އިމިގްރޭޝަން ކޮންޓްރޯލަރ ޝަމްއާން މަގާމުން ވަކިކޮށްފި
20 މާރިޗު 2025 | ބުރާސްފަތި 20:46އިމިގްރޭޝަން އޮފިސަރުންތަކެއް ބިދޭސީ މަސައްކަތްތެރިންގެ އަތުން ނާޖައިޒު މަންފާ ހޯދާ މައްސަލައެއް ފުލުހުން ދަނީ ބަލަމުން
ކޮންޓްރޯލަރ ޖެނެރަލް އޮފް އިމިގްރޭޝަންގެ މަގާމަށް މުޙައްމަދު ޝަމްޢާން ވަޙީދު އައްޔަންކުރައްވާ މަގާމުގެ ފަތްކޮޅު ރައީސް ޑރ. މުހައްމަދު މުއިއްޒު އަރުވަނީ 19 ނޮވެމްބަރު 2023 - ފައިލް
އިމިގްރޭޝަން ކޮންޓްރޯލަރގެ މަގާމުގައި ހުންނެވި ޝަމްއާން ވަހީދު މަގާމުން ވަކިކޮށްފި އެވެ.
އޭނާ މަގާމުން ވަކިކުރިކަން "ރާއްޖެ އެމްވީ" އަށް ވަނީ ކަށަވަރުވެފައެވެ. ޝަމްއާން މަގާމުން ވަކިކުރައްވަން ރައީސް ޑރ. މުހައްމަދު މުއިއްޒު ނިންމެވީ ބުރާސްފަތި ދުވަހުގެ ރޭގެ ވަގުތެއްގައެވެ. ނިންމެވި ސަބަބެއް ހާމަކޮށްފައި ނުވެއެވެ. އަދި އެކަން ރައީސް އޮފީހުންވެސް ރަސްމީކޮށް ހާމަކޮށްފައިނުވެ އެވެ. ނަމަވެސް ރައީސް އޮފީހުގެ ވެބްސައިޓް ގެ ދައުލަތް ގެ މަޤާމް ތަކުގެ ތިއްބަވާ ބޭފުޅުންގެ ފޯޓޯ ޖެހި ލިސްޓުން ޝައްމާން ވަނީ އުނި ކޮށްފައެވެ.
ޝަމްއާން މަގާމުން ވަކިކޮށްފައިވާއިރު، އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމުގެ މައުލޫމާތު ލިބުމާއި ގުޅިގެން، އެ މައްސަލަ ފުލުހުން ބަލަމުން އަންނަކަމަށް އެ އިދާރާއިން ބުރާސްފަތި ދުވަހުގެރޭ ވަނީ ހާމަކޮށްފަ އެވެ.
ފުލުހުން ބުނެފައިވަނީ މި މައްސަލައިގައި ބުރާސްފަތި ދުވަހުގެރޭ ހިންގި އޮޕަރޭޝަނެއްގައި ގެއެއް ބަލައި ފާސްކޮށް 3 މީހަކު ވަނީ ފުލުހުންގެ ބެލުމުގެ ދަށަށް ގެނެސްފައެެެވެ.
ޝަމްއާން މަގާމުން ވަކިކުރި ސަބަބެއް ސަރުކާރުން ހާމަކޮށްފައި ނުވި ނަމަވެސް އޭނާ މަގާމުން ވަކިކޮށްފައިވަނީ ފުލުހުން ބަލަމުންދާ މައްސަލައާއި ގުޅުން އޮވެގެންކަމަށް ވަނީ މައުލޫމާތު ލިިބިފަ އެވެ.
ޝަމްއާން ކޮންޓްރޯލަރ ޖެނެރަލް އޮފް އިމިގްރޭޝަންގެ މަގާމަށް ރައީސް ޑރ. މުހައްމަދު މުއިއްޒު އައްޔަން ކުރެއްވީ 19 ނޮވެމްބަރު 2023 ގައެވެ.
