ސޫރިއާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލުމަށް ތުރުކީން ގޮވާލައިފި
ތުރުކީން އިތުރަށް ގޮވާލީ، ސޫރިއާގެ އިގްތިސާދީ މިނިވަން ކަމަކީ އެ ގައުމުގެ ސުލްހަ މަސަލަސް ކަމަށް ކޮންމެހެން ބޭނުން ކަމެއް ކަމަށް.
ތުރުކީގެ ފޮރިން މިނިސްޓަރު ހަކާން ފިދާން, ސީރިއާގެ ރައީސް އަހުމަދު އަލްޝަރާއުއާ އެ ޤައުމުގެ ވެރި ރަށް ދިމިޝްކުގައި ބައްދަލު ކުރައްވަނީ
ޔޫރަޕިއަން ޔޫނިއަން އިން ސޫރިއާއާ ދެކޮޅަށް އަޅާފައިވާ އެންމެހާ ދަތި ކުރުމުގެ ފިޔަވަޅުތައް އުވާލުމަށް ތުރުކީން ގޮވާލައިފި އެވެ.
ތުރުކީން މިފަދައިން ގޮވާލާފައި ވަނީ ބެލްޖިއަމްގެ ވެރި ރަށް، ބްރަސެލްސް ގައި ބޭއްވުމަށް ހަމަޖެހިފައިވާ ބައިނަލްއަޤުވާމީ އެހީގެ ޖަލްސާގެ ކުރިންނެވެ.
މި ޖަލްސާއަކީ ސޫރިއާގެ އައު ވެރިކަމުގެ ފަރާތްތަކަށް ފުރަތަމަ ފަހަރަށް ދައުވަތު ދެވުނު ޖަލްސާއެކެވެ.
މިދިޔަ އަހަރުގެ ޑިސެމްބަރު މަހު ސޫރިއާގެ ކުރީގެ ރައީސް ބައްޝާރު އަލް އަސަދު ވެރިކަމުން ވައްޓާލުމަށް ފަހު، ބާރު ހޯދި އައު ވެރިކަމާ ތުރުކީން ވަނީ ގުޅުން ބަދަހިކޮށްފަ އެވެ.
ތުރުކީން ބުނީ، ދަތި ކުރުމުގެ ފިޔަވަޅުތައް އުވާލުމަކީ އެ ގައުމުގައި "އަމާން އިންތިގާލީ މަރުހަލާއެއް" ގެނައުމަށް މުހިންމު ކަމެއް ކަމަށެވެ.
ޔޫރަޕިއަން ޔޫނިއަނުން ކުރިން ވަނީ ސޫރިއާގެ އިގްތިސާދީ ދަތިތައް ލުއި ކުރުމަށްޓަކައި ހަކަތަ، ދަތުރު ފަތުރު އަދި ބޭންކިން ދާއިރާ ތަކުން ދަތި ކުރުންތައް ލުއިކޮށްދީފަ އެވެ.
އެހެން ނަމަވެސް، ތުރުކީގެ ފޮރިން މިނިސްޓްރީ އިން ބުނީ ދަތި ކުރުންތައް ވަކި ޝަރުތަކާ ނުލައި، އަދި ވަކި މުއްދަތެއް ނެތި އުވާލަން ޖެހޭ ކަމަށެވެ.
ތިން މިލިއަނާ ގާތް ކުރާ އަދަދެއްގެ ސޫރިއާގެ ރެފިއުޖީން ބަލަހައްޓަމުންދާ ތުރުކީން އިތުރަށް ގޮވާލީ، ސޫރިއާގެ އިގްތިސާދީ މިނިވަން ކަމަކީ އެ ގައުމުގެ ސުލްހަ މަސަލަސް ކަމަށް ކޮންމެހެން ބޭނުން ކަމެއް ކަމަށެވެ.
އަދި ރެފިއުޖީން އަނބުރާ ގެންދިއުމަށް މަގުފަހި ކުރުމަށް ސޫރިއާ އަލުން ބިނާކުރަން ޖެހޭ ކަމަށް ވެސް ބުނެފައިވެ އެވެ.
ބްރަސެލްސް ގައި ބޭއްވޭ މި ޖަލްސާގައި ތުރުކީ ތަމްސީލު ކުރައްވާނީ ޑެޕިއުޓީ ފޮރިން މިނިސްޓަރު ނޫހު ޔިލްމަޒެވެ.
