ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލާގައި އިތުރު އިމިގްރޭޝަން އޮފިސަރެއް ހައްޔަރުކޮށް، މިމައްސަލާގައި ހައްޔަރުކޮށްފައިވާ އެންމެންގެ ވަނަވަރު އާއްމުކޮށްފި އެވެ.

ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝައްމާންގެ އަމުރަށް 530،000 (ފަސްލައްކަ ތިރީސް ހާސް) ދިވެހި ރުފިޔާއާއެކު ބިދޭސީއެއް ދޫކޮށްލި މައްސަލައެއްގައި މިހާތަނަށް 5 މީހަކު ހައްޔަރުކޮށްފައިވެ އެވެ.

މި މައްސަލައާ ގުޅިގެން ފުލުހުން ބުނީ އިމިގްރޭޝަންގެ ބައެއް މުވައްޒަފުންގެ މަގާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމަށް ތުހުމަތު ކުރެވޭ މައްސަލައާ ގުލިގެން 20 މާރިޗް 2025 ވަނަ ދުވަހުގެ ރޭ ހައްޔަރު ކޮށްފައިވަނީ ތ ބުރުނި/މޫނިމާ، 21 އަހަރުގެ މުހައްމަދު އަލްސަން އިސްމާއީލް، މާލެ/ގ.ހެޕީސައިޑް، 37 އަހަރުގެ އިބްރާހިމް އަހުމަދު އަދި މާލެ/ގ ހެޕީސައިޑް، 47 އަހަރުގެ ހަސަން ސަހެޝާން ކަމަށެވެ.

ކުރީގެ ކޮންޓްރޯލަރ ޖެނެރަލް ޝަމްއާން 21 މާރިޗް 2025ގައި ހައްޔަރުކޮށްފައިވާއިރު، މާލެ/ހަޒާރީވިލާ، 40 އަހަރުގެ އަހުމަދު ލައްސާން 23 މާރިޗް 2025 ގައި ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށް ފުލުހުން ބުނެ އެވެ.

މީގެ އިތުރުން ފުލުހުން ބުނީ މިމައްސަލައާ ގުޅިގެން ކޯޓު އަމުރެއްގެ ދަށުން ދެ މީހަކު ފުރުން ވަނީ މަނާކޮށްފައިވާ ކަމަށެވެ. އަދި ޝަމްއާންގެ އާއިލާ މެންބަރެއްގެ ފޯނު ވެސް ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

ޝައްމާންގެ އަމުރަށް، 530،000 ދިވެހި ރުފިޔާއާއެކު ބިދޭސީއެއް ދޫކޮށްލާފައިވާ މިމައްސަލާ ގުޅިގެން ޝައްމާން ދިރިއުޅޭ ގެ ވެސް ފުލުހުން ބަލާ ފާސްކޮށްފައިވެއެވެ. އަދި އެގެއިން ގިނަ އަދަދެއްގެ ފައިސާގެ އިތުރުން އިލެކްޓްރޯނިކް ސާމާނުތަކެއް ފުލުހުންގެ ބެލެމުގެ ދަށަށް ގެންގޮސްފައިވެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.