ޕެނަލްޓީގައި ކުރި ހޯދައި، ސްޕެއިން ސެމީ ފައިނަަލަށް

ޔުއެފާ ނޭޝަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި، ޕެނަލްޓީ ޖަހައިގެން ނެދަލެންޑްސް ބަލިކޮށް ސްޕެއިން އިން މުބާރާތުގެ ސެމީ ފައިނަލްގެ ފުރުސަތު ހޯދައިފި އެވެ.

ކުއާޓާ ފައިނަލްގެ ފުރަތަމަ ލެގުގައި މި ދެ ޓީމު ބައްދަލު ކުރި މެެޗު ވަނީ 2-2 އިން އެއްވަރުވެފަ އެވެ. އާދީއްތަ ދުވަހުގެ ރޭ ކުޅުނު ދެ ވަނަ ލެގުގެ ފުރިހަމަ ވަގުތު ހަމަވީއިރު ދެ ޓީމު ވަނީ 3-3 އިން އެއްވަރުވެފަ އެވެ. ނަތީޖާ ނެރުމަށް ޖެހި ޕެނަލްޓީގައި ސްޕެއިން އިން ވަނީ 5-4 އިން ނެދަލެންޑްސް ބަލިކޮށްފަ އެވެ.

މެޗު ފަށައިގެން އަށް ވަނަ މިނެޓުގައި ސްޕެއިން އަށް ލިބުނު ޕެނަލްޓީ ކާމިޔާބުކޮށް ކުރި ހޯދައިދިނީ މިކޭލް އޮޔަޒަބާލް އެވެ. އޭގެ ފަހުން މެޗުގެ ދެ ވަނަ ހާފުގެ ކުރީ ކޮޅު ނެދަލެންޑްްސް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ މެމްފިސް ޑިޕާއީ އެވެ.

ނަމަވެސް، މެޗުގެ 67 ވަނަ މިނެޓުގައި އޮޒަޔަބާލް ޖެހި ދެ ވަނަ ލަނޑާ އެކު، ސްޕެއިން އިން ވަނީ ދެ ވަނަ ފަހަރަށް މެޗުގައި ލީޑު ނަގައިފަ އެވެ. އޭގެ ފަހުން މެޗުގެ 79 ވަނަ މިނެޓުގައި ދެ ވަނަ ފަހަރަށް ނެދަލެންޑްސް އަށް ނަތީޖާ ހަމަހަމަ ކޮށްދިނީ، އިއާން މާސްޓްސެން އެވެ.

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮުތުމުން، 15 މިނެޓުގެ ދެ ހާފު ވަނީ ކުޅެފަ އެވެ. މި ހާފުގައި ލަމީން ޔަމާލް ޖެހި ލަނޑުން ސްޕެއިން ކުރި ހޯދި ނަމަވެސް، ޒަވީ ސިމޮންސް ޖެހި ޕެނަލްޓީ އިން ނެދަލެންޑްސް ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ނަތީޖާ ނެރުމަށް ޖެހި ހަ ޕެނަލްޓީގެ ތެރެއިން، ސްޕެއިން އިން ވަނީ ފަސް ޕެނަލްޓީ ކާމިޔާބު ކޮށްފަ އެވެ. އެއީ މިކޭލް މެރީނޯ، ފެރާން ޓޮރޭސް، އެލެއިކްސް ގާސިއާ، އެލެއިކްސް ބައެނާ އަދި ޕެޑްރީގެ ޕެނަލްޓީ އެވެ. ޔަމާލްގެ ޕެނަލްޓީ ވަނީ ނާކާމިޔާބުވެފައި އެވެ.

ހަ ޕެނަލްޓީގެ ތެރެއިން ނެދަލެންޑްސް އަށް ކާމިޔާބު ކުރެވުނީ ހަތަރު ޕެނަލްޓީ އެވެ. އެއީ ވާޖިލް ވެން ޑައިކް، ޓެއުން ކޫޕްމެއިނާސް، ޒަވީ ސިމޮންސް އަދި ކެނެތު ޓޭލާގެ ޕެނަލްޓީ އެވެ. އެ ޓީމުގެ ނޯ ލަންގް އަދި ޑޮންޔެލް މާލެންގެ ޕެނަލްޓީ ވަނީ ނާކާމިޔާބުވެފައި އެވެ.

ސްޕެއިން އަކީ ނޭޝަންސް ލީގުގެ އެންމެ ފަހުގެ ޗެމްޕިއަނުންނެވެ. އެ ޓީމުން ވަނީ 2023 ވަނަ އަހަރުގެ ނޭޝަންސް ލީގުގެ ފައިނަލްގައި ކްރޮއޭޝިއާ ބަލިކޮށް، މުބާރާތް ކާމިޔާބު ކޮށްފަ އެވެ.