އިސްލާމިކް މިނިސްޓަރު ވެސް ދަނީ އަޅުގަނޑުމެންގެ މި އިސްލާހީ މަސައްކަތަށް އެއްބާރުލުން ދެމުން: ޔައުޤޫބު
ރައީސް މުއިއްޒަކީ ދޮގުހެއްދެވުމުގައި އަރާހުންނެވި ބޭފުޅެއް
ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބު އަބުދުﷲ: ވިދާޅުވީ އިސްލާމިކް މިނިސްޓަރުވެސް އެމްޑީޕީގެ މި ހަރަކާތަށް އެއްބާރުލުން އެބަ ދެއްވާކަމަށް
ރާއްޖޭގެ އިސްލާމިކް މިނިސްޓަރު ވެސް ދަނީ އެމްޑީޕީން ކުރަމުން ގެންދާ އިސްލާހީ މަސައްކަތުގައި އެއްބާރުލުން ދެމުންދާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބު އަބުދުﷲ ވިދާޅުވެއްޖެއެވެ.
ޔައުޤޫބު މިފަދައިން ވިދާޅުވީ އެމްޑީޕީން ސިލްސިލާކޮށް ކުރިއަށް ގެންދާ ކުއްލި އެއްވުމުގެ ތެރެއިން ހުކުރު ދުވަހުގެ ރޭ ބޭއްވި އެއްވުމުގައި ވާހަކަދައްކަވަމުންނެވެ.
ޔައުޤޫބް ވިދާޅުވީ ރައީސް މުއިއްޒަކީ ދޮގު ހެއްދެވުމުގައި އަރާހުންނެވި ބޭފުޅެއް ކަމަށާއި އެމަނިކުފާނު ވެރިކަމުގައި ހުންނަވައިގެން ދިވެހި ރައްޔިތުންނަށް ލިބޭނެ އެއްވެސް މަންފާއެއް އަދި ކުރިއެރުމެއް ވެސް ނެތްކަމަށެވެ.
ޔައުޤޫބު ވިދާޅުވީ މި ސަރުކާރު ނިމުމަކަށް ގެނައުމަށް މިވަގުތު އެދެނީ ފުލުހުންނާއި ހުރިހާ އާންމު ރައްޔިތުންގެ ފުރިހަމަ އެއްބާރުލުން ދިނުމަށް ކަމަށާއި އެގޮތުން އެ ފުލުހުންނާއި ރައްޔިތުންގެ އެއްބާރުލުން ލިބިއްޖެ ނަމަ މިހާރު ވެރިކަމުގައި ހުންނެވި ރައީސް މުއިއްޒުގެ ވެރިކަން ފަސޭހަކަމާއި އެކު ނިމުކަމަށް ގެނެވޭނޭ ކަމަށެވެ.
ޔައުޤޫބު ވިދާޅުވީ ރައީސް މުއިއްޒުގެ ވެރިކަން ވައްޓާލުމަށް ކުރެވެން ހުރިހާ މަސައްކަތެއްވެސް ކުރުމަށް މިތިބީ ތައްޔާރަށް ކަމަށާއި އަދި އެކަން ކޮށްފައި ނޫނީ މިކުރާ މަސައްކަތް ހުއްޓާނުލައްވާނޭ ކަމަށެވެ. އަދި ރައީސް މުއިއްޒުގެ ވެރިކަން ވައްޓާލުމަށް ވާން ޖެހޭ ހުރިހާ ތައްޔާރީތަކެއް ވެ މިހާރު ނިމިފައިވާ ކަމަށާއި މިހާރު ބޭނުން ވަނީ ހަމަ އެކަނި ފުލުހުންގެ އެއްބާރުލުން ކަމަށް ޔައުޤޫބް ވިދާޅުވިއެވެ.
ޔައުޤޫބު ވިދާޅުވީ މި ސަރުކާރުން ރާއްޖޭގެ ބައިތުލްމާލު ކައި ހުސްކޮށްލައިފި ކަމަށާއި އެހެންކަމުން މިރާއްޖެ ސަލާމަތް ވާން އޮތީ ފުލުހުންގެ އެއްބާރުލުމާއި އެކު މިހާރު މި އޮތް ވެރިކަން ނިމުކަމަށް ގެނެވިގެން ކަމަށެވެ.
ޔައުޤޫބު ވިދާޅުވީ ފުލުހުންނަކީ ރައީސުލްޖުމްހޫރިއްޔާ އައްޔަންކޮށްފައި ތިބި ބައެއް ނޫން ކަމަށާއި އެހެން ވީމައި މި ކުރާ އިސްލާހީ މަސައްކަތުގައި ފުލުހުންގެ އެއްބާރުލުން ނުދޭންވި ސަބަބެއް ނެތް ކަމަށެވެ.
އޭނާ ވިދާޅުވީ ރައީސުލްޖުމްހޫރީއްޔާއަށް ލިބިދީފައިވާ ޤާނޫނީ ބާރުގެ ދަށުން އައްޔަން ކޮށްފައި ހުރި އިސްލާމިކް މިނިސްޓަރު މި އިސްލާހީ ހަރަކާތަށް ކޮންމެ ހަފްތާއަކު އެއްބާރުލުން ދެމުން އެބަ ގެންދަވާ ކަމަށާއި އެގޮތުން މިއަދުގެ ހުކުރު ޚުތުބާގެ ވެސް ޚުލާސާ އަކީ މި ރާއްޖެއާއި އިސްލާމް ދީން ދެކެ ލޯބިވާ ރައްޔިތުން ތިބިކަމަށް ވާނަމަ މިހާރު މިއޮތް ސަރުކާރު ބަދަލުކުރަން އެންމެވެސް ނުކުންނަން ޖެހޭ ކަމަށެވެ.
އިސްލާމިކް މިނިސްޓަރ އަޅުގަނޑުމެންނަށް މިކަމުގައި ކޮންމެ ފަހްތާއަކުވެސް އެއްބާރުލުން އެބަދޭ. މިއަދުގެ ހުކުރު ޚުތުބާގައިވެސް ވިދާޅުވީ، އޭގެ ޚުލާސާ އަކީ އެމްޑީޕީ އާއި އަދި މި ރާއްޖޭގެ ރައްޔިތުން، ޚާއްސަކޮށް އިސްލާމް ދީނާއި މި ރާއްޖެ ދެކެ ލޯބިވާ ރައްޔިތުން ތިބިކަމަށް ވަންޏާމު މި ސަރުކާރު ވައްޓާލަން. މި ސަރުކާރު ބަދަލުކުރަން. މިހާރު ވެރިކަމުގައި މި ހުރި މުއިއްޒު ވެރިކަމުން ބާލަން އެންމެ ނުކުންނަން އެބަ ޖެހެޔޭ. އެކަން ވާޖިބު ވެއްޖެޔޭ. އަދި އެކަން ކުރަން އެން ރަނގަޅު ވަގުތަކީ މި ރޯދަމަހޭ. ޚާއްސަކޮށް ރޯދަ މަހުގެ 17 ވަނަ ދުވަހަކީ އެކަމަށް އޮތް އެންމެ މުހިންމު ދުވަހޭ.ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބު އަބުދުﷲ
ޔައުޤޫބު ވިދާޅުވީ ރާއްޖޭގެ އިސްލާމިކް މިނިސްޓަރުރުވެސް ރައީސް މުއިއްޒު ދޮގުހައްދަވާތީ އެކަމާއި ކުރެވޭނޭ ކަމެއް ނެތް ކަމަށް ވިދާޅުވި ކަމަށާއި އެގޮތުން އެމަނިކުފާނަށް ހަމަ އެކަނި ކުރެވެން އޮތް ކަމަކީ ދޮގުހެދުމުގެ ނުބައިކަމާއި ގުޅުވައި ހުކުރު ޚުތުބާއެއް ދިނުން ކަމަށެވެ.
އެގޮތުން ނިމުނު ހަފްތާގައިވެސް ޚާށްސަކޮށް ރައީސް މުއިޒަށް އަމާޒުކޮށް ދޮގުހެދުމުގެ ނުބައިކަމާއި ގުޅިގެން ޚުތުބާޢެއް ދެއްވިކަމަށް އިސްލާމިކް ވިދާޅުވެފައިވާ ކަމަށް ވެސް ޔައުޤޫބް ވިދާޅުވި އެވެ.
ޔައުޤޫބު ވިދާޅުވީ އިސްލާމިކް މިނިސްޓަރު ވެސް އެގެންދަވަނީ އެމްޑީޕީގެ މި އިސްލާހީ މަސައްކަތުގައި ބައިވެރިވެ، އެއްބާރުލުން ދެމުން ކަމަށާއި ހަމަ އެގޮތަށް ފުލުހުންގެ އެއްބާރުލުން ވެސް ނުދެއްވަންވީ އެއްވެސް ސަބަބެއް ނެތްކަމަށް ޔައުޤޫބު ވިދާޅުވި އެވެ.
