ހުޅުމާލެ އަޒީޒާ މޫސާ މިސްކިތުގައި ފިތުރު އީދު ނަމާދުކުރުމަށް ހަވާލުކުރި އިމާމު އަދި ބަދަލުގައި ހަމަޖެއްސި އިމާމު ސަސްޕެންޑް ކޮށްފިއެވެ.

އަޒީޒާ މިސްކިތުގައި އިމާމު ނައުމުގެ ސަބަބުން އީދު ނަމާދުކޮށްފައިވަނީ 7:05 ހާއިރު ބޭރު މީހެކެވެ.

މި މައްސަލައާ ގުޅިގެން އިސްލާމިކް މިނިސްޓަރު ޑރ.ޝަހީމް އަލީ ސައީދު ވިދާޅުވީ ހުޅުމާލެ އަޒީޒާ މިސްކިތުގައި އީދު ނަމާދުކުރުމަށް އިމާމުކަން ހަވާލުކޮށްފައިވާ ފަރާތާއި އޭނާގެ ބަދަލުގައި ޖައްސާފައިވާ ފަރާތާ މި ދެމީހުން ވެސް މިސްކިތަށް ހާޒިރުނުވާތީވެ، އުސޫލުގެ ތެރެއިން މައްސަލަ ބަލައި 5 އަހަރު ދުވަހަށް ރާއްޖޭގެ ހުރިހައި ރަށެއްގައި ޚުތުބާ ކިއުމުން ސަސްޕެންޑްކުރަން އަންގާފައިވާ ކަމަށެވެ.

އިމާމުގެ ބަދަލު އިމާމު ގޮތުގައި ހަމަ ޖައްސާފައިވަނީ މިސްކިތުގައި ހުންނަ އަސްލު އިމާމުކަމުން، މިނިސްޓްރީއަށް ނާންގައި ޖަމާއަތަށް ހާޒިރުނުވާތީވެ އެމައްސަލަ ވެސް ވަކިން ބަލައި އުސޫލުގެ ތެރެއިން އިމާމުކަމުގެ ވަޒީފާއިން ސަސްޕެންޑްކުރަން ވެސް ކަމާބެހޭ ޔުނިޓަށް އަންގާފައިވާ ކަމަށް މިނިސްޓަރު ޝަހީމް ވިދާޅުވިއެވެ.

އެ މިސްކިތަށް ނަމާދަށް ދިޔަ މީހަކު ފަށާއިރު ޕްރޮގްރާމްއަށް ކިޔައިދިން ގޮތުގައި، އީދު ނަމާދު ކޮށްފައިވަނީ ބޭރު މީހެއް ކަމަށާއި، ޚުތުބާ ކިޔާފައިވަނީ ދިވެހި ބަހުން ނޫން ކަމަށެވެ. 6:45 ގައި ތަކުބީރު ކިޔަން ފަށައި، 7:00 ގައި ތަކުބީރު ކިޔުން ހުއްޓާލި ކަމަށާއި، 7:00 ގައި ވެސް އިމާމެއް ނާންނާތީ އެކަމުގެ މަޝްވަރާތަކެއް ވެސް މިސްކިތުގެ ތެރޭގައި ކުރިއަށް ދިޔަ ކަމަށެވެ. އަދި 7:05 ހާއިރު ބޭރު މީހަކު ތެދުވެ ނަމާދު ކުރި ކަމަށް އެމީހާ ބުންޏެވެ.

އަޒީޒާ މިސްކިތަށް ގިނަ ބަޔަކު އީދު ނަމާދު ކުރުމަށް ދިޔައެވެ. މިސްކިތުގެ އެތެރެ އަދި ބޭރުގައި ވެސް ގިނަ ބަޔަކު ޖަމާއަތް ހަދައިގެން ތިއްބެވެ.