ޑެޕިއުޓީ މޭޔަރގެ ޕޯސްޓެއްގައި އިމްލާ ކުށް ގިނަވުމުން އާއްމުންގެ ފާޑުކިޔުން އަމާޒުވެއްޖެ
22 މާރިޗު 2025 | ހޮނިހިރު 19:42އަރީޝްގެ ޕޯސްޓަށް ކޮމެންޓް މީހަކު ބުނެފައި ވަނީ ދިވެހިބަހުން ކުށްނުލާ ދެ ފޮޅުވަތް ލިޔެލަން ޑެޕިއުޓީ މޭޔަރަށް ނޭނގޭ ކަމަށް
މާލެ ސިޓީގެ މާފަންނު ހުޅަނގު އުތުރު ދާއިރާގެ ކައުންސިލް މެމްބަރު މުހައްމަދު އަރީސް: މާލެ ސިޓީގެ އައު ޑެޕިއުޓީ މޭޔަރ 16-03-2025
މާލެ ސިޓީގެ އައު ޑެޕިއުޓީ މޭޔަރ އަރީޝް މީސްމީޑިއާގައި ކުރި ޕޯސްޓެއް ދިވެހި ބަހުން ލިޔެފައި ހުރި އިރު، ގިނަ އިމްލާ ކުށްތަކެއް އެ ޕޯސްޓްގައި ހިމެނޭތީ އެނާ އަށް އާއްމުންގެ ފާޑުކިޔުން އަމާޒުވެއްޖެއެވެ.
އޭނާ އެކްސްގައި ކުރެއްވި ޕޯސްޓެއްގައި ލިޔެފައި ވަނީ " އީދައް މާލެ ސިޓީ ،ވިލިމާލެ އަދި ހުޅުމާލެގަ ކުލަބޮކި ޖަހާ މުޅި މާލެ އޭރިޔާ ދިއްލާލުން މީ މާލެސިޓީ ގަ މޭޔަރަކައް ރައީސް ޑރ. މުޙައްމަދު މުޢިއްޒު ހުންނެވިއިރު ވަރައް ކުލަގަދަކޮއް ކުރައްވަމުން ގެންދެވި މަސައްކަތެއް. އޭރުގެ ސަރުކާރުގެ އުންދަގޫތަކާ ކުރި ދުއްތުރާ ތަކުގެ ތެރޭން ވެސް ކާމިޔާބު ކަންމަތީ ކުރި ޗާލު ކަމެއް.. އަނެއްކާވެސް ކުރިއައް މިދަނީ ސަރުކާރުން ސީދާ ރައީސް ޑރ. މުޙައްމަދު މުޢިއްޒު ގެ އިރުޝާދުގެ ދަށުން މިކަން ފަށަން ސިޓީސް މިނިސްޓްރީއިން ނިކުންތަން. އަޅުގަންޑުމެން މާލެސިޓީ ކައުންސިލް އާ ކުރެވުނު މަޝްވަރާ ތަކައް ފަހު އަޅުގަންޑުމެން ވެސް އެހީތެރިކަން އޮނަނާނެ ވާހަކަ މިނިސްޓަރ އައް ދެންނެވިން" މިފަދައިންނެވެ.
އެ ޕޯސްޓާއި ގުޅިގެން ނޫސްވެރިޔާ އާދަމް ނަވާޒް އެކްސްގައި ކުރި ޕޯސްޓެއް ބުނެފައި ވަނީ އޭނާ އަކީ ދިވެހިބަސް މާމޮޅަށް އެނގޭ މީހެއް ނޫން ކަމަށެވެ. އެހެންނަމަވެސް ދިވެހިރާއްޖޭގެ ވެރިރަށުގެ ޑެޕިއުޓީ މޭޔަރަށް ތާނައިން ލިޔަން ނޭނގޭނަމަ އެކަން ކުރަން މުވައްޒަފަކު ހޯދަންވީނުންތޯ އޭނާ ވަނީ ސުވާލުކޮށްފައެވެ.
އިތުރު މީހަކު ކުރި ޕޯސްޓެއްގައި ބުނެފައި ވަނީ " އެކޮޔެ. ތިޔަ ލިޔުމުގައި ތިއޮތީ ހުސް "ކުށް". ލަދުން ބޯހަލާކު. ކީއްކުރާނީ މާލޭ ޑެޕިއުޓީ މޭޔަރު ވިއްޔާ." މިފަދައިންނެވެ.
އެ ޕޯސްޓަށް ކޮމެންޓް ކުރި އިތުރު މީހަކު ބުނެފައި ވަނީ ދިވެހިބަހުން ކުށްނުލާ ދެ ފޮޅުވަތް ލިޔެލަން ޑެޕިއުޓީ މޭޔަރަށް ނޭނގޭ ކަމަށެވެ. އިތުރު މީހުން ވެސް ވަނީ ޑެޕިއުޓީ މޭޔަރގެ ލިޔުމެއްގައި ކުށް ނުފިލުވާ އާއްމުންނާއި ހިއްސާ ކުރުމުން އެކަމަށް ފާޑުކިޔާފައެވެ.
އަރީޝް ޑެޕިއުޓީ މޭޔަރ ކަމަށް އައްޔަން ކުރީ ދާދި ފަހުންނެވެ. އެއީ ކުރީގެ ޑެޕިއުޓީ މޭޔަރ ނަރީޝް މަޤާމުން އިސްތިއުފާ ދެއްވުމުން ނެވެ.
