ޖަލުގައި ދަންޖެހިފައި ހުއްޓާ ފެނުނު ޝަމްވީލާއި މެދު އިހުމާލުވެފައިވާ ކަމަށް ޤަބޫލުކުރެވޭ - އާއިލާ
23 މާރިޗު 2025 | އާދީއްތަ 16:51މީގެ ކުރިން އޭނާ ދަންޖެހެން މަސައްކަތް ކުރިތޯ ނުވަތަ ނޫންތޯ އަދި ވަނީ ސާފުވާގޮތް ނުވެފަ
މާފުށި ޖަލު
މާފުށީ ޖަލުގައި ގައިދީއަކު ދަންޖެހިގެން މަރުވި ގައިދީ އާއި މެދު އިހުމާލުވެފައިވާ ކަމަށް ޤަބޫލުކުރެވޭ ކަމަށް އޭނާގެ އާއިލާ އިން ތުހުމަތުކޮށްފިއެވެ.
ކަރެކްޝަންސް އިން މައުލޫމާތު ދިން ގޮތުގައި މަރުވެފައި ވަނީ ސ. މަރަދޫ / ފޯ ފްލާވަރ އިބްރާހިމް ޝަމްވީލް (23 އަހަރު) އެވެ.
ކަރެކްޝަންސް އިން ބުނީ، 23 މާރޗް ވީ އާދިއްތަ ދުވަހު ހަވީރު 4:20 ހާއިރު އިބްރާހިމް ޝަމްވީލްގެ ގޮޅީގައި ދަންޖެހިފައި ހުއްޓާ ފެނިފައިވާ ކަމަށެވެ. އަދި އޭނާ ވަގުތުން މާފުށީ ހޮސްޕިޓަލަށް ގެންގޮސްފައިވާ ކަމަށް ކަރެކްޝަންސް އިން ވަނީ ބުނެފައެވެ. އާދިއްތަ ދުވަހުގެ 4:55 ގައި އިބްރާހިމް ޝަމްވީލް ނިޔާވެފައިވާކަމަށް ޑޮކްޓަރު ކަނޑައަޅާފައިވާ ކަމަށް ވެސް ކަރެކްޝަންސް އިން ވަނީ ބުނެފައެވެ.
ޝަމްވީލްގެ ހަށިގަނޑު މިހާރު މާލެ ގެނެސްފައިވާއިރު އޭނާގެ އާއިލާގެ ފަރާތުން ރާއްޖެއެމްވީ އަށް މައުލޫމާތުދެމުން ބުނީ ޝަމްވީލް އަކީ ނަފްސާނީ މައްސަލަ ހުންނަ މީހެއް ކަމަށެވެ. އެކަން އޭނާ އަށް ޙުކުމް ކުރި އިރު ވެސް ކަމާއި ބެހޭ ފަރާތްތަކުގެ ސަމާލުކަމަށް ގެނެސްފައިވާނެ ކަމަށް އާއިލާ އިން ވަނީ ބުނެފައެވެ. އެހެންނަމަވެސް އޭނާ އާއި މެދު ބަހައްޓަން ޖެހޭ ސަމާލުކަން ކަރެކްޝަންސް އިން ނުބަހައްޓާ ކަމަށް އާއިލާ އިން ތުހުމަތުކުރެއެވެ.
ނަން ހާމަ ނުކުރުމަށް ޝަރުތުކޮށް އޭނާގެ އާއިލާ މީހަކު މި ނޫހަށް ކިޔާ ދިން ގޮތުގައި އޭނާ ޖަލުހުކުމް ތަންފީޒްކުރަން ފެށި އިރު ވެސް އޭނާ އެކަހެރިކޮށްފައި ބެހެއްޓި ކަމަށް އާއިލާ އަށް ވަނީ މައުލޫމާތު ލިބިފައެވެ. އަދި ފަހުން އެހެން ގައިދީންނާއި އެކު ޝަމްވީލް ބަހައްޓާފައި ހުރުމަށް ފަހު އަނެއްކާވެސް އޭނާ އެކަހެރިކޮށްފައިވާ ކަމަށް އާއިލާ އިން ބުނެއެވެ. ނަމަވެސް އެކަން ހިނގި ތާރީހުތައް ނޭނގޭ ކަމަށް އާއިލާ އިން ވަނީ ބުނެފައެވެ. އެއީ އޭނާ ފަދަ ނަފްސާނީ މީހަކާއި މެދު އަމަލުކުރަން އެންމެ ރަނގަޅު ގޮތް ނޫން ކަމަށް އާއިލާ އިން ބުނެއެވެ.
އާއިލާ އިން ވަނީ އޭނާ މީގެ ކުރިން ދަން ޖެހެން އުޅުނު ކަމަށް އިތުބާރު ހުރި މަސްދަރަކުން އެނގިފައިވާ ކަމަށް ބުނެފައެވެ. ނަމަވެސް އެއިން އެއްވެސް ކަމެއް އާއިލާ އަށް އަންގާފައި ނުވާ ކަމަށް ޝަމްވީލްގެ އާއިލާ އިން ބުނެއެވެ.
ޝާމިލް އެކަހެރިކޮށްފައި ވޭތޯ ބެލުމަށް ކަރެކްޝަންސް އާއި ރާއްޖެއެމްވީން ކުރި ސުވާލަށް އަދި ޖަވާބު ލިބިފަ އެއް ނުވެއެވެ. އަދި މީގެ ކުރިން އޭނާ ދަންޖެހެން މަސައްކަތް ކުރިތޯ ނުވަތަ ނޫންތޯ އަދި ވަނީ ސާފުވާގޮތް ނުވެފައެވެ. އެހެންނަމަވެސް ޝަމްވީލް ދަންޖެހިފައި ހުއްޓާ ފެނުމުން އޮންނަ އުސޫލާއި އެއްގޮތަށް ހުރިހާ އިދާރާއަކަށް އަންގާފައި ވާނެ ކަމަށް ކަރެކްޝަންސް އިން ވަނީ ބުނެފައެވެ.
ޝަމްވީލް އަކީ މީހެއްގެ ފުރާނައަށް ގެއްލުމެއް ދީފާނެކަމުގެ ބިރުދައްކާ އެފަދަކަމެއް ކޮށްފާނެ ކަމުގެ ކުށުގައި 1 އަހަރާއި 6 މަސް ދުވަހުގެ ޙުކުމެއް ތަންފީޛުކުރަމުން ދިޔަ މީހެކެވެ.
އިބްރާހިމް ޝަމްވީލް މަރުވުމާއި ގުޅިގެން ކަރެކްޝަންސް އިން ވަނީ ވަގުތުން އެކަން މޯލްޑިވްސް ޕޮލިސް ސަރވިސް އަށާއި އޭނާގެ ޢާއިލާގެ އިތުރުން އިންސްޕެކްޓަރ އޮފް ކަރެކްޝަނަލް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށާއި ނެޝަނަލް އިންޓަރގްރިޓީ ކޮމިޝަން އަށް އަންގާފައެވެ.
