ދުޢާއަކީ މުއުމިނުންގެ ހަތިޔާރު، ﷲ ހަޒުރަތުގައި ދުޢާ ދެންނެވުމަށް ލަދު ގަނެގެން ނުވާނެ - ޚުތުބާ
14 މާރިޗު 2025 | ހުކުރު 08:23ބަދުރުގެ ދުވަހު ޝަހީރުވި 14 ބޭކަލުންގެ ތެރޭގައި ޒުވާނުން ހިމެނުމަކި ޒުވާނުންނަށް އޮތް ފިލާވަޅެއް އަދި އިބުރަތެއް ކަމަށް ވެސް ހުކުރު ހުތުބާގައި ބުނެފައިވޭ
ހުކުރު ނަމާދުގެ ތެރެއިން ނަގާފައިވާ ފޮޓޯ އެއް
ދުޢާ އަކީ މުއުމިނުންގެ ހަތިޔާރު ކަމަށާއި ކަންކަމުގައި ﷲ ހަޒުރަތުގައި ދުޢާ ދެންނެވުމަށް ލަދު ގަނެގެން ނުވާނެ ކަމަށް ހުކުރު ހުތުބާގައި ބުނެފިއެވެ.
ހުތުބާގައި ވަނީ ﷲ އަކީ ދުޢާ އިޖާބަކުރައްވާ ރަސްކަލާނގެކަން ހަނދުމަކޮށްދީފައެވެ. އެކަލާނގެ އަށް ބިރުވެތިވެ އިޚުލާސްތެރި ހިތަކާއި އެކު ދުޢާ ކުރުމަކީ އެ ދުޢާ އެއް އިޖާބަކުރެއްވުމަށް އޮތް ބާރެއް ކަމަށް ހުތުބާގައި ބަޔާންކޮށްފައިވެއެވެ.
ބަދުރު ހަނގުރާމައިން ދުޢާ ކުރުމުގެ މުހިންމުކަމުގެ ފިލާވަޅުވެސް ލިބޭ ކަމަށް ހުތުބާގައިވަނީ ބުނެފައެވެ. މީގެ އިތުރުން ކަންކަމުގައި ވަކީލުކުރުމަކީ ނަސްރާއި ކާމިޔާބަށް ވާސިލްކޮށްދޭ ކަމެއް ކަމަށް ހުތުބާގައިވެއެވެ.
ރަމަޟާން މަހަކީ ގިނަ ނަސްރާއި ދަރުމަ ހިމެނޭ މަހެއް ކަމަށް ހުތުބާގައި ވަނީ ފާހަގަކޮށްފައެވެ. އެގޮތުން ހިޖުރައިން ދެ ވަނަ އަހަރު ރަމަޟާން މަހުގެ 17 ވަނަ ދުވަހު ކުރި ބަދުރު ހަނގުރާމަ އަށް ހުތުބާގައި ވަނީ އަލިއަޅުވާލާފައެވެ.
ބަދުރު ހަނގުރާމަ އަކީ އިސްލާމީ އުންމަތަށް އެތައް ފިލާވަޅެއް ލިބޭ ހަނގުރާމައެއް ކަމަށް ވެސް ހުތުބާގައި ވަނީ ބުނެފައެވެ.
އެ ހަނގުރާމައިން ލިބޭ އެއް ފިލާވަޅަކީ ވެރިންނަށް ކިޔަވަންވުމުގެ މާތް ސިފަ ކަމަށާއި މުހާޖިރުންނާއި އަންސާރުންގެ ފަރާތްޕުޅުން ފެނުނީ ކިޔަމަންތެރިކަމުގެ ރީތި މިސާލެއް ކަމަށް ހުތުބާގައި ވަނީ ބުނެފައެވެ.
ކިޔަމަންތެރިކަމުގެ ފުރިހަމަ ނަމޫނާ އެއް އޭރު ފެނުނު ކަމަށާއި އެއީ އީމާންކަމުގެ ފުރިހަމަ މިސާލެއް ކަމަށް ވަނީ ބުނެފައެވެ. މުސްލިމުންނާއި ހަމައަށް ދީން ފޯރުކޮށްދެއްވުމަށް އެ ބޭކަލުން ވެވަޑައިގަތް ގުރުބާނީ މުސްލިމުން ބަލައިގަންނަ މިންވަރާއި މެދު ހުތުބާގައި ވަނީ ސުވާލު އުފައްދާފައެވެ.
ބަދުރުގެ ދުވަހު ޝަހީރުވި 14 ބޭކަލުންގެ ތެރޭގައި ޒުވާނުން ހިމެނުމަކި ޒުވާނުންނަށް އޮތް ފިލާވަޅެއް އަދި އިބުރަތެއް ކަމަށް ވެސް ހުކުރު ހުތުބާގައި ބުނެފައިވެއެވެ.
