ދެ ވަނަ ލެގުން މޮޅުވެ، ޕޯޗުގަލް ސެމީ ފައިނަލަށް

ޔުއެފާ ނޭޝަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި ޑެންމާކުގެ މައްޗަށް ކުރި ހޯދައި، ޕޯޗުގަލް އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

މި ދެ ޓީމު ކުޅުނު ކުއާޓާ ފައިނަލްގެ ފުރަތަމަ ލެގު ޑެންމާކުން ވަނީ 1-0 އިން ކާމިޔާބު ކޮށްފަ އެވެ. އެހެންވެ، މުބާރާތުގެ ސެމީ ފައިނަލްގެ ޖާގަ ހޯދުމަށް ޕޯޗުގަލް އަށް އޮތީ މޮޅުވާން މަޖުބޫރުވެފަ އެވެ.

ޑެންމާކާ ދެކޮޅަށް އާދީއްތަ ދުވަހުގެ ރޭ ކުޅުނު ކުއާޓާ ފައިނަލްގެ ދެ ވަނަ ލެގު ޕޯޗުގަލް އިން ކާމިޔާބު ކުރީ 5-2 އިންނެވެ.

މެޗު ފަށައިގެން ހަ ވަނަ މިނެޓުގައި ޕޯޗުގަލް އަށް ލީޑު ނަގައިދޭން ލިބުނު ފުރުސަތުގައި ކެޕްޓަން ކްރިސްޓިއާނޯ ރޮނާލްޑޯ ފޮނުވާލި ޕެނަލްޓީ ކާމިޔާބެއް ނުވި އެވެ. އޭގެ ފަހުން ފުރަތަމަ ހާފުގެ 38 ވަނަ މިނެޓުގައި ޕޯޗުގަލް އަށް ލީޑު ލިބުނީ ޑެންމާކުގެ ޖޯޝިމް ހެންޑަސަން އަތުން ބައި ކޮޅަށް ވަތް ލަނޑުންނެވެ.

މެޗުގެ ދެ ވަނަ ހާފުގައި ރަސްމުސް ކްރިސްޓެންސެން ޖެހި ލަނޑުން، ޑެންމާކުން ވަނީ މެޗުގެ ނަތީޖާ ހަމަހަމަކޮށްފަ އެވެ. އޭގެ ފަހުން ދެ ވަނަ ފަހަރަށް ޕޯޗުގަލް އަށް ކުރި ހޯދައިދިނީ ރޮނާލްޑޯ އެވެ.

އޭގެ ހަތަރު މިނެޓު ފަހުން، ދެ ވަނަ ފަހަރަށް ޑެންމާކަށް ނަތީޖާ ހަމަހަމަކޮށް، އެގްރިގޭޓް އިން ކުރި ހޯދައިދިނީ ކްރިސްޓިއަން އެރިކްސަން އެވެ. ނަމަވެސް މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، ފްރަންސިސްކޯ ޓްރިކާއޯ ޖެހި ލަނޑުން ޕޯޗުގަލް ވަނީ މެޗުގައި ލީޑު ނަަގައި، އެގްރިގޭޓް ނަތީޖާ ހަމަހަމަ ކޮށްފަ އެވެ.

އިތުރު ވަގުތުގެ ގޮތުގައި ކުޅުނު 15 މިނެޓުގެ ދެ ހާފުގައި ޕޯޗުގަލް އިން ވަނީ އިތުރު ދެ ލަނޑު ޖަހައިގެން މެޗުން މޮޅުވެފަ އެވެ. އެއީ ޓްރިކާއޯ ޖެހި ލަނޑާއި، ގޮންޒާލޯ ރާމޯސް ޖެހި ލަނޑުންނެވެ.

ޕޯޗުގަލް އިން ވަނީ 2019 ވަނަ އަހަރު އޮތް ޔުއެފާ ނޭޝަންސް ލީގު ކާމިޔާބު ވެސް ކޮށްފަ އެވެ.