މިޔަންމާއަށް ބާރުގަދަ ބިންހެލުމެއް، ތައިލޭންޑަށް ވެސް އަސަރުކުރި
28 މާރިޗު 2025 | ހުކުރު 08:32ޔޫއެސްޖީއެސް އިން ބުނީ ފުރަތަމަ ބިންހެލުން އައިސްފައިވަނީ ހުކުރު ދުވަހުގެ މެންދުރު ފަހު 12:50 ހާއިރު ސަގައިން ސިޓީގެ ހުޅަނގު އުތުރުން 16 ކިލޯމީޓަރު (10 މޭލު) އަޑިން ކަމަށެވެ.
މިޔަންމާއަށް އައި ބާރުގަދަ ބިންހެލުމާއި ގުޅިގެން އިމާރާތެއްގެ ބައިތައް ވެއްޓިފައި
މިޔަންމާއަށް 7.7 މެގްނިޓިއުޑާއި 6.4 މެގްނިޓިއުޑްގެ ބިންހެލުމެއް އައިސްފައިވާ ކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނެފިއެވެ.
ޔޫއެސްޖީއެސް އިން ބުނީ ފުރަތަމަ ބިންހެލުން އައިސްފައިވަނީ ހުކުރު ދުވަހުގެ މެންދުރު ފަހު 12:50 ހާއިރު ސަގައިން ސިޓީގެ ހުޅަނގު އުތުރުން 16 ކިލޯމީޓަރު (10 މޭލު) އަޑިން ކަމަށެވެ.
ޗައިނާގެ ބިންހެލުމާ ބެހޭ ނެޓްވާރކް ސެންޓަރު (ސީއީއެންސީ) އިން ބުނީ ބިންހެލުމުގެ ބާރުމިނުގައި 7.9 މެގްނިޓިއުޑްގެ ބިންހެލުމެއް އައިސްފައިވާ ކަމަށާއި ސީއީއެންސީން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނެފައި ވަނީ "ޔުނާނަށް ބިންހެލުމެއް އިހުސާސް ކުރެވިފައިވާ" ކަމަށެވެ.
އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި މިޔަންމާގެ ވެރިރަށް ނެޕިޑޯގެ އިމާރާތުގެ ބައިތައް މަގުތަކަށް ވެއްޓި ދަތުރުފަތުރަށް ހުރަސްއެޅިފައިވާ ކަމަށެވެ.
މީގެ އިތުރުން ތައިލެންޑްގެ ވެރިރަށް ބެންކޮކްއަށް ބިންެހެލުމުގެ އިހުސާސް ކުރެވިގެން އުސް އިމާރާތްތަކުން މީހުން ހުސްކުރި ކަމަށެވެ. އަދި ބިންހެލުމުގެ އަސަަރާއެކު ޕޫލްތަކުގެ ފެންގަނޑު ބޭރަށް ފައިބާފައިވާ ކަމަށެވެ.
ތައިލެންޑްގެ ބޮޑުވަޒީރު ޕެޓޮންގްޓާން ޝިނަވަތުރާ ހުކުރު ދުވަހު ވިދާޅުވީ ބާރުގަދަ ބިންހެލުމަކަށް ފަހު "ކުއްލި ބައްދަލުވުމެއް" ބޭއްވުމަށް ނިންމާފައިވާ ކަމަށެވެ.
