މި އަހަރުގެ ހައްޖު ކިޔުގައި ތިބި އެންމެނަަށް ހައްޖުގެ އަޅުކަމަށް ދެވޭނެ ކަމަށް ވިދާޅުވެ، މިނިސްޓަރު ޝަހީމް ކުރެއްވި ޕޯސްޓު ޑިލީޓް، އެޕޯސްޓް ފަހުން ކުރެއްވީ ރައީސް މުއިއްޒު
24 މާރިޗު 2025 | ހޯމަ 07:09މިއީ ޒަމާންތަކަކަށް ފަހު, އެއަހަރެއްގައި ކިއުގައި ޖެހިފައިތިބި އެންމެނަށް އެއަހަރު ހައްޖަށް ދެވޭ ފުރަތަމަ ފަހަރު
ރައީސް ޑރ.މުހައްމަދު މުއިއްޒު
މި އަހަރުގެ ހައްޖު ކިޔުގައި ތިބި އެންމެނަަށް ހައްޖުގެ އަޅުކަމަށް ދެވޭނެ ކަމަށް ވިދާޅުވެ، އިސްލާމިކް މިނިސްޓަރު ޑރ.ޝަހީމް އަލީ ސައީދު އެކްސްގައި ކުރެއްވި ޕޯސްޓު ޑިލިޓްކޮށް، އެޕޯސްޓް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެކްސްގައި އާއްމު ކުރައްވައިފި އެވެ.
އާދިއްތަ ދުވަހުގެ ރޭ މިނިސްޓަރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ 2025 ގައި ހައްޖަށް ދެވޭނެ ކަމަށް ކޯޕަރޭޝަންގެ ކިއުގައި ތިބި އެންމެހައި ފަރާތްތަކަށް މިއަހަރު ހައްޖަށް ދެވޭނެ ކަމަށާއި، މިއީ ޒަމާންތަކަކަށް ފަހު, އެއަހަރެއްގައި ކިއުގައި ޖެހިފައިތިބި އެންމެނަށް އެއަހަރު ހައްޖަށް ދެވޭ ފުރަތަމަ ފަހަރު ކަމަށެވެ.
ހަމަ މި މެސެޖް އިސްލާމިކް މިނިސްޓްރީގެ ވަޓްސްއެޕް ގުރޫޕްގައި ވެސް މިނިސްޓަރު ޝަހީމް ލިޔުއްވާފައިވެއެވެ. ނަމަވެސް އާދިއްތަ ދުވަހުގެ ރޭ ދަންވަރު 1:55 ގައި ޑިލިޓް ކުރައްވާފައެވެ. އަދި 3:05 ގައި ރައީސް މުއިއްޒު އެކްސްގައި ކުރައްވާފައިވާ ޕޯސްޓުގެ ލިންކް ގުރޫޕްގައި ހިއްސާ ކުރައްވާފައިވެއެވެ.
މިނިސްޓަރު ޝަހީމް އެކްސްގައި ކުރެއްވި ޕޯސްޓާއި، ވަޓްސްއަޕް ގުރޫޕްގައި ލިޔުއްވި މެސެޖް ޑިލީޓް ކުރެއްވުމާއި ގުޅިގެން ގިނަ ބައެއްގެ ފާޑު ކިޔުން ސަރުކާރަށް ވަނީ އަމާޒުވެފައެވެ. އަދި މިނިސްޓަރު ޝަހީމްގެ ބުރަ މަސައްކަތްތަކުގެ ކްރެޑިޓް ރައީސް މުއިއްޒު ނެންގެވީ ކަމަށް ގިނަ ބަޔަކު ދަނީ ބުނަމުންނެވެ.
އާއްމުކޮށް ރާއްޖެއަށް ސައޫދީ ސަރުކާރުން ދޫކުރަނީ 1000 ކޯޓާއެވެ. ކިޔޫގައި ތިބި މީހުންގެ ތެރެއިން މި އަހަރު ހައްޖަށް ގެންދިޔުމަށް ކަނޑައަޅާފައި ވަނީ 850 މީހުންނެވެ.
ހައްޖު ކިޔުއާ ގުޅޭގޮތުން އިސްލާމިކް މިނިސްޓަރު ޑރ.ޝަހީމް އަލީ ސައީދު ކުރެއްވި ޕޯސްޓް
އާއްމުކޮށް ރާއްޖެއަށް ސައޫދީ ސަރުކާރުން ދޫކުރަނީ 1000 ކޯޓާއެވެ. ސައޫދީ ސަރުކާރުން ކޯޓާ ދޫކުރަނީ ގައުމެއްގައި ދިރިއުޅޭ މުސްލިމުންގެ އާބާދީއަށް ބެލުމަށްފަހުއެވެ. ނަމަވެސް ރާއްޖެއަށް ލިބޭ ހައްޖު ކޯޓާ އިތުރު ކުރުމަށް މަސައްކަތް ކުރައްވާނެ ކަމަށް މީގެ ކުރިން މިނިސްޓަރު ޝާހީމް ވިދާޅުވެފައިވެ އެވެ.
ހައްޖު ކޯޕްރޭޝަންގެ ހަވާލުގައި ހައްޖަށް މީހުން ގެންގޮސްފައިވާ ގޮތަށް ބަލާއިރު، 2015 ވަނަ އަހަރު 1290، 2016 ވަނަ އަހަރު 1000، 2017 ވަނަ އަހަރު 1025، 2018 ވަނަ އަހަރު 950، 2019 ވަނަ އަހަރު 1051، 2022 ވަނަ އަހަރު 458، 2023 ވަނަ އަހަރު 880 އަދި 2024 ވަނަ އަހަރު 1150 ހައްޖާޖީން ގެންގޮސްފައިވެ އެވެ.
