އިސްރާއީލުން، ހަމާސްގެ ސިޔާސީ ލީޑަރު ޝަހީދު ކޮށްލައިފި
23 މާރިޗު 2025 | އާދީއްތަ 09:44ހަމާސް އިން ބުނާ ގޮތުގައި، ބާދަވީލް އަދި އޭނާގެ އަނބިކަނބަލުން ޝަހީދުވީ ޚާން ޔޫނިސްގައި ހުރި ޓެންޓް ހިޔާވަހި ކަމެއްގައި ނަމާދު ކުރަމުން ދަނިކޮށް.
އިސްރާއީލުން ވައިގެ ހަމަލާގައި ޝަހީދުވީ ފަލަސްތީނު ރައްޔިތުންގެ ހަށިގަނޑުތައް އުފުލާ މަންޒަރު
އިސްރާއީލްގެ އަސްކަރިއްޔާ އިން ދިން ހަމަލާއެއްގައި، ހަމާސް ޖަމާއަތުގެ ސިޔާސީ ލީޑަރު ޞަލާޙު އަލް-ބާދަވީލް ޝަހީދު ކޮށްލައިފި އެވެ.
ހަމާސްގެ އޮފިޝަލަކު ހާމަކޮށްފައިވާ ގޮތުގައި އިސްރާއީލުން ދެކުނު ޣައްޒާގައި ދިން ވައިގެ ހަމަލާއެއްގައި، އެ ޖަމާއަތުގެ ސިޔާސީ ލީޑަރު ވަނީ ޝަހީދުވެފަ އެވެ.
މިއީ އިސްރާއީލުން މިދިޔަ ހަފްތާގައި ފެށި ހަނގުރާމައިގެ އޮޕަރޭޝަން އިތުރަށް ހަރުދަނާ ކުރަމުންދާ ވަގުތެއްގައި ހިނގި ކަމެކެވެ. ހަމާސް މީޑިއާ އިން ބުނާ ގޮތުގައި، ޚާން ޔޫނިސްގައި ދިން ވައިގެ ހަމަލާގައި ބާދަވީލް އަދި އޭނާގެ އަނބިކަނބަލުން ވަނީ ޝަހީދުވެފަ އެވެ.
މިކަމާ ގުޅޭ ގޮތުން އިސްރާއީލްގެ އޮފިޝަލުން މިހާތަނަށް އެއްވެސް ބަހެއް ބުނެފައި ނުވެ އެވެ. މީގެ ކުރިން، ދެމަސް ވަންދެން އޮތް ހަމަ ހިމޭންކަމަށް ފަހު، އިސްރާއީލުން އަނެއްކާ ވެސް ވަނީ ހަނގުރާމައިގެ އޮޕަރޭޝަންތައް ފަށާފައި އެވެ.
އާދީއްތަ ދުވަހު ހެނދުނު، ޣައްޒާގެ އުތުރާއި، މެދުތެރެ އަދި ދެކުނުގައި ވަނީ ގިނަ އަދަދެއްގެ ގޮވުންތަކެއް ގޮއްވާލައިފަ އެވެ. ސިއްހީ އިދާރާ ތަކުން ބުނާ ގޮތުގައި، މިއަދު އެކަނި ރަފަހު އަދި ޚާން ޔޫނިސްގައި ދިން ހަމަލާތަކުގައި މަދުވެގެން ފަލަސްތީނުގެ 18 ރައްޔިތުން ވަނީ ޝަހީދުވެފައި އެވެ.
ހަމާސް އިން ބުނާ ގޮތުގައި، ބާދަވީލް އަދި އޭނާގެ އަނބިކަނބަލުން ޝަހީދުވީ ޚާން ޔޫނިސްގައި ހުރި ޓެންޓް ހިޔާވަހި ކަމެއްގައި ނަމާދު ކުރަމުން ދަނިކޮށެވެ.
އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވަނީ މި ހަނގުރާމައިގެ މައިގަނޑު މަޤްސަދަކީ ހަމާސް ނައްތާލުން ކަމުގައި ތަކުރާރުކޮށް ބުނެފައި އެވެ.
މިހާތަނަށް މި ހަނގުރާމައިގައި 49،000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައި އެވެ. އަދި ސަތޭކަ ހާހަށް ވުރެ ގިނަ ރައްޔިތުންގެ ގެދޮރު ގެއްލި، ޓެންޓުތަކާއި ވަގުތީ ހިޔާވަހިކަމުގައި ދިރިއުޅެމުންދެ އެވެ.
ޢަރަބި އަދި ޔޫރަޕުގެ ޤައުމުތަކުން އަންނަނީ ހަނގުރާމަ ހުއްޓާލުމަށް ގޮވާލަމުންނެވެ.
