ދިވެހިރާއްޖެއަށް ބޭރުގެ ލަޝްކަރެއް އަރައި ހަތިޔާރުގެ ބޭނުން ކުރަންޖެހޭ ފަދަ ހާލަތަކަށް ގައުމު ދިޔަ ކަމަކަށް ގަބޫލު ނުކުރައްވާ ކަމަށް ގުޅިފައިވާ ޕާޓީތަކުން ބުނެފިއެވެ.
ގުޅިފައިވާ ޕާޓީތަކުން ބުރާސްފަތި ދުވަހުގެ ހަވީރު މ. ކުނޫޒުގައި ބޭއްވި ޕްރެސް ކޮންފަރެންސެއްގައި ވާހަކަ ދައްކަވަމުން، ކެންދޫ ދާއިރާގެ މެމްބަރު އަލީ ހުސައިން ވިދާޅުވީ ބޭރުގެ ލަޝްކަރެއް ރާއްޖެ އަރައި، ހަތިޔާރުގެ ބޭނުންކުރުމަށް ގުޅިފައިވާ ޕާޓީތަކުން ގޮވާލާފައި ނުވާނެ ކަމަށެވެ.
ރައީސް ނަޝީދު ކުރެއްވި ޓްވީޓަކާ ހަވާލާ ދެއްވައި، އަލީ ހުސައިން ވިދާޅުވީ ރާއްޖޭގެ ހާލަތާ ގުޅިގެން ރާއްޖެއަށް އެންވޯއީއެއް ފޮނުވުމަށް ނަޝީދު އެދިވަޑައިގެންފައިވާ ކަމަށާއި އޭގެ މާނައަކީ ރާއްޖެއަށް ބޭރުގެ ލަޝްކަރެއް ފޮނުވައި ހަތިޔާރުގެ ބޭނުން ކުރުން ނޫން ކަމަށެވެ.
"އަޅުގަނޑުމެން އެއްވެސް ގޮތަކަށް ގަބޫލެއް ނުކުރަން ދިވެހި ގައުމަށް، ބޭރުގެ ބަޔަކު ނުވަތަ ބޭރުގެ ލަޝްކަރެއް އަރައި ހަތިޔާރުގެ ބޭނުން ކުރަން ޖެހޭ ފަދަ ހާލަތަަކަށް ގައުމު ދިޔަ ކަމަކަށް، އަޅުގަނޑުމެން އެގޮތަކަށް ގަބޫލެއް ނުކުރަން،" ގާނޫނީ ވަކީލުކަން ވެސް ކުރައްވާ އަލީ ހުސައިން ވިދާޅުވިއެވެ.
އޭނާ ވިދާޅުވީ ސަރުކާރު ޒިންމާދާރު ކުރުވުމަށް ގާނޫނީ ނިޒާމުގެ ތެރެއިން ކުރި ހުރިހާ މަސައްކަތެއް ރައީސް އަބްދުﷲ ޔާމީން ހުއްޓުވާފައިވާ ކަމަށާއި އެ މަސައްކަތްތައް ހުއްޓުވާފައި ވަނީ ގަދަބާރުން ކަމަށެވެ.
"...އެހެންނަމަވެސް އަޅުގަނޑުމެން ގަބޫލުކުރާ ކަމަކީ ގާނޫނީ ގޮތުން އަޅުގަނޑުމެން ކުރަމުންދިޔަ ހުރިހާ މަސައްކަތެއް، ރައީސް ޔާމީން ހުއްޓުވައިފި. ގާނޫނުއަސާސީގެ ތެރެއިން ސަރުކާރު ޒިންމާދާރު ކުރުވުމަށް އަޅުގަނޑުމެން ކުރި ހުރިހާ މަސައްކަތެއް ގަދަބާރުން، ގޮއްމުށުގެ ބާރުން ހުއްޓުވައިފި. ދެން އަޅުގަނޑުމެން ކޮން ކަމެއްތޯ ކުރާނީ،" ޖުމްހޫރީ ޕާޓީގެ ޕާލަމެންޓްރީ ގްރޫޕުގެ މެމްބަރު އަލީ ހުސައިން ވިދާޅުވިއެވެ.
އުއްތަމަ ފަނޑިޔާރު ހައްޔަރުކޮށްފައިވާ މައްސަލައަށް އިޝާރާތް ކުރައްވައި އަލީ ހުސައިން ވިދާޅުވީ ސުޕްރީމް ކޯޓު އެކުލެވިގެން ވަނީ އުއްތަމަފަނޑިޔާރާއި އެހެން ފަނޑިޔާރުގެ މައްޗަށް ކަމަށް ގާނޫނުއަސާސީގައި ބަޔާންކޮށްފައިވާ ކަަމަށެވެ. އުއްތަމަފަނޑިޔާރުގެ ބައިވެރިވުމަކާ ނުލައި ސުޕްރީމް ކޯޓުން ގޮތްތައް ކަނޑަނޭޅޭނެ ކަމަށް ވެސް އަލީ ހުސައިން ވިދާޅުވިއެވެ.
އުއްތަމަ ފަނޑިޔާރު ހުންނެވީ ޣައިރު ގާނޫނީ ހައްޔަރެއްގައި ކަމަށް ފާހަގަ ކުރައްވައި ސިފައިންނާއި ފުލުހުންނަށް އަލީ ހުސައިން ގޮވާލެއްވީ ވަގުތަށް އުއްތަމަ ފަނޑިޔާރު މިނިވަން ކުރުމަށެވެ.
"އުއްތަމަ ފަނޑިޔާރު މިހާރު ވެސް ހައްޔަރު ކުރެވިފައި ވަނީ ޣައިރު ގާނޫނީ ގޮތުން، ޣައިރު ގާނޫނީ ހައްޔަރެއްގައި އެ ހުންނެވީ. މިވަގުތުން މިވަގުތަށް އުއްތަމަ ފަނޑިޔާރު މިނިވަން ކުރުމަށް ދިވެހި ސިފައިންނާއި ފުލުހުންނަށް އަޅުގަނޑުމެން ގޮވާލަން،" އަލީ ހުސައިން ވިދާޅުވިއެވެ.
