17 ދުވަސް ވަންދެން ގައުމު ބަންދު!
ރައީސުލްޖުމްހޫރިއްޔާ ވިދާޅުވީ ރަމަޟާން މަހަށްފަހު އަންނަ އީދު ބަންދާ ގުޅިގެން، ސަރުކާރުން އިސްނަގައިގެން މުސްލިމުން އުފާފާޅުކުރުމަށް މަގުފަހިކޮށްދޭން ޖެހޭނެކަން ޤަބޫލުފުޅުކުރައްވާކަމަށެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ވެރިކަމަށް ވަޑައިގެންނެވީ ރައްޔިތުންނަށް ވަރަށް ފޮނި ހުވަފެން ދައްކަމުންނެވެ. ތިމަންމެން މިތިބީ ރެޔާ ދުވާލު ރައްޔިތުންނާއި އެކީގައި ކަމަށް ބުނެއެވެ. ކެއުމެއް ނިދުމެއް އަރާމްކުރުމެއްވެސް އޮންނާނީ ރައްޔިތުންނަށް ޙިދުމަތްކޮށްފައި އެއަށް ފަހު ވިދާޅުވަމުންނެއެވެ. އެއްކަލަ ރައްޔިތުންނަށް ހީވި، ވެރިކަމަށް ގެންނަވަން މިއީ ފިސާރި ގަދަ ބޭފުޅަކަށްވާނެއެވެ. އެހެންތާ ވާނީވެސް، އެހެންނޫންތޯއެވެ. ޕީއެޗްޑީ ހާސިކުރައްވައިގެން ހުންނެވުމުން ރައްޔިތުން ބުނީ އާނ ހޭއްވައްލާ ތައްޔާރުއެވެ. ވެރިކަން މިއޮތީ އެވެ. އިސާހިތަކު ވެރިކަމުގެ ހުވާ ކުރައްވާ ވިދާޅުވީ އަޅުގަނޑު މިއައީ 24 ގަޑި އިރު ރައްޔިތުންނަށް ޚިދުމަތްކޮށްދޭންށެ އެވެ. ފިސާރި ފޯރިއާއި އެކު ރައްޔިތުންނަށް ޚިދުމަތްކޮށްދިނުމަށް ވަޑައިގެންނެވި މިނިސްޓަރުންވެސް ބުނާތީ އަޑު އިވެން ފެއްޓިއެވެ. ފޯނުގެ ޑޭޓާ އޮފްވެސް ކޮށްލަން ރައީސް ވަނީ މަނާކޮށްފައެވެ. އެވެސް ރައްޔިތެއްގެ އެއްވެސް ކަމެއް ލަސްނުވެ ރައްޔިތު މީހާއަށް ޚިދުމަތްކޮށްދިނުމަށެވެ.
ނަމަވެސް ވެރިކަން ފެށިގެން މިހާތަނަށް އައި އިރު ގިނައިން ފެނިގެންދަނީ ކޮންމެވެސް ކަމެއް ދިމާވެގެން ނުވަތަ ކޮންމެވެސް ކަމަކާއި ހުރެމެ، ސަރުކާރު ބަންދުކުރާ ދުވަސްތައް ގިނަވާ ތަނެއެވެ.
އަދި ރަމަޟާން މަހުގެ ފަހު ދިހައެއް ސަރުކާރުން ބަންދުކުރެއްވީ، އިސްލާމްދީނުގައި ސަވާބާއި، ދަރުމަ ހޯދުމަށް ހުންނަ ކަންކަމަށް، ރައްޔިތުންނަށް މަގުފަހިކޮށްދެއްވުމަށް ކަމުގައި ފާހަގަކުރައްވައި އެކަންކަން ކޮށްދެއްވުމަކީ ޒިންމާއެއް އަދި ފަޚުރެއްކަމުގައި ދެކިވަޑައިގަންނަވާކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވަމުންނެ އެވެ.
ރައީސުލްޖުމްހޫރިއްޔާ ވިދާޅުވީ ރަމަޟާން މަހަށްފަހު އަންނަ އީދު ބަންދާ ގުޅިގެން، ސަރުކާރުން އިސްނަގައިގެން މުސްލިމުން އުފާފާޅުކުރުމަށް މަގުފަހިކޮށްދޭން ޖެހޭނެކަން ޤަބޫލުފުޅުކުރައްވާކަމަށެވެ. އަދި އީދުގެ ދިއްލުންތައް ދިއްލުމުގެ ސަބަބުން ކުޑަކުދިންނަށް ޚާއްޞަކޮށް، އިސްލާމް ދީނަށް ލޯބިކުރުމަށް ބާރުއެޅިގެންދާނެކަމުގައި އެމަނިކުފާނު ފާހަގަކުރެއްވިއެވެ. އެމަނިކުފާނުގެ ވާހަކަ މިހެން ހުންނެވިއިރު ސުވާލަކީ އީދު ބަންދާއި ގުޅިގެން އުފާ ފަޅުކުރަން ޖެހެނީ ވަކި ބައެއްތޯއެވެ. ސްޓެލްކޯ، އެޗްޑީސީ ފަދަ ކުންފުނިތަކުގައި ރެޔާއި ދުވާލު ލައިޓް ޖެހުމުގައި ބުރަކޮށް އުޅުނު މުވައްޒަފުން ކޮބައިތޯއެވެ. ސަރުކާރުގެ ބިޔަ ބޮޑު މަޝްރޫއުތައް ކުންފުނިތަކާއި ހަވާލުކުރަން އަވިދިނެތި މަސައްކަތުގައި ތިބި ސީޓީސް މިނިސްޓްރީގެ މުވައްޒުން ކޮބައިތޯއެވެ. އީދުގެ ކަންކަމުގައި މިދެންނެވި މުވައްޒަފުން އުޅުނީ ވަރަށް ބުރަކޮށެއެވެ.
އެއްބަޔަކަށް އީދުގެ އުފާ ނުލިބި އަނެއް ބަޔަކަށް އީދުގެ އުފާ ލިބުން މިއީ އިންސާފެއްތޯއެވެ. ދެން އޮތީ އަނެއް ވާހަކައެވެ. 17 ދުވަސް މުޅި ގައުމު ބަންދުކޮށްލީއެވެ. މީގެ ކުރިންވެސް މިގައުމުގައި ރައްޔިތުން ރޯދަ މަހު ރޯދަ ހިފައި ސްކޫލު އަދި އޮފީސްތަކަށްވެސް ގޮސްހެދިއެވެ. ނަމަވެސް ރައީސް މުއިއްޒު ބޭނުންފުޅުވީ ރަމަޟާން މަހުގެ ފަހު ދިހަ އަޅުކަމުގައި ގިނަ ވަގުތު ހޭދަކުރުމުގެ ގޮތުން އެކަން މަގުފަހިކޮށްދިނުމަށް ސަރުކާރު ބަންދުކުރާށެވެ. އެކަންވެސް ކޮށްފިއެވެ. ރޯދަ މަސް ނިމި ޝައްވާލުމަސް ފެށުމުން، އީދު ބަންދުގެ ނަމުގައި ޝައްވާލުމަގުގެ ފުރަތަމަ 6 ދުވަސް ބަންކުރީއެވެ.
މިއަދު ބޭންކް ބަންދު، ސަރުކާރުގެ އޮފީސްތައް ބަންދު، ސަރުކާރުގެ އެތައް މަސައްކަތެއް ހުއްޓި ގައުމު މިއޮތީ ބަންދުވެފައެވެ. އެއްކަލަ 24 ގަޑިއިރު ޚިދުމަތްދޭންބުނި ސަރުކާރުގެ ވެރިން ކޮބައިތޯއެވެ. އާރަށުގައާއި ރާއްޖެއިން ބޭރުގައި ޗުއްޓީ ހޭދަކުރައްވަނީއެވެ.
މިގޮތަށް ގައުމު ހުއްޓުމަކަށް ގެނެސްގެންވެސް ތިބެނީ ދުނިޔޭގެ ވަރަށް މުއްސަނދި ގައުމުތަކެއެވެ. ރާއްޖެ ހަމަ އެދަރައަށް ދިއައީތޯއެވެ. މިއަދު ރައްޔިތު މީހާ މިއުޅެނީ، އަސާސީ ޚިދުމަތެއް ކަމަށްވާ ކަރަންޓްގެ ޚިދުމަތް 24 ގަޑި އިރު ނުލިބިއެވެ. ރާއްޖެއިން ބޭރުން އާސަންދައިގެ ޚިދުމަތް ނުލިބި ތަކުލީފްތަކާއި ކުރިމަތިލާންޖެހެނީ ރައްޔިތުމީހާއެވެ. ބޭސް ސިޓީއަށް ބޭސް ނުލިބިގެން ދެކޮޅަށް ދުވެ ނަގަނީއެވެ. އަދިވެސް ގައުމު ބަންދުކޮށްފައި ބާއްވަނީތޯއެވެ.
ގައުމުގެ އިންޖީނު ހުއްޓާލައިގެން ގައުމު ކުރިއަށްދާނެ ގޮތަކަށް ދޫކޮށްލައިގެން ރައީސް މުއިއްޒު ހުންނަވަނީ އަރިހުގައި ތިއްބަވާ ބަޔަކު ވިދާޅުވާތީތޯއެވެ. ފަހަރުގައި ވެދާނެ ޕާރސަނަލް ކޮންމެވެސް ކަމެއްގައި، ބަޔަކު ބުނީމަ އެކަމެއް އެގޮތަށް ނިންމަވަނީ ކަމަށް ބަޔަކު ބުނާތީ އަޑު އިވެއެވެ. ކޮންމެއަކަށް 24 ގަޑި އިރު މަސައްކަތްކުރަން އައި ސަރުކާރުން މިއަދު މުޅި ގައުމު ބަންދުކޮށް އީދު ފާހަގަކުރަނީއެވެ.
