ރޮނާލްޑޯގެ މޮޅުކުޅުމާއި އެކު އަލް ނަޞްރުން އަލް ހިލާލް ބަލިކޮށްފި

ކްރިސްޓިއާނޯ ރޮނާލްޑޯގެ މޮޅު ކުޅުމާއި އެކު ވާދަވެރި އަލް ހިލާލް ބަލިކޮށް، ސައުދީ ޕްރޯ ލީގުގެ ޗެމްޕިއަންކަން ހޯދުމުގެ ރޭހުން އަލް ނަސްރުން އިތުރު ފިޔަވަޅެއް ކުރިއަށް ޖެހިލައިފިއެވެ.

ހިލާލްގެ ދަނޑުގައި ހުކުރު ދުވަހުގެ ރޭ ކުޅުނު މެޗުގައި އަލް ނަޞްރުން އަލް ހިލާލް ބަލިކުރީ 3-1 ގެ ނަތީޖާއަކުންނެވެ.

މެޗު ފެށިގެން ވެސް އަލް ނަޞްރުން މޮޅު ކުޅުމެއް ދައްކަމުން އައިރު، ލަނޑުޖަހަން ވެސް ރަނގަޅު ފުރުސަތުތަކެއް އެޓީމުން އައީ ތަނަވަސް ކުރަމުންނެވެ. އެގޮތުން އަލް ނަޞްރުން މި މެޗުގެ ފުރަތަމަ ލަނޑު ޖަހައި ލީޑު ނަގާފައި ވަނީ ފުރަތަމަ ހާފުގެ އިތުރު ވަގުތުގައި އަލީ އަލް ހަސަން ކާމިޔާބު ކޮށްދިން ލަނޑުންނެވެ.

މި މެޗުގައި އަލް ނަސްރުން ލީޑު ފުޅާކޮށްފައިވަނީ ދެވަނަ ހާފު ފަށައިގެން ދެވަނަ މިނެޓުގައެވެ. ސަޑިއޯ މާނޭ ތަނަވަސްކޮށްދިން ފުރުސަތެއްގައި މި ލަނޑު ކާމިޔާބުކޮށްދިނީ ކްރިސްޓިއާނޯ ރޮނާލްޑޯއެވެ. މި ލަނޑަށް ފަހުވެސް ރަނގަޅު ހުސް ފުރުސަތުތަކެއް ރޮނާލްޑޯއަށް ލިބުނެވެ. ނަމަވެސް އެ ފުރުސަތުތަކުގެ ބޭނުން ހިފޭގޮތެއް ނުވިއެވެ.

ދެޓީމުގެ ފަރާތުންވެސް ފޯރިގަދަ ކުޅުމެއް ފެނިގެންދިޔައިރު، އެންމެ ފަހުގެ ޗެމްޕިއަން އަލް ހިލާލަށް ހަމަޖެހުމުގެ ނޭވާއެއް ލެވުނީ މެޗުގެ 62 ވަނަ މިނެޓުގައި ކޯނަރަކުން އެޓީމުގެ އަލީ އަލް ބުލައިހީ ކާމިޔާބުކޮށްދިން ލަނޑާއެކުގައެވެ. ނަމަވެސް އަލް ހިލާލުގެ ބަދަލު ކުޅުންތެރިޔާ މޫތެބް އަލް ހަރްބީއަށް ހެދުނު ގޯހެއްގެ ސަބަބުން ވީއޭއާރް ބެލުމަށްފަހު އަލް ނަސްރަށް ރެފްރީ ދިން ޕެނަލްޓީއާ ހިސާބުން އަނެއްކާވެސް މެޗުގެ ނަތީޖާ ބަދަލުވެގެންދިޔައެވެ. އެގޮތުން މެޗުގެ 88 ވަނަ މިނިޓުގައި ރޮނާލްޑޯ ވަނީ ޕެނަލްޓީ ކާމިޔާބުކޮށް އަލް ނަސްރަށް ތިން ޕޮއިންޓް ކަށަވަރުކޮށްދީފައެވެ.

ސައުދީ ޕްރޯ ލީގުގެ ޕޮއިންޓް ތާވަލަށް ބަލާއިރު މިވަގުތު އަލް ނަސްރު އޮތީ 54 ޕޮއިންޓާއެކު ތާވަލުގެ ތިންވަނައިގައެވެ. އަލް ނަސްރަށްވުރެ 3 ޕޮއިންޓް އިތުރަށް ހޯދައިގެން އަލް ހިލާލް ދެވަނައިގައި އޮތީ 57 ޕޮއިންޓް ހަމަކޮށްގެންނެވެ. 61 ޕޮއިންޓު ހޯދައިގެން ތާވަލުގެ އެއްވަނައިގައި އޮތީ އަލް އިއްތިހާދެވެ.