ރޮހިންޖާ މުސްލިމުންނަށް ކުރާ އަނިޔާތަކާއި ދެކޮޅަށް ޅ. ކުރެންދޫ ރައްޔިތުން އަޑު އުފުލައި ޙާއްސަ ދުޢާ އެއް ކޮށްފި

ރޮހިންޖާ މުސްލިމުންނަށް ކުރާ އަނިޔާތަކާއި ދެކޮޅަށް ޅ. ކުރެންދޫ ރައްޔިތުން އަންގާރަ ދުވަހުގެ ހަވީރު އަޑު އުފުލައި ޙާއްސަ ދުޢާއެއް ކޮށްފިއެވެ.

ރާއްޖެއެމްވީއަށް މައުލޫމާތު ދެއްވަމުން އެ ރަށު ކައުންސިލްގެ ރައީސް އިސްމާއިލް މަދީހް ވިދާޅުވީ މި ހަރަކާތަކީ ރޮހިންޖާ ރައްޔިތުންނާއި ދެކޮޅަށް ހިންގާ ލާއިންސާނީ އަމަލުތައް ކުށްވެރިކޮށް އެކަމާއި ދެކޮޅަށް އަޑު އުފުލުމުގެ ގޮތުން އެ ރަށު ރައްޔިތުން ގުޅިގެން ހިންގި ހަރަކާތެއް ކަމަށެވެ. އަދި މި ހަރަކާތުގައި ރޮހިންޖާގެ މުސްލިމުން އަޙުންނާއި އުޙްތުން އަނިޔާވެރިންގެ ކިބައިން ސަލާމަތް ކޮށްދިނުމަށް އެދި ޙާއްސަ ދުޢާ އެއް ކޮށްފައިވާ ކަމަށް ވެސް މަދީހް ވިދާޅުވިއެވެ.

މަދީހް އިތުރަށް ވިދާޅުވީ މި ހަރަކާތް ކުރިއަށްގެންދިޔައީ ހަވީރު 5.30 އިން ފެށިގެން 06.00 އަށް ކަމަށާއި 800 އެއްހާ ރައްޔިތުން މި ހަރާކަތުގައި ބައިވެރިވެފައިވާ ކަމަށެވެ.

މި ހަރަކާތުގައި އެ ރަށު ރައްޔިތުން ވަނީ އެމީހުންގެ ޝުއޫރުތައް ލިޔުމުން ފާޅު ކޮށްފައެވެ.