ބިލް ގޭޓްސް، ތިން އަހަރު ތެރޭ ތިން ވަނަ ފަހަރަށް އިންޑިއާ އަށް

މައިކްރޯސޮފްޓުގެ ބާނީ، އަދި ބިލިއަނަރު ބިލް ގޭޓްސް އަނެއްކާ ވެސް އިންޑިއާ އަށް ޒިޔާރަތް ކޮށްފި އެވެ.

މިއީ ތިން އަހަރުގެ ތެރޭގައި ބިލް ގޭޓްސް އިންޑިއާ އަށް ޒިޔާރަތް ކުރާ ތިން ވަނަ ފަހަރެވެ. މި ދަތުރުގައި ވެސް ބިލް ގޭޓްސް ވަނީ އިންޑިއާގެ ބޮޑު ވަޒީރު ނަރެންދްރަ މޯދީ އާއި، އިންޑިއާގެ އެކި އެކި ވަޒީރުންގެ އިތުރުން، ޓެކްނޮލޮޖީގެ ދާއިރާ އަދި ސިއްހީ ދާއިރާގައި ހަރަކާތްތެރިވާ އެކިއެކި ފަރާތްތަކުގެ އިތުރުން، އީޖާދުކުރާ އެކި ފަރާތްތަކާ ބައްދަލު ކޮށްފަ އެވެ.

މީގެ އިތުރުން ބައެއް އިވެންޓު ތަކުގައި ވެސް ބިލް ގޭޓްސް ބައިވެރިވި އެވެ. އަދި އިންޑިއާގެ އެކި އެކި އުފެއްދުންތައް ވެސް އޭނާ ބަލާލި އެވެ. ވަކިން ޚާއްސަކޮށް އިންޑިއާގެ ދަނޑުވެރިކަމުގެ ދާއިރާ އަށް ޚާއްސަ ކޮށްގެން ޑްރޯންތައް އުފައްދާ ކުންފުންޏެއް ކަމަށްވާ، މަރުޓް ޑްރޯންސްގެ ޑްރޯނެއް މަސައްކަތް ކުރާ ގޮތް ބިލް ގޭޓްސް ބަލާލި އެވެ.

އިންޑިއާގެ ކޮންފެޑެރޭޝަން އޮފް އިންޑިއަން އިންޑަސްޓްރީ އިން އިސްނަގައިގެން ބޭއްވި ފިއުޗަރ ފޯވަޑް ފޯރަމްގައި ވާހަކަ ދައްކަމުން ބިލް ގޭޓްސް ބުނީ، އިންޑިއާ އިން ހޯދުންތައް ހޯދައި، އުފެއްދުންތައް އުފައްދަނީ ހަމައެކަނި އިންޑިއާ އަށްޓަކައި ނޫން ކަމަށެވެ. އަދި އިންޑިއާގެ އުފެއްދުންތަކުގެ ސަބަބުން މުޅި ދުނިޔޭގެ ސިއްހަތަށާއި، ތަރައްގީ އަށް އެއިން ފައިދާ ކުރާނެ ކަމަށް އޭނާ ބުންޏެވެ.

ހަމައެހެންމެ އިންޑިއާގެ ޑިޖިޓަލް އިކޯސިސްޓަމަކީ މުޅި ދުނިޔެ އިން މިސާލަކަށް ބަލަން ޖެހޭ ކަމެއް ކަމަށް ވެސް ބިލް ގޭޓްސް ބުންޏެވެ.