މި ސަރުކާރުން ބޭނުންވަނީ އާއްމު ރައްޔިތުންގެ ވިޔަފާރިތައް ހުއްޓުވާލައި، ރައްޔިތުން އަޅުވެތި ކުރަން: އަމްރު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ބޭނުންވަނީ އާއްމު ރައްޔިތުންގެ ވިޔަފާރިތައް ހުއްޓުވާލައި، ރައްޔިތުން އަޅުވެތި ކުރުމަށް ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.

ރާއްޖޭޓީވީގެ "ޓީވީ ޓޯކް" ޕްރޮގްރާމްގައި އަމްރު ވިދާޅުވީ ގައުމުގެ ހުރިހާ ވިޔަފާރިތަކަށް ސަރުކާރުން ވަންނަމުންދަނީ އާއްމު ވިޔަފާރިތައް ހުއްޓުވާލުމަށް ކަމަށެވެ. އެގޮތުން ސަރުކާރުން ޓެކްސީ ވިޔަފާރިއަށް، ގެސްޓުހައުސް ވިޔަފާރިއަށް ވަނުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.

މީގެ އިތުރުން އަމްރު ވިދާޅުވީ ހުރިހާ މަޝްރޫއުތައް މިހާރު ހަވާލު ކުރަމުންދަނީ ސަރުކާރުގެ ހިއްސާ އޮންނަ ކުންފުނިތަކަށް ކަމަށާއި، ޕްރައިވެޓް ކުންފުނިތައް އެކަހެރި ކުރަމުންދާ ކަމަށެވެ. އަދި ގިނަ މަޝްރޫއުތައް ސަރުކާރުގެ ހިއްސާ އޮންނަ ކުންފުނިތަކަށް ދިނުމުގެ ނަތީޖާއެއް ގޮތުން އެތަންތަނުން މުވައްޒަފުން ނަގާނެ ކަމަށާއި، ޕްރައިވެޓް ސެކްޓަރގައި މަސައްކަތް ކުރަމުންދިޔަ މީހުންނަށް ސަރުކާރުގެ ވަޒީފާތަކާ ގުޅެން މަޖުބޫރުވާނެ ކަމަށް އަމްރު ވިދާޅުވި އެވެ.

އަމްރު ވިދާޅުވީ މި ސަރުކާރުން މަސައްކަތް ކުރަމުންދަނީ ގިނަ ބަޔަކު ސަރުކާރުގެ މުވައްޒަފުންގެ ގޮތުގައި ބައިތިއްބައި، އަޅުވެތި ކުރުމަށް ކަމަށެވެ. އަދި މިހާރު ރާއްޖެއިން ފެންނަމުންދަނީ އެ މަންޒަރު ކަމަށް އޭނާ ވިދާޅުވި އެވެ.

ސަރުކާރުން އެކަހަލަ ބައިވަރު ހުރިހާ ޕްރޮޖެކްޓްތައް ރަށްރަށުގައި ހިންގާ ޕްރޮޖެކްޓްތައް ވެސް މިދެނީ ސަރުކާރު ހިއްސާވާ ކުންފުނިތަކަށް. ދިނީމަ މިވާ ގޮތަކީ އެމީހުން ވެސް ބޭނުންވާ މުވައްޒަފުން. އެހެންވީމަ ޕްރައިވެޓް ސެކްޓަރގައި މަސައްކަތް ކުރަމުން އަންނަ މުވައްޒަފުން ބަދަލުވާން މިޖެހެނީ ސަރުކާރު ހިއްސާވާ ކުންފުނިތަކަށް. ޓެކްސީ ދުއްވަމުންދާ އާއްމު ފަރާތްތަކުން ބަދަލުވާންޖެހެނީ ސަރުކާރު މުވައްޒަފުންނަށް. މިހެން ގޮސް އާއްމުންގެ ގިނަ ބަޔަކު ވިޔަފާރިތައް ހުއްޓާލާފައި މި ވަންނަންޖެހެނީ ސަރުކާރު ހިއްސާވާ ކުންފުނިތަކުގެ ވަޒީފާއަށް. ވަނީމަ އެ ތާށިވީ. ދެން އެމީހުން ޑިޕެންޑްވާން ޖެހެނީ އެމީހުންގެ އާއިލާއަށް ބޭނުންވާ ހުރިހާ ކަމެއް ކޮށްދޭން. އެއްކަލަ ލިބޭ ސަރުކާރުން ދޭ މުސާރަކޮޅަށް. އެހެންވީމަ ކިތަންމެ މުސާރަ ދަށްވިޔަސް އެމީހުން ގެންގުޅޭ ޝޮޕިން ލިސްޓް ކިތަންމެ ވަރަށް ކުޑަވިޔަސް އެމީހުން ތިބެންޖެހޭނީ ވަޒީފާގައި. ކަނޑާލާފިއްޔާ ދެން ނީއްނާނެ އިތުރު ގޮތެއް. އެ ހިސާބަށް ރާއްޖޭގެ ހާލަތު ދާތީވެ ގިނަ ބައެއްގެ ސަރުކާރު މުވައްޒަފުންގެ ގޮތުގައި ބައިތިއްބާ އަޅުވެތި ކުރުމަށް މަސައްކަތް ކުރަމުންދާތަން އަޅުގަނޑަށް ފެންނަނީ.

ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު

އަމްރު ވިދާޅުވީ މިސަރުކާރުގެ ސިޔާސަތުގެ ސަބަބުން ދުވަހަށް ވުރެ ދުވަހެއް ރައްޔިތުންނަށް ލިބޭ އާމްދަނީ ދަށްވެ، ރައްޔިތުން ވަރަށް ބޮޑަށް ނިކަމެތިވަމުންދާ ކަމަށެވެ. އަދި ކުރިއަށް އޮތްތަނުގައި ވަރަށް ބޮޑު ދައްޗެއް އަންނާނެ ކަމަށާއި، އެ އެ ދަތީގައި ރައްޔިތުން އަޅުވެތި ކުރުމަށް ސަރުކާރުން ވަރަށް ބޮޑަށް ތައްޔާރުވަމުންދާ ކަމަށް އަމްރު ވިދާޅުވި އެވެ.