އއ. ރަސްދޫގައި ހިނގި އަލިފާނުގެ ހާދިސާގައި ފިހުނު ޒުވާން ދެމަފިރިންނަށް ފަރުވާދެނީ ބޭރު ޑޮކްޓަރެއްގެ ލަފާމަތިން ކަމަށް އައިޖީއެމްއެޗުން ހާމަކޮށްފި އެވެ.

އައިޖީއެމްއެޗުން ބުނި ގޮތުގައި އެ ދެމެފަރިންނަށް ފަރުވާ ދެމުންދަނީ ރާއްޖޭގެ ޑޮކްޓަރުންގެ ޓީމަކުންނެވެ. އއ. ރަސްދޫގައި ފިހުނު ޒުވާން ދެމަފިރިންގެ ހާލު އަދިވެސް ވަރަށް ކްރިޓިކަލް ކަމަށް އައިޖީއެމްއެޗުން ވަނީ ބުނެފަ އެވެ.

މީގެ އިތުރުން މި މަހުގެ 27 ގައި "ބަރންޓް ޝްޕެޝަލިސްޓް" އެއް މެދުވެރިކޮށް ފިހުނު ދެމަފިރިންނަށް ފަރުވާގެ ކަންކަން ހަމަޖައްސަމުންދާ ކަމަށް އެ ހޮސްޕިޓަލުން ވަނީ ބުނެފަ އެވެ. އަދި ފަރުވާގެ ކަންކަން ކުރިއަށް ގެންދިއުމަށް އެ ސްޕެޝަލިސްޓް ރާއްޖެ ގެނެސް، ރާއްޖޭގައި އެއް ދުވަސް ހޭދަކުރި ކަމަށް އެ ހޮސްޕިޓަލުން ހާމަކޮށްފައިވެ އެވެ.

މީގެ ކުރިން ރާއްޖެއެމްވީއަށް އައިޖީއެމްއެޗްގެ މީޑިއާ އޮފިޝަލް ވިދާޅުވީ ފިހިގެން އެ ހޮސްޕިޓަލަށް ގެނައީ 31 އަހަރުގެ ދެމަފިރިންގެ ހާލު އަދިވެސް ވަރަށް ކްރިޓިކަލް ކަމަށާއި، ހާލަތަށް އެއްވެސް ކަހަލަ ކުރިއެރުމެއް ލިބުނުކަން އަދި ދަންނަވަން ނޭނގޭ ކަމަށެވެ. އަދި ދެ މީހުންނަށް ވެސް ފަރުވާ ދެމުންދަނީ ވެންޓިލޭޓަރުގައި ކަމަށް އޮފިޝަލް ވިދާޅުވި އެވެ.

މި ހާދިސާގެ ރިޕޯޓު ފުލުހުންނަަށް ލިބިފައިވަނީ 24 މާރިޗް 2025 ވަނަ ދުވަހުގެ ރޭ 11:15 ގައެވެ.

އެ ރޭ އެދެމަފިރިންނަށް ފަރުވާ ދިނުމަށް އެމަޖެންސީގައި މާލެއަށް ގެނައި ނަމަވެސް އައިސީޔޫގައި ޖާގަ ނެތް ކަމަށް ބުނެ، އައިސީޔޫގައި ފަރުދާ ދީފައިނުވާ ކަމަށް އާއިލާއާ ހަވާލާދީ ބައެއް މީޑިއާތަކުގައި ރިޕޯޓުކޮށްފައިވެ އެވެ. އަދި އަންހެން މީހާގެ ހަށިގަނޑުގެ %83 އަދި ފިރިހެން މީހާގެ ހަށިގަނޑުގެ %78 ފިހިފައިވާއިރު، ފުރާނަ ސަލާމަތް ކުރުމަކީ ނާދިރުކަމެއް ކަމަށް ޑޮކްޓަރުންނާ ހަވާލާދީ އާއިލާއިން ބުނެފައިވެ އެވެ.

މައުލޫމާތު ލިބިފައިވާ ގޮތުގައި އެ ދެމަފިރިންގެ ފަސް އަހަރުގެ ތުއްތު ކުއްޖަކު ހުރެއެވެ. ނަމަވެސް އަލިފާނުގެ ހާދިސާ ހިނގި އެ ވަގުތު އެ ކުއްޖާ ކޮޓަރީގައި ނޫޅެ އެވެ. އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެ އެވެ.

ފުލުހުން ދަނީ މިހާދިސާ އިތުރަށް ތަހުގީގު ކުރަމުންނެވެ.