ވިދާޅުވިއެވެ. އަދި ފަރުވާ ދެމުންދަނީ ވެސް ވަރަށް ކްރިޓިކަލް ހާލަތުގައި ކަމަށެވެ.
31 އަހަރުގެ ޒުވާން ދެމަފިރިން ވަރަށް ބޮޑަށް ފިހުނު ރިޕޯޓު ފުލުހުންނަަށް ލިބިފައިވަނީ 24 މާރިޗް 2025 ވަނަ ދުވަހުގެ ރޭ 11:15 ގައެވެ.
އެ ރޭ އެދެމަފިރިންނަށް ފަރުވާ ދިނުމަށް އެމަޖެންސީގައި މާލެއަށް ގެނަސްފައިވާއިރު، އަންހެން މީހާގެ ހަށިގަނޑުގެ %83 އަދި ފިރިހެން މީހާގެ ހަށިގަނޑުގެ %78 ފިހިފައިވެއެވެ. އަދި އެ ދެމަފިރިންނަށް ފަރުވާ ދިނުމަށް ރާއްޖޭން ބޭރުން 'ބާން ސްޕެޝަލިސްޓު' ޑޮކްޓަރެއް ވެސް ރާއްޖެ ގެނައެވެ. ވެންޓިލޭޓަރުގައި ފަރުވާ ދެމުންދަނިކޮށް އަންހެން މީހާ ނިޔާވީ މާޗު 31 ގައެވެ.
މައުލޫމާތު ލިބިފައިވާ ގޮތުގައި އެ ދެމަފިރިންގެ ފަސް އަހަރުގެ ތުއްތު ކުއްޖަކު ހުރެއެވެ. ނަމަވެސް އަލިފާނުގެ ހާދިސާ ހިނގި އެ ވަގުތު އެ ކުއްޖާ ކޮޓަރީގައި ނޫޅެއެވެ.
އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެ އެވެ.
ފުލުހުން ދަނީ މިހާދިސާ އިތުރަށް ތަހުގީގު ކުރަމުންނެވެ.
