''އީދު ހަވީރު 1446'' ނަމުގައި ޚާއްސަ ބޮޑު ހަރަކާތެއް މާލޭގައި

ފިތުރު އީދު ދުވަހާ ގުޅިގެން ''އީދު ހަވީރު 1446'' ނަމުގައި ޚާއްސަ ބޮޑު ހަރާކާތެއް މާލޭގައި ބާއްވާނެ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

ބުދަ ދުވަހު އެމްއެންޑީއެފުން ނެރުނު ބަޔާނެއްގައި ބުނީ އީދު ހަވީރު 1446 އަކީ ފިތުރު އީދުގެ އުފަލުގައި އާއިލާތައް އެކުވެރި މާހައުލެއްގައި ބައްދަލުވެ އީދު ސަލާންކޮށް، ހިތްހަމަޖެހޭ މާހައުލެއްގައި ވަގުތު ހޭދަކޮށްލުމުގެ ގޮތުން ފިތުރު އީދު ދުވަހުގެ ހަވީރު މާލޭގައި ބާއްވާ ހާއްސަ ހަރަކާތެއް ކަމަށެވެ.

Advertisement

އެމްއެންޑީއެފުން ބުނީ އީދު ހަވީރު 1446 އޮންނާނީ މާލޭ ސަލްޓަންޕާކުން ފެށިގެން އިސްލާމީ މަރުކަޒު މައިދާނާއި ޖުމްހޫރީ މައިދާނާއި ރަސްމީ ބޮޑުފާލަމުގެ ސަހަރައްހަދު ހިމެނޭހެން އެކަމަށް ތައްޔާރު ކުރެވިފައިވާ ބޮޑު ސަރަހައްދެއްގައި ކަމަށެވެ. މިސަރަހައްދުގައި އީދު ހަވީރަށް ޒިޔާރަތް ކުރާ ހުރިހާ އާއިލާތަކަށް މަޑުކޮށްލައިގެން ތިބެވޭނެ އިންތިޒާމާއި، އީދު އުފަލުގައި ބާއްވާ އެކި ކުޅިވަރުތަކުގައި ބައިވެރިވުމުގެ އިންތިޒާމް ހަމަޖެހިފައިވާނެ ކަމަށް އެމްއެންޑީއެފުން ބުނެއެވެ. އަދި މުނިފޫހިފިލުވުމުގެ ތަފާތު އައިޓަމްތަކާއި، އަދި އީދު ހަދިޔާ ދިނުން ވެސް އީދު ހަވީރުގައި ކުރިއަށްދާނެއެވެ.

ދިވެހިރާއްޖޭގެ ގައުމީ ދިފާއީ ބާރާއި، ދިވެހި ފުލުހުންގެ ޚިދުމާއި، ސަރުކާރު ހިއްސާވާ ކުންފުނިތައް ގުޅިގެން އިންތިޒާމް ކުރާ އީދު ހަވީރުގައި ބައިވެރިވުމުގެ ދައުވަތު ހުރިހާ އާއިލާތަކަށް ވަނީ ދީފައެވެ.

މީގެ އިތުރުން އެމްއެންޑީއެފުން ބުނީ މާލޭގައި މިފަދަ އީދު ހަވީރެއް ސަރުކާރުގެ އިދާރާތައް ގުޅިގެން އިންތިޒާމް ކުރުމުގެ އެންމެ ބޮޑު ބޭނުމަކީ އިސްލާމީ މި މުހިންމު މުނާސަބާގެ އުފަލުގައި ވީހައި ގިނަ ދިވެހި އާއިލާތަކެއް އެއްތަނަކުން ބައްދަލުވެ އިޖުތިމާއީ ރޫހު އާލާކުރުން ކަމަށާއި، އަދި ވަކީން ޚާއްސަކޮށް ކުޑަކުދީންނަށް އީދުގެ ހާ އުފާވެރިކަން ބޮޑަށް އިހްސާސް ކޮށްދިނުން ކަމަށެވެ. ޒަމާނުއްސުރެ ކޮންމެ އީދެއްގައި ދިވެހީންގެ މެދުގައި އޮތް އެއްބަޔަކު އަނެއް ބަޔަކާ ބައްދަލުވެ، ސަލާންގަލާންކޮށް މުނިފޫހިފިލުވައި ހަދިޔާ ބަދަލުކުރުން ފަދަ ރީތި އާދަތަކަށް ދިރުން ގެނެސްދިނުން ކަމަށް ވެސް ބަޔާނުގައި ބުނެފައިވެއެވެ.

އެމްއެންޑީއެފުން ބުނީ މިފަހަރު އީދު ހަވީރު ކުރިއަށްދާނީ ކުޑަކުދީންގެ ގަޔާވާނެ ވަރަށް ގިނަ ކަންކަން ހިމަނައިގެން ކަމަށާއި، އަދި އެކި ފަންނުވެރީންގެ ރީތި ހުށަހެޅުންތަކުގެ އިތުރުން ކުޅިވަރު ކުޅުމާއި، ޚާއްސަ އެކި ފަރާތްތަކާ ބައްދަލުވުމުގެ ހަނދާނީ ވަގުތުކޮޅުތަކާ ވެސް އެކު ކަމަށެވެ.

އީދު ހަވީރު ކުރިއަށްދާނީ ފިތުރު އީދު ދުވަހުގެ ހަވީރު 4ން 6ށެވެ. އީދު ހަވީރުގައި ބައިވެރިވުމަށް ޒިޔާރާތް ކުރާ އާއިލާތަކުން ސަލްޓަންޕާކުން ފެށިގެން ޖުމްހޫރީ މައިދާނާ ހަމައަށް އެކަމަށްޓަކައި ތައްޔާރުކޮށްފައިވާ ސަރަހައްދަށް ވަނުމުގެ އިންތިޒާމްތައް ހަމަޖެހިފައިވެއެވެ.