ހަނިމާދޫ-ބެންގަލޫރު ސީދާ ވައިގެ ދަތުރުތައް ފަށަން މޯލްޑިވިއަނުން ނިންމައިފި
އަލަށް މިފަށާ ދަތުރުތަކުގައި ހަފްތާއަކު ދެ ދަތުރު، އާދީއްތަ އަދި ބުރާސްފަތި ދުވަހު ކުރިއަށް ގެންދިއުމަށް ވަނީ ހަމަޖެހިފައިވޭ
މޯލްޑިވިއަން؛ ރާއްޖޭގެ ގައުމީ އެއަރލައިން، ރާއްޖޭގެ 16 ވައިގެ ބަނދަރަށް ދަތުރުކުރޭ
މޯލްޑިވިއަން އިން ހަނިމާދޫ އާއި ބެންގަލޫރު އާ ދެމެދު ސީދާ ވައިގެ ދަތުރުތައް ފަށަން ނިންމައިފި އެވެ. މޯލްޑިވިއަންއިން ބުނި ގޮތުގައި، 2025 މެއި 15 އިން ފެށިގެން ހަނިމާދޫ އިންޓަރނޭޝަނަލް އެއަރޕޯޓާއި ބެންގަލޫރު އާ ދެމެދު ސީދާ ވައިގެ ދަތުރުތައް ފެށުމަށް ވަނީ ހަމަޖެހިފަ އެވެ. މިއީ ރާއްޖޭގެ އުތުރާއި، އިންޑިއާގެ މުހިންމު ވައިގެ ބަނދަރުތަކާ ދެމެދު ގުޅުން ވަރުގަދަ ކުރުމަށް އެޅޭ މުހިންމު ފިޔަވަޅެއް ކަމަށްވެސް މޯލްޑިވިއަނުން ހާމަކުރެ އެވެ.
އަލަށް މިފަށާ ދަތުރުތަކުގައި ހަފްތާއަކު ދެ ދަތުރު، އާދީއްތަ އަދި ބުރާސްފަތި ދުވަހު ކުރިއަށް ގެންދިއުމަށް ވަނީ ހަމަޖެހިފައެވެ.
މިއީ މޯލްޑިވިއަންގެ ހަނިމާދޫ - ތިރުވަނަންތަޕޫރަމް ރޫޓަށް ފަހު، ރާއްޖޭގެ އުތުރުގައި ދިރިއުޅޭ ރައްޔިތުންނަށް ލިބިގެންދާ އިތުރު ފަސޭހައެކެވެ. މި ރޫޓު ތަޢާރަފު ކުރުމުގެ މަޤްޞަދަކީ ދެ ޤައުމުގެ އިޤްތިޞާދީ އަދި ޘަޤާފީ ގުޅުން އިތުރަށް ހަރުދަނާ ކުރުމެވެ.މި ރޫޓަށް ޓިކެޓް ވިއްކަން ފެށުމަށް ހަމަޖެހިފައި ވަނީ 2025 މާރިޗު 16 އިން ފެށިގެންނެވެ. ޓިކެޓް ގަތުމަށް މޯލްޑިވިއަންގެ ވެބްސައިޓް، މޮބައިލް އެޕްލިކޭޝަން އަދި ޓިކެޓިންގ އޮފީސްތަކުން ޚިދުމަތް ލިބޭނެ ކަމަށް އެކުންފުނިން ބުންޏެވެ. މޯލްޑިވިއަނުން މިހާރު ރާއްޖޭގެ އެތެރޭގެ 16 ވައިގެ ބަނދަރަކަށް ޚިދުމަތްދޭ، އަދި ބޭރުގެ އެކި ޤައުމުތަކަށްވެސް ދަތުރުކުރާ ކުންފުންޏެކެވެ.
މި ކުންފުނީގެ އުދުހުންތަކުގައި އޭ320 އާއި އޭ330ގެ ބޮޑެތި މަތިންދާ ބޯޓުތަކާއި، ޑޭޝް 8، އޭޓީއާރު އަދި ޑީއެޗްސީ-6 ޓުވިން އޮޓަރ ފަދަ އެއްގަމާއި ކަނޑުމަތީގައި ޖައްސާ މަތިންދާބޯޓުތައް ބޭނުންކުރަމުންދެ އެވެ.
