"ފުލުހުންގެ އަނިޔާގެ ސަބަބުން މުޒާހަރާގެ އަންހެން ބައިވެރިއެއްގެ ނިޔަފަތި ވަނީ ނެއްޓިފައި"

ބުދަ ދުވަހުގެ ރޭ އެމްޑީޕީން ކުރި މުޒާހަރާގައި ހާލަތާއި ނުބައްދަލު މިންވަރަށް ބާރުގެ ބޭނުންކުރުމުގެ ސަބަބުން މުޒާހަރާގެ ބައިވެރިންނަށް އަނިޔާވެއްޖެއެވެ.

ސިލްސިލާކޮށް ކުރަމުންދާ މުޒާހަރާގެ ތެރެއިން ބުދަ ދުވަހުގެ ރޭގެ މުޒާހަރާގައި އަނިޔާވި ގިނަ މީހުންނަކީ އަންހެނުންނެވެ. ހާލަތާއި ނުބައްދަލު މިންވަރަށް ފުލުހުން ބާރުގެ ބޭނުންކޮށް ކޮއްޕާ، އާއްމުން ބިންމައްޗަށް ވައްޓާލި މަންޒަރު ފެނުނު ކަމަށް އެތަނުގައި ތިބި މުޒާހަރާގެ ބައިވެރިން ވަނީ ބުނެފައެވެ. މި މުޒާހަރާތަކުގައި ޚާއްސަކޮށް އަންހެނުންނަށް އަނިޔާވާ ގޮތަށް ފުލުހުންގެ އަމަލުތައް ބަހައްޓަމުންދާ ކަމަށް މުޒާހަރާގެ ބައިވެރިން ފާހަގަކުރެއެވެ.

މުޒާހަރާގެ ބައިވެރިން ފަހަތަށް ޖެއްސުމަށް ކުއްލިއަކަށް ބާރު ސްޕީޑުގައި އައިސް ފުލުހުން އާއްމުން ކޮއްޕުމުގެ ސަބަބުން ބައެއް މީހުންގެ އަތާއި ފަޔަށް ވެސް އެކި ވަރުގެ އަނިޔާ ވަނީ ވެފައެވެ. މީގެ އިތުރުން ފިރިހެން ފުލުހުން މެދުވެރިކޮށް މުޒާހަރާގެ އަންހެން ބައިވެރިން ފަހަތަށް ޖައްސަން މަސައްކަތް ކުރާތީ ތަކުރާރުކޮށް އެކަމާއި މެދު އާއްމުން ވަނީ ނުރުހުން ފާޅުކޮށްފައެވެ. ނަމަވެސް އަންހެނުން ފަހަތަށް ޖެއްސުމުގައި ވެސް ބައެއް ފިރިހެން ފުލުހުން އުޅުނު މަންޒަރު އެ ސަރަހައްދުގައި ތިބި ރާއްޖެޓީވީގެ ނޫސްވެރިންނަށް ވަނީ ފެނިފައެވެ.

ފުލުހުން ކޮއްޕުމުގެ ސަބަބުން ބައެއް އަންހެނުން ބިންމައްޗަށް ވެއްޓުނެވެ. އަދި މުޒާހަރާގެ އަންހެން ބައިވެރި އެއްގެ ފައިގެ ބޮޑުވާ އިނގިލީގެ ނިޔަފަތި ވަނީ އެއްކޮށް ނައްޓައިގެން ގޮސްފައެވެ. އަނިޔާވި އަންހެން މީހާ ރާއްޖެއެމްވީ އަށް މައުލޫމާތު ދެމުން ބުނީ އޭނާގެ ފައިގެ ބޮޑުވާ އިނގިއްޔަށް އަނިޔާވީ ފުލުހަކު ގަސްތުގައި އޭނާގެ ފަޔަށް އެރުމުން ކަމަށެވެ.

އެގޮތުން މުޒާހަރާގައި ތިބި އަންހެނުން ފަހަތަށް ޖެއްސުމުގައި ފިރިހެން ފުލުހުން ހަރަކާތްތެރިވިއިރު، މަދު ބަޔަކު ފަހަތަށް ޖައްސަން ގިނަ އަދަދެއްގެ ފުލުހުން ހަރަކާތްތެރިވުމުން ބައެއް މީހުންނަށް އެކިވަރުގެ ޒަހަމްތައް ވަނީ ލިބިފަ އެވެ.

މުޒާހަރާތައް މޮނިޓަރކުރުމަށް ހިއުމަން ރައިޓްސް ކޮމިޝަނުން ހަރަކާތްތެރިވި ނަމަވެސް މިކަމާއި މެދު އެޗްއާރްސީއެމް އިން އާއްމުންނަށް އަނިޔާވުމާއި މެދު އެއްވެސް އެއްޗެއް ހާމަކޮށްފަ އެއް ނުވެއެވެ.