ހުށަހެޅުމަށް ރަޝިޔާ އިން ދެކޮޅު ހަދާ ނަަމަ، އެމެރިކާ އިން "ވަރުގަދަ" ފިޔަވަޅުތަކެއް އަޅާނެ: ޒެލެންސްކީ
13 މާރިޗު 2025 | ބުރާސްފަތި 04:50ކީވް ގައި ނޫސްވެރިންނާ ވާހަކަ ދައްކަވަމުން ޒެލެންސްކީ ވިދާޅުވީ، މި ހުށަހެޅުން ރަޝިޔާއިން ބަލައި ނުގަންނަ ނަމަ، އެމެރިކާ އިން އިތުރު ފިޔަވަޅު ތަކެއް އަޅާނެ ކަމަށް.
ޔުކްރެއިންގެ ކީވް ގައި ބޭއްވި ނޫސްވެރިންގެ ބައްދަލުވުމެއްގައި ބައިވެރިވެވަޑައިގެން، އެ ޤައުމުގެ ރައީސް ޒެލެންސްކީ ވާހަކަ ދައްކަވަނީ
ރަޝިޔާ އާއި ޔުކްރެއިން ދެމެދު ކުރިއަށްދާ ހަނގުރާމަ ހުއްޓާލުމަށް ޔުކްރެއިން އިން ހުށަހަޅާފައިވާ 30 ދުވަހުގެ ހުށަހެޅުމަށް ރަޝިޔާ އިން ދެކޮޅު ހަދާ ނަމަ، އެމެރިކާ އިން ވަރުގަދަ ފިޔަވަޅުތަކެއް އަޅާނެ ކަމަށް، ޔުކްރެއިންގެ ރައީސް ވޮލޮޑްމިރް ޒެލެންސްކީ ވިދާޅުވެއްޖެ އެވެ.
ތިން އަހަރަށް ވުރެ ގިނަ ދުވަހުގެ ނުރައްކާތެރި ހަނގުރާމަ އަށް ވަގުތީ ހުއްޓުމެއް ގެނައުމަށް މި ހުށަހެޅުން އައިސްފައި ވަނީ ސަޢޫދީ އަރަބިއްޔާ ގައި ޔުކްރެއިން އަދި އެމެރިކާގެ އިސް އޮފިޝަލުން ކުރެއްވި ބައްދަލުވުމަށް ފަހު އެވެ.
މީގެ ކުރިން، ޔުކްރެއިން އަށް ދެމުން ދިޔަ އަސްކަރީ އެހީ އެމެރިކާގެ ރައީސް ޑޮނަލްޑް ޓްރަމްޕް މެދު ކަނޑާލި ނަމަވެސް، 30 ދުވަހުގެ ހުށަހެޅުމަށް ޔުކްރެއިން އިން އެއްބަސްވުމާ އެކު އަލުން އެހީ ދޭން ނިންމާފައިވެ އެވެ.
ޔުކްރެެއިންގެ ކީވް ގައި ނޫސްވެރިންނާ ވާހަކަ ދައްކަވަމުން ޒެލެންސްކީ ވިދާޅުވީ، މި ހުށަހެޅުން ރަޝިޔާއިން ބަލައި ނުގަންނަ ނަމަ، އެމެރިކާ އިން އިތުރު ފިޔަވަޅު ތަކެއް އަޅާނެ ކަމަށެވެ.
"އަޅުގަނޑުމެންނަށް ވަރުގަދަ ފިޔަވަޅުތަކެއް އެޅޭނެކަން އެނގޭ. އަދި ތަފްސީލުތައް ނޭނގުނަސް، ރަޝިޔާ އަށް ދެކޮޅަށް ފިޔަވަޅު އެޅުމާއި ޔުކްރެއިން ވަރުގަދަ ކުރުމުގެ ވާހަކަ ދަނީ ދެކެވެމުން،" ޒެލެންސްކީ ވިދާޅުވި އެވެ.
މި ހުށަހެޅުން އައިސްފައި ވަނީ ޔުކްރެއިންގެ ހަނގުރާމައިގެ މައިދާނުގައި ދަތި ދުވަސްވަރެއްގަ އެވެ. އިރުމަތީ އަދި ދެކުނު ސަރަހައްދު ތަކުގައި ބިންތަކަށް ގެއްލުން ދެމުން ދާއިރު، ބުދަ ދުވަހު އެ ސަރަހައްދު ގައި އަށް މީހުން މަރުވެފައިވާ ކަމަށް ވެސް އޮފިޝަލުން ބުނެފައިވެ އެވެ.
