" ދުނިޔޭގެ މައްސަލަތަކަށް ހައްލު ހޯދައިދެވޭނީ ގައުމުތަކުން އެއް އާއިލާ އެއްގެ ގޮތުގައި މަސައްކަތްކޮށްގެން "
އެ މަނިކުފާނު ވަނީ ކޮވިޑް-19އިގެ ދުވަސްވަރު އެހެން ޤައުމުތަކަށް އެހީވުމަށް އިންޑިއާ އިން އަދާކުރި ދައުރު ފާހަގަކޮށް އެކަމަށް ތައުރީފްކުރައްވާފަ
ޓީވީ ނައިން ނެޓްވޯކްގެ ' ވަޓް އިންޑިއާ ތިންކްސް ޓުޑޭ ' ސަމިޓްގައި އެެމްޑީޕީގެ ރައީސް އަބްދުﷲ ޝާހިދު އަދި އިންޑިއާގެ ބޮޑުވަޒީރު ނަރެންދްރަ މޯދީ އާއި އެހެން ބައެއް ބޭފުޅުން އެކުގައި ނަންގަވާފައިވާ ފޮޓޯ އެއް
ދުނިޔޭގެ މައްސަލަތަކަށް ހައްލު ހޯދައިދެވޭނީ އެއް ބިމެއް، އެއް އާއިލާ އެއްގެ ގޮތުގައި ދުނިޔޭގެ ޤައުމުތަކުން މަސައްކަތްކޮށްގެން ކަމަށް އދގެ އާއްމު މަޖިލީހުގެ 76 ވަނަ ދައުރުގެ ރައީސް އަދި މޯލްޑިވިއަން ޑިމޮކްރެޓިކް ޕާޓީ (އެމްޑީޕީގެ)އަބްދުﷲ ޝާހިދު ވިދާޅުވެއްޖައެވެ.
ޝާހިދު އެފަދައިން ވިދާޅުވީ ޓީވީ ނައިން ނެޓްވޯކްގެ ' ވަޓް އިންޑިއާ ތިންކްސް ޓުޑޭ' ސަމިޓްގައި ވާހަކަދައްކަވަމުންނެވެ.
ބޮޑެތި ކަންކަން ނިންމުމުގައި ބަސްބުނުމަށް ތަރައްޤީވަމުން އަންނަ ޤައުމުތަކުން މިހާރަށް ވުރެ ބޮޑު ދައުރެއް އަދާކުރަން ޖެހޭ ކަމަށް ވެސް ޝާހިދު ވަނީ ވިދާޅުވެފައެވެ. ގައުމުތަކުގެ މުސްތަގްބަލް ބިނާކުރުމަށް އެކުގައި ގައުމުތަކުން މަސައްކަތްކޮށްގެން ނޫނީ ކާމިޔާބު ނުވާނެ ކަމަށް ޝާހިދު ވަނީ ވިދާޅުވެފައެވެ. މިއަދު ޤައުމުތަކުން ކުރިމަތިލާ ކަންކަމަކީ އެއް މައްސަލަ އެއްގެ ގޮތުގައި ދެކިގެން އެކުގައި ހައްލުކުރަން ޖެހޭ ފަދަ މައްސަލަތަކެއް ކަމަށް ވެސް ޝާހިދު ވިދާޅުވިއެވެ. އެކަނި އެއް ޤައުމަކަށް ނުކުމެ ކަންކަން ހައްލު ނުކުރެވޭނެ ކަމަށް ޝާހިދު ވަނީ ވިދާޅުވެފައެވެ.
އެ ސަމިޓްގެ ހަވާސާގައި ވާހަކަދައްކަވަމުން ޝާހިދު ވިދާޅުވީ ކޮވިޑް-19އިގެ ނުރައްކާތެރިކަމާއި ކުރިމަތިވި އިރު އެ ވައިރަސް ފެތުރުނީ ގުދުރަތީ ގޮތުން ދުނިޔޭގެ ޤައުމުތައް ވަކިވެފައި އޮތް އޮތުމަށް ބަލައިގެން ނޫން ކަމަށެވެ. ދުނިޔޭގެ އެކި ކަންކޮޅުތަކުން އެ ބަލީގައި އެތައް މިލިއަން ބަޔަކު މަރުވެ ދިޔަކަން ޝާހިދު ވަނީ ފާހަގަކުރައްވާފައެވެ. އެހެންކަމުން ކޮވިޑް-19 ފަދަ ބަލިތަކުން އަރައިގަނެ، އެ ފަދަ މައްސަލަތަކަށް ހައްލު ހޯދެނީ ގައުމުތަކުން ގުޅިގެން އެކުގައި ކުރާ މަސައްކަތުން ކަމަށް ޝާހިދު ވަނީ ވިދާޅުވެފައެވެ.
އެ މަނިކުފާނު ވަނީ ކޮވިޑް-19އިގެ ދުވަސްވަރު އެހެން ޤައުމުތަކަށް އެހީވުމަށް އިންޑިއާ އިން އަދާކުރި ދައުރު ފާހަގަކޮށް އެކަމަށް ތައުރީފްކުރައްވާފައެވެ. އެގޮތުން އިންޑިއާ އަކީ އަވަށްޓެރިންގެ އިތުރުން ދުނިޔޭގެ އެހެން ޤައުމުތަކަށް ވެސް ބޭނުންވާ އިރު އެހީވާނެ ބައެއްކަން އިންޑިއާ އިން ސާބިތުކޮށްދީފައިވާ ކަމަށް އެ މަނިކުފާނު ވަނީ ވިދާޅުވެފައެވެ. އދގެ އާއްމު މަޖިލީހުގެ 76 ވަނަ ދައުރުގެ ރައީސްކަން އަދާކުރެއްވި އިރު އެކަން ވަރަށް ކައިރިން ދެކެވަޑައިގެންފައިވާ ކަމަށް ޝާހިދު ފާހަގަކުރެއްވިއެވެ.
