ހއ. ހޯރަފުށީ ސިއްހީ މަރުކަޒުން 9 މަހުގެ ކުޑަ ކުއްޖެއްގެ ގަޔަށް 18 މަހުގައި ޖަހަން ޖެހޭ ވެކްސިން އެއް ޖެހި މައްސަލަ އެއް ފެންމަތިވެއްޖެ އެވެ.

އެ ކުޑަ ކުއްޖާގެ އާއިލާގެ ފަރާތުން ރާއްޖެ އެމްވީ އަށް މައުލޫމާތު ދީފައިވާ ގޮތުގައި އެ ކުޑަ ކުއްޖާ އަށް 9 މަހުގައި ދޭން ޖެހޭ ވެކްސިން ޖެހުމަށް، ސިއްހީ މަރުކަޒަށް ގެންގޮސްފައި ވަނީ މިދިޔަ މާރޗް މަހުގެ 10 ވަނަ ދުވަހުއެވެ.

ރާއްޖޭގައި ވެކްސިން ޝެޑިއުލްކޮށްފައި ހުންނަ ގޮތަށް ބަލާ އިރު 18 މަހުގައި ޖަހަން ޖެހެނީ އެމްއެމްއާރް ވެކްސިންވެ. 9 މަހުގައި ޖަހަން ޖެހެނީ އެމްއާރް ވެކްސިންއެވެ. ދިމާވެފައިވާ މައްސަލަ އަކީ 9 މަހުގައި ކުއްޖާގެ ގަޔަށް އެމްއެމްއާރް ވެކްސިން ޖެހި މައްސަލައެކެވެ.

ކުއްޖާ އަށް ވެކްސިން ދިން ފަހުން މަހެއްހާ ދުވަސް ވާން ކައިރިވެފައި ވަނިކޮށް ހޯމަ ދުވަހު ސިއްހީ މަރުކަޒުން އެ ކުއްޖާގެ މައިންބަފައިންނަށް ގުޅާ، ހޯރަފުށީ ސިއްހީ މަރުކަޒަށް އަންގާރަ ދުވަހު ހެނދުނު 09:40 ހާއިރު އައުމަށް އެދިފައިވާ ކަމަށް އޭނާގެ އާއިލާ އިން ވަނީ ބުނެފައެވެ. އަދި ސިއްހީ މަރުކަޒުގެ އެދުމާއި އެކު އަންގާރަ ދުވަހުގެ ހެނދުނު 10:00ހާއިރު ކަމާއި ގުޅުން ހުރި ފަރާތްތަކާއި ބައްދަލުކުރުމަށް އާއިލާ އިން ގޮސްފައިވާނެ ކަމަށް މި ނޫހަށް މައުލޫމާތު ދެމުން އެ ކުޑަކުއްޖާގެ އާއިލާ އިން ވަނީ ބުނެފަ އެވެ.

އާއިލާ އިން ބުނާ ގޮތުން ސިއްހީ މަރުކަޒުން ބުނީ ބައްދަލުކުރަން ބޭނުން ވަނީ ކުއްޖާ އަށް ދިން ވެކްސިން އާއި ގުޅޭ މައުލޫމާތެއް ދިނުމަށް ކަމަށް ބައްދަލުވުމަށް ހާޒިރުވުމަށް އެންގި އިރު ވެސް އާއިލާ އަށް ވަނީ އަންގާފަ އެވެ. އައިލާ އިން ވަނީ ނުބައި ވެކްސިން އެއް ކުއްޖާ އަށް ދިނުމަކީ އެއީ ސިއްހީ މަރުކަޒުގެ ފަރުވާ ކުޑަކަމުން ހިނގި ކަމެއް ކަމަށް ބުނެފައެވެ. އަދި ސިއްހީ މަރުކަޒުން މި މައްސަލަ ތަހުގީގުކުރަމުންދާ ކަމަށާއި އިހުމާލުވާ މުވައްޒަފަކު ހުރި ނަމަ އެކަމާއި މެދު ފިޔަވަޅު އަޅާނެ ކަމަށް އާއިލާ އަށް އަންގާފައިވާ ކަމަށް ވެސް އެ އާއިލާގެ ފަރާތުން ވަނީ ބުނެފައެވެ.

މި ނޫހަށް މައުލޫމާތު ދެމުން އެ އާއިލާގެ މެމްބަރަކު ބުނީ އެ އާއިލާގެ ފަރާތުން އޮތް އެންމެ ބޮޑު ކަންބޮޑުވުމަކީ، މިއީ މިފަދަ މައްސަލަ އެއް ދިމާވި ފުރަތަމަ ފަހަރަށް ނުވުމެވެ. އެގޮތުން ހަމަ މި ކުއްޖާ އަށް ވެކްސިން ދިނުމަށް ފަހު ވެކްސިން ރެކޯޑްކުރުމުގައި ކުރިން ވެސް އިހުމާލުވެފައިވާ މައްސަލަ އެއް ދިމާވެފައިވާ ކަމަށް އާއިލާ އިން ވަނީ ބުނެފަ އެވެ.

އެގޮތުން ހޯރަފުށީ ސިއްހީ މަރުކަޒުން ކުއްޖާ އަށް 8 މަހުގައި ދޭން ޖެހޭ ވެކްސިން ދިން އިރު، ރަނގަޅު ވެކްސިން ޖެހުމަށް ފަހު ވެކްސިން ކާޑުގައި އެހެން ވެކްސިން އެއްގެ ނަން ޖެހި މައްސަލަ އެއް ފެންމަތިވެފައިވާ ކަމަށް އާއިލާ އިން ވަނީ ބުނެފައެވެ. އަދި އެ ކުއްޖާ މާލެ ގެނެސް ބަރުދަން ބެލުމަށް މާލޭގެ ސިއްހީ ޚިދުމަތް ދޭ ތަނަކަށް ދިއުމުން، ކުއްޖާ އަށް ނުބައި ވެކްސިން އެއް ދީފައިވާ ކަމަށް އޭނާގެ ވެކްސިން ކާޑުން އެނގޭތީ އެކަން އާއިލާގެ ސަމާލުކަމަށް ގެނައި ކަމަށް ވެސް އެ އާއިލާ އިން ވަނީ ބުނެފަ އެވެ. އެ ހިސާބުން އާއިލާ އިން ސިއްހީ މަރުކަޒާއި ސުވާލުކުރުމުން އެއީ ވެކްސިން ރެކޯޑްކުރުމުގައި ދިމާވި މައްސަލަ އެއް ކަމަށް ހާމަކޮށްފައިވާ ކަމަށް އެ އާއިލާ އިން ވަނީ ހާމަކޮށްފަ އެވެ.

އެ އާއިލާ އިން ބުނީ މި މައްސަލަ ސީރިއަސް މައްސަލަ އެއްގެ ގޮތުގައި ބަލަން ބޭނުންވާ ކަމަށާއި މި މައްސަލަ ގެންދެވުނު ހިސާބަކަށް ގޮސްގެން އިހުމާލުވާ ފަރާތްތައް ޒިންމާދާރުކުރުވަން ބޭނުންވާ ކަމަށެވެ. ސަބަބަކީ ދެން ތަކުރާރު ވުމަށް ނޭދޭތީ ކަމަށް ވެސް އާއިލާ އިން ވަނީ ބުނެފަ އެވެ.

ސިއްހީ މަރުކަޒުން ރާއްޖެ އެމްވީ އަށް މައުލޫމާތު ދިން ގޮތުގައި ދެތިން އެ މަރުކަޒުގެ ސަމާލުކަމަށް މި މައްސަލަ އައީ މީގެ ދެ ތިން ދުވަސް ކުރިންނެވެ. އެއީ ކުއްޖާ އަށް ވެކްސިން ދިންތާ ގަތްގަނޑަކަށް 3 ހަފްތާ ފަހުންނެވެ. އެކަން އެނގުނު ހިސާބުން އެޗްޕީއޭ އަށް އެކަން އަންގާ، އަމަލު ކުރަންވީ ގޮތުގެ އިރުޝާދަށް އެދިފައިވާނެ ކަމަށް އެ އިދާރާއިން ވަނީ ބުނެފައެވެ. އެ މަރުކަޒުން ބުނީ ސިއްހީ މާހިރުންގެ ލަފާ މި ކޭސްގައި ހޯދާފައިވާ ކަމަށާއި ކުއްޖާ އަށް ނުރައްކާ ވާ ފަދަ ކަމެއް މި މައްސަލައިގައި ނެތް ކަމަށެވެ.

އަދި އައިޖީއެމްއެޗްގެ ކުޑަކުދިންގެ ޑޮކްޓަރ ޑރ.އަހުމަދު ފައިސަލްގެ ލަފާ ވެސް ހޯދާ، އެ ޑޮކްޓަރުގެ ލަފާ ހޯދުމަށް ފުރުސަތު ކުއްޖާގެ ދީފައިވާނެ ކަމަށް ހޯރަފުށީ ސިއްހީ މަރުކަޒުން ބުނެ އެވެ. މީހެ އިތުރުން އެޗްޕީއޭ އިން ލަފާ ދީފައި ވަނީ މިހާރު ދިން ޑޯޒް އަކީ އެމްއެމްއާރުގެ 1 ވަނަ ޑޯޒް ކަމަށް ރެކޯޑްކުރުމަށް ފަހު ޕޯޓަލް ވެސް އެއާއި އެއްގޮތަށް އަދާހަމަ ކުރުމަށް ކަމަށް އެ މަރުކަޒުން މައުލޫމާތު ދެއެވެ. އަދި ދެން ދޭ ޑޯޒް 18 މަހުގަ، އެމްއެމްއާރްގެ 2 ވަނަ ޑޯޒްގެ ގޮތުގައި ރެކޯޑްކުރުމަށް ލަފާ ލިބިފައިވާ ކަމަށް ސިއްހީ މަރުކަޒުން ވަނީ ބުނެފަ އެވެ.

މި މައްސަލައިގައި ޒިންމާވާން ޖެހޭ މުވައްޒަފުން އެކަހެރުކޮށްފައި ނުވާ ކަމަށް މި ނޫހަށް ވަނީ އެނގިފައެވެ. އެހެންނަމަވެސް އެ މުވައްޒަފުންގެ މައްސަލަ އުސޫލާއި އެއް ގޮތަށް ބަލަމުންދާ ކަމަށާއި ސިވިލް ސަރވިސް ކޮންޑަކްޓާއި އެއްގޮތަށް މައްސަލަ ބަލާ، އިހުމާލުވާ ފަރާތެއް ވާނަމަ އެކަށީގެންވާ ފިޔަވަޅު އަޅާނެ ކަމަށް ސިއްހީމަރުކަޒުން ވަނީ ބުނެފަ އެވެ. މީގެ އިތުރުން ކުރިން ކުއްޖާ އަށް ދިން ވެކްސިން ރެކޯޑްކުރުމުގައި ދިމާވި މައްސަލަ އަކީ އެއީ ރެކޯޑް ލިޔުމުގައި ދިމާވި މައްސަލަ އެއް ކަމަށް އެ މަރުކަޒުން ވަނީ ބުނެފަ އެވެ.