އިސްރާއިލުން ޣައްޒާގެ ދާރުލް އަރްޤަމް ސްކޫލަށް ދިން ބޮމުގެ ހަމަލާ ދިވެހިރާއްޖެއިން ކުށްވެރިކޮށްފިއެވެ.

ފޮރިން މިނިސްޓްރީން އާއްމު ކުރި ބަޔާނެއްގައި އިސްރާއީލުން ސަޢޫދީ ސެންޓަރ ފޯ ކަލްޗަރ އެންޑް ހެރިޓޭޖުން ޣައްޒާގައި ހިންގާ ބޭސްފަރުވާއަށް ބޭނުންވާ ސާމާނު ރައްކާކުރާ ގުދަނަކަށް ވެސް ހަމަލާ ދިންކަން ފާހަގަކޮސް އެކަން ކުށްވެރިކޮށްފައިވެއެވެ.

އިސްރާއީލުން ހިންގާ މިފަދަ އަނިޔާވެރި އަމަލުތައް ވަގުތުން ހުއްޓުވަން ޖެހޭ ކަމަށް ވެސް އެ ބަޔާނުގައިވެއެވެ. ޣައްޒާގެ ރައްޔިތުންގެ އަސާސީ ބޭނުންތަކަށް އެހީތެރިވުމަށް ބައިނަލްއަޤުވާމީ މުޖުތަމައު އަށް އެ ބަޔާނުގައި ވަނީ ގޮވާލާފައެވެ.

މިފަދަ ހަމަލާތަކަކީ ބައިނަލްއަގްވާމީ ގާނޫނާއި ބައިނަލްއަގްވާމީ އިންސާނިއްޔަތުކަމާ ބެހޭ ގާނޫނުތަކާއި ވެސް ޚިލާފުކަމެއް ކަމަށް ފޮރިން މިނިސްޓްރީން ފާހަގަކޮށްފައިވެއެވެ. އިސްރާއީލުން ޣައްޒާ ސްކޫލަށް ދިން ހަމަލާގައި 30 އަށްވުރެ ގިނަ މީހުން ވަނީ ޝަހީދުވެފަ އެވެ. މީޑިއާ ރިޕޯޓްތައް ބުނާ ގޮތުން އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.