ޣައްޒާ އިން ފަލަސްތީނުގެ ރައްޔިތުން ބޭލުމަށް ނޭދޭ ކަމަށް ޓްރަމްޕް ވިދާޅުވުމުން މިސުރުގެ މަރުޙަބާ

ޣައްޒާ އިން ފަލަސްޠީނުގެ ރައްޔިތުން ނެރުމަށް ނުވަތަ ބޭލުމަށް ނޭދޭ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، މިޞްރުން އެކަމަށް މަރުޙަބާ ކިޔައިފި އެވެ. 

ބުދަ ދުވަހު އެމެރިކާގެ ރިޔާސީ ގަނޑުވަރު، ވައިޓް ހައުސް ގައި އަޔަރލޭންޑްގެ ބޮޑުވަޒީރު މައިކަލް މާޓިން އާއެކު ބޭއްވި ބައްދަލުވުމެއް ގައި، ޣައްޒާ އިން ފަލަސްތީނުގެ ރައްޔިތުން ބޭރު ކުރުމަށް ނޭދޭ ކަމަށް ޓްރަމްޕް ވަނީ ވިދާޅުވެފަ އެވެ.

ޓްރަމްޕްގެ އެ ވިދާޅުވުމާ ގުޅިގެން މިޞްރުގެ ޚާރިޖީ ވުޒާރާ އިން ނެރުނު ބަޔާނެއްގައި ބުނެފައި ވަނީ، ޓްރަމްޕްގެ އެ ބަސްފުޅު ތަކުން ޣައްޒާގެ އިންސާނީ ޙާލަތު އިތުރަށް ގޯސްވިޔަ ނުދިނުމުގެ މުހިންމުކަން، އަދި ފަލަސްތީނުގެ މައްސަލަ އަށް ދެމެހެއްޓެނިވި، އިންސާފުވެރި ހައްލެއް ހޯދުމުގެ މުހިންމުކަން ދޭހަވާ ކަމަށެވެ.

މީގެ ކުރިން ޓްރަމްޕް ވިދާޅުވެފައި ވަނީ، ޣައްޒާ އެމެރިކާގެ ބެލުމުގެ ދަށަށް ގެންނަން ޖެހޭނެ ކަމަށާއި، އަދި ޣައްޒާގެ ރައްޔިތުން އެހެން ސަރަޙައްދު ތަކަށް ދާއިމީކޮށް ބަދަލު ކުރަން ޖެހޭނެ ކަމަށެވެ.

މިއީ މިދިޔަ މާޗު މަހު، އަރަބި ލީޑަރުން ފާސްކުރި ޣައްޒާ އާރާސްތު  53 ބިލިއަން ޑޮލަރުގެ ޕްލޭނާ އިދިކޮޅު ވިސްނުމެކެވެ.

2023 ވަނަ އަހަރުގެ އޮކްޓުބަރު މަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ހަމަލާއާ ގުޅިގެން ފެށުނު ހަނގުރާމައިގައި މިހާތަނަށް ފަލަސްޠީނުގެ އެތައް ރައްޔިތުންނެއް ވަނީ ޝަހީދުވެފަ އެވެ، މި ހަނގުރާމައިގެ ސަބަބުން ޣައްޒާގެ އިންސާނީ ޙާލަތު ވަނީ ވަރަށް ބޮޑަށް ދަށަށް ގޮސްފަ އެވެ.