ސީރިއާ އާއެކު ގުޅުން ބަދަހި ކުރަން ބޭނުންވާ ކަމަށް ޕުޓިން ވިދާޅުވެއްޖެ
21 މާރިޗު 2025 | ހުކުރު 05:41ޕުޓިން ވަނީ ސީރިއާގެ މިނިވަން ކަމާއި، އެއްބައިވަންތަ ކަމާއި، ސަރަހައްދީ ސަލާމަތް ކަށަވަރުކުރުމަށް ކުރެވޭ މަސައްކަތްތަކަށް ތާއީދު ކުރާކަން ހާމަކޮށްފައި.
ރަޝިޔާގެ ވެރި ރަށް މޮސްކޯގައި ހުންނަ ރިޔާސީ ގަނޑުވަރުގައި، ރަޝިޔާގެ ރައީސް ޕުޓިން ނަންގަވާފައިވާ ފޮޓޯއެއް
ސީރިއާގެ އައު ސަރުކާރާ އެކު ގުޅުން ބަދަހި ކުރުމުގެ މަސައްކަތް ރަޝިޔާ އިން ފަށާފައިވާ ކަމަށް މީިޑިއާ ރިޕޯޓުތައް ބުނެފި އެވެ.
ރަޝިޔާގެ ރައީސް ވްލަޑިމިއާ ޕުޓިން ވަނީ، ސީިރިއާގެ ރައީސް އަޙުމަދު އަލް-ޝަރާއު އަށް މެސެޖެއް ފޮނުވައްވައިފަ އެވެ. އެ މެސެޖުގައި ޕުޓިން ވިދާޅުވެފައި ވަނީ، ސީރިއާގެ ސަރަހައްދީ ސަލާމަތާއި ރައްކާތެރިކަން ދެމެހެއްޓުމަށް ރަޝިޔާ އިން އެހީތެރިވެދޭނެ ކަމަށެވެ.
ރަޝިޔާގެ ރައީސް ޕުޓިންގެ ތަރުޖަމާނު ދިމިޓްރީ ޕެސްކޯވް ވިދާޅުވި ގޮތުގައި، ޕުޓިން ވަނީ ސީރިއާގެ މިނިވަން ކަމާއި، އެއްބައިވަންތަ ކަމާއި، ސަރަހައްދީ ސަލާމަތް ކަށަވަރުކުރުމަށް ކުރެވޭ މަސައްކަތްތަކަށް ތާއީދު ކުރާކަން ހާމަކޮށްފަ އެވެ.
މީގެ އިތުރުން ދެ ގައުމުގެ ދެމެދުގައި އޮތް އެކުވެރި ގުޅުން އިތުރަށް ވަރުގަދަ ކުރުމަށް ގިނަ ދާއިރާ ތަކަކުން އެއްބާރުލުން ދޭން ތައްޔާރަށް ހުރިކަން ވެސް ޕުޓިން އަންގަވާފައިވާ ކަމަށް އޭނާ ވިދާޅުވި އެވެ.
13 އަހަރުގެ ދިގު ހަނގުރާމައަކަށް ފަހު، ބަޝާރް އަލް-އައްސަދުގެ ވެރިކަން ނިމުމަކަށް އައުމާ ގުޅިގެން، ރަޝިއާ އިން ވަނީ ސީރިއާގައި ހުރި އެ ގައުމުގެ ސިފައިންގެ ބައެއް މީހުން އަނބުރާ ގެންގޮސްފަ އެވެ.
ނަމަވެސް މެޑިޓެރޭނިއަން ކަނޑު ސަރަހައްދުގައި ހުރި އެ ގައުމުގެ މައި ދެ ގާއިދު ކަމަށްވާ ހުމެއިމިމް އެއަރބޭސް އާއި ޓަރޓޫސްގެ ކަނޑުގެ ގާއިދު ދެމެހެއްޓުމަށް ނިންމާފައިވެ އެވެ.
50 އަހަރަށް ވުރެ ގިނަ ދުވަހު އައްސަދުގެ އާއިލީ ވެރިކަމަށް އެހީތެރިވެދިން ރަޝިޔާ އިން ބުނެފައި ވަނީ، މެދު އިރުމަތީގެ ސަރަހައްދީ ސުލްހައަށްޓަކައި، ސީރިއާ އެއްބައިވަންތަ އަދި އެކުވެރި ގައުމަކަށްވުން މުހިންމު ކަމަށެވެ.
މި ވަގުތު ސީރިއާގައި ހިނގަމުންދާ މަޒްހަބީ އަނިޔާތަކާ މެދު ރަޝިޔާ އިން ކަންބޮޑުވުން ފާޅުކޮށްފައިވެ އެވެ.
