ޔުކްރެއިން އާއި އެމެރިކާގެ މަންދޫބުން ސައުދީގައި ބައްދަލު ކުރަނީ

ޔުކްރެއިންގެ މަންދޫބުން އަދި އެމެރިކާގެ މަންދޫބުން، ކަޅު ކަނޑުގެ ހަނގުރާމައާ ގުޅޭ ގޮތުން ސައުދީ އަރަބިއްޔާގައި ބައްދަލު ކުރުމަށް ނިންމައިފި އެވެ.

ސައުދީ އަރަބިއްޔާގައި ކުރިއަށް ދިޔަ މަޝްވަރާ ތަކުގައި ރަޝިޔާ އަދި އެމެރިކާގެ މަންދޫބުން ވަނީ ކަޅު ކަނޑުގެ ހަނގުރާމައާ ގުޅޭ ގޮތުން މަޝްވަރާކޮށް، ވާހަކަ ދައްކައި ފައެވެ.

އެއަށްފަހު، އަންގާރަ ދުވަހު ޔުކްރެއިންގެ ވަފުދާ އެކު މަޝްވަރާ ކުރުމަށް މިހާރު ވަނީ ނިންމައި ފައެވެ.

ހޯމަ ދުވަހު ރިޔާދުގައި ބޭއްވުނު ރަޝިޔާ އަދި އެމެރިކާގެ މަޝްވަރާތަކަކީ، އެމެެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން، ތިން އަހަރަށް ދެމިގެން ދިޔަ ހަނގުރާމަ ނިންމުމަށް ކުރާ މަސައްކަތުގެ ބައެއް ކަމަށް ވައިޓްހައުސް އިން ބުނެފައިވެ އެވެ.

ވައިޓް ހައުސްގެ މަސްދަރަކާ ހަވާލާދީ ބުނެފައިވާ ގޮތުގައި، މި މަޝްވަރާ ތަކުން ކުރިއެރުން ތަކެއް ވަނީ ލިބިފައެވެ. 

ރަޝިޔާގެ މަސްދަރަކުން ރޮއިޓަރސް އަށް މަޢުލޫމާތު ދިން ގޮތުގައި، ރިޔާދު ގައި ކުރިއަށް ދިޔަ މަޝްވަރާތައް ނިމި، ދެ ގައުމުން އެއްބަސްވާ ޑްރާފްޓް ބަޔާނެއް ރަޝިޔާ އަދި އެެމެރިކާ އަށް ވަނީ ފޮނުވިފައި އެވެ. 

އެހެން ނަމަވެސް، ރަޝިޔާގެ ތަރުޖަމާނު ޑިމިޓްރީ ޕެސްކޮވް ވިދާޅުވެފައި ވަނީ، އެއްވެސް ލިޔުމެއްގައި ސޮއި ނުކުރާނެ ކަމަށެވެ.

ޔުކްރެއިންގެ ރައީސް ވުލެޑިމިއަރ ޒެލެންސްކީ ހޯމަ ދުވަހުގެ ރޭ ދެއްކެވި ވާހަކަފުޅުގައި، އެ ގައުމުގެ މަންދޫބުން އެމެރިކާގެ ޓީމާ ބައްދަލު ކުރާނެ ކަމަށް ވިދާޅުވި އެވެ.

މި މަޝްވަރާތައް ކުރިއަށް ދާއިރު، ދެ ގައުމުގެ ހަމަލާތައް ވެސް ކުރިއަށް ދެއެވެ. ރަޝިޔާގެ މިސައިލް ހަމަލާއެއްގައި މަދުވެގެން 88 މީހުންނަށް އަނިޔާވި ކަމަށް ޔުކްރެއިނުން ބުނާއިރު، ޔުކްރެއިންގެ ހަމަލާއެއްގައި ދެ ނޫސްވެރިންނާއި، ޑްރައިވަރަކު މަރުވި ކަމަށް ރަޝިޔާ އިން ބުނެފައިވެ އެވެ.