ރަޝިޔާ އޮތީ މަޝްވަރާތަކުން ކުރިއެރުމެއް ލިބޭނެ ކަމުގެ އުންމީދުގައި
ހޯމަ ދުވަހު ސައުދީގައި ބޭއްވުމަށް ހަމަޖެހިފައިވާ މަޝްވަރާގައި، ކުރިއެރުންތަކެއް ލިބޭނެ ކަމަށް އެ ޤައުމުން އުންމީދު ކުރާ ކަމަށާއި، މަޝްވަރާތަކަށް މަރުޙަބާ ކިޔާނެ ކަމަށެވެ.
ރަޝިޔާ އަދި ޔުކްރެެއިންގެ ދިދަ ފެންނަ ފޮޓޯއެއް
ސައުދީ އަރަބިއްޔާގައި ބޭއްވުމަށް ހަމަޖެހިފައިވާ މަޝްވަރާތަކުން ކުރިއެރުމެއް ލިބޭނެ ކަމުގެ އުންމީދު ތިބި ކަމަށް އެ ޤައުމުން ހާމަކޮށްފި އެވެ.
މަޝްވަރާތަކުގައި ބައިވެރިވާ ރަޝިޔާގެ މަންދޫބަކު ބުނެފައިވާ ގޮތުގައި، ހޯމަ ދުވަހު ސައުދީގައި ބޭއްވުމަށް ހަމަޖެހިފައިވާ މަޝްވަރާގައި، ކުރިއެރުންތަކެއް ލިބޭނެ ކަމަށް އެ ޤައުމުން އުންމީދު ކުރާ ކަމަށާއި، މަޝްވަރާތަކަށް މަރުޙަބާ ކިޔާނެ ކަމަށެވެ.
އެ މަޝްވަރާތަކާ އެކު އެކީގައި، އެމެރިކާ އިން ރަޝިޔާ-ޔުކްރެއިން ހަނގުރާމަ ހުއްޓުވުމަށް ވަކި މަޝްވަރާތަކެއް ކުރިއަށް ގެންދާނެ އެވެ.
ޔުކްރެއިން އަދި އެމެރިކާ އިން ހުށަހެޅި 30 ދުވަހުގެ ހަނގުރާމަ ހުއްޓާލުމުގެ ހުށަހެޅުން ރަޝިޔާ އިން އަދި ބަލައިގެންފައެއް ނުވެ އެވެ. އޭގެ ބަދަލުގައި ރަޝިޔާ އިން ހުށަހަޅާފައ ިވަނީ، ހަމައެކަނި ހަކަތައިގެ ވަސީލަތްތަކަށް ދެމުން ގެންދާ ވައިގެ ހަމަލާތައް ހުއްޓާލުމަށެވެ.
ރަޝިޔާގެ ފަރާތުން މަޝްވަރާތަ ކުގައި ބައިވެރިވާ ސެނެޓަރު ގްރިގޮރީ ކަރަސިން، މިނިސްޓްރީ އޮފް ޑިފެންސްގެ ޓީވީ ޗެނަލް ޒުވެޒްދާ އަށް ވިދާޅުވީ އެބޭފުޅުންނަށް "ކޮންމެވެސް ވަރެއްގެ ކުރިއެރުމެއް" ހޯދޭނެ ކަމުގެ އުންމީދު އޮތް ކަމަށެވެ.
މަޝްވަރާތަކަށް ރަޝިޔާ އިން ފޮނުވާ މަންދޫބުންގެ ގޮތުގައި ކަރަސިން އާއި އެފްއެސްބީގެ ލަފާދޭ ފަރާތެއް ކަމަށްވާ ސާގޭ ބެސެދާ ހަމަޖެއްސުމާ މެދު އޮތީ ސުވާލު އުފެދިފައި އެވެ.
އެއީ މި ދެ ފަރާތަކީ ވެސް ފޮރިން އަދި ޑިފެންސް މިނިސްޓްރީ ތަކުން ބޭރުގެ ފަރާތްތަކެއް ކަމަށްވާތީ އެވެ.
މަޝްވަރާތައް ފެށުމަށް ހަމަޖެހިފައިވަނީ ހޯމަ ދުވަހު އެވެ. އެ މަޝްވަރާތަކުގައި ބައިވެރިވާ ރަޝިޔާގެ މަންދޫބުން ސައުދީ އަށް ފުރާނީ އާދީއްތަ ދުވަހު އެވެ. އަދި މަޝްވަރާ އަށް ފަހު، އަންގާރަ ދުވަހު އެނބުރި ޤައުމަށް އަންނާނެ އެވެ.
