ހުކުރު ނަމާދަށްފަހު ދުޢާ ކޮށްފި
މިއަދުގެ ދުއާގައި ގިނަ ބަޔަކު ބައިވެރިވި
ހުކުރު ނަމާދަށްފަހު ދުޢާ ކުރުން
ރައީސް އަބްދުﷲ ޔާމީންގެ ސަރުކާރުގެ އަނިޔާވެރިކަން ނިމުމަކަށް އައުމަށާއި، ސިޔާސީ ކުށްވެރިން މިނިވަންކޮށްދެއްވުމަށް އެދި ގިނަ އަދަދެއްގެ ބަޔަކު ހުކުރު ނަމާދަށްފަހު ދުއާކޮށްފި އެވެ.
މި ދުއާގައި އެމްޑީޕީ އާއި އަދާލަތު ޕާޓީ އާއި ޖުމްހުރީ ޕާޓީގެ އިތުރުން ރައީސް މައުމޫނަށް ތާއީދުކުރައްވާ ސިޔާސީ ބޭފުޅުންނާއި އަމިއްލަ ފަރާތްތަކުން ބައިވެރިވިއެވެ.
އިސްލާމީ މަރުކަޒުގައި މި ދުއާކުރަން ފެށީ، ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ބަންދުކޮށްފައި ބެހެއްޓި މައްސަލައިގައި ދައުލަތުން ޓެރަރިޒަމްގެ ދައުވާ އުފުލައި ކުރީގެ ރައީސް މުހައްމަދު ނަޝީދު 2015 ވަނަ އަހަރު ހައްޔަރުކުރުމާ ގުޅިގެންނެވެ. އެއަށް ފަހު ކޮންމެ ހުކުރު ދުވަހެއްގައި ވެސް ރާއްޖޭގެ އެކި ރަށްރަށުގައި ހުއްޓުމެއްނެތި ދުއާ ކުރަމުން ގެންދެ އެވެ.
ރައީސް ނަޝީދުގެ މައްޗަށް ޓެރަރިޒަމްގެ ދައުވާކޮށް ދިގު މުއްދަތުގެ ޖަލު ހުކުމެއް އިއްވާފައިވާ އިރު ސީޔާސީ އެހެން ގިނަ ފަރާތްތަކެއް ވެސް މި ވަގުތު ތިބީ ޖަލުގައެވެ.
އެންމެ ފަހުން ސަރުކާރާ ދެކޮޅަށް އަޑުއުފުލި ގާސިމްގެ މައްޗަށް އަލުން ވަނީ ދައުވާ އުފުލާފައެވެ. އަދި މަޖިލީހުގެ އަގުލަބިއްޔަތު ސަރުކާރަށް ގެއްލުމުން އިދިކޮޅު މެމްބަރުން ގެންދަނީ ހައްޔަރުކުރަމުންނެވެ.
