ޓުއަރިޒަމް ޤާނޫނުގެ ބިލަކީ ކުރު މުއްދަތެއްގެ ތެރޭގައި ފައިސާކޮޅެއް ދޭނެ ކަމަށް ކޮންމެވެސް ބަޔަކު ބުނެގެން ގެންނަ އިސްލާހެއް - ނާޒިލް

ޓުއަރިޒަމާއ ބެހޭ ޤާނޫނަށް އިސްލާހު ގެނައުމުގެ ބިލަކީ ކުރު މުއްދަތެއްގެ ތެރޭގައި ފައިސާކޮޅެއް ދޭނެ ކަމަށް ކޮންމެވެސް ބަޔަކު ބުނެގެން ސަރުކާރުން ގެންނަ އިސްލާހެއް ކަމަށް ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.

ބުދަ ދުވަހުގެ ރައްޔިތުންގެ މަޖިލީުގެ ޖަލްސާގައި ސަރުކާރުގެ ފަރާތުން، ތިމަރަފުށި ދާއިރާގެ މެންބަރު އަޙްމަދު ރިޔާޟް ހުށަހަޅުއްވާފައިވާ، ޤާނޫނު ނަންބަރު 2/99 (ދިވެހިރާއްޖޭގެ ޓޫރިޒަމާބެހޭ ޤާނޫނު) އަށް އިޞްލާޙު ގެނައުމުގެ ބިލަށް ބަހުސް ކުރައްވަމުން ނާޒިލް ވިދާޅުވީ މިއީ މިދިޔަ އައް މަސްދުވަސް ތެރޭގައި ތިން ވަނަ ފަހަރަށް މި ގާނޫނަށް ގެނެވޭ އިސްލާހު ކަމަށެވެ.

Advertisement

މެންބަރު ނާޒިލް ވިދާޅުވީ ބިލުގައި އޮތީ ޑިސްކައުންޓެއް އަޅުވާފައި ކަމަށެވެ. ސަރުކާރަށް ބޭނުންވެގެން ކުރު މުއްދަތެއްގެ ތެރޭގައި ފައިސާކޮޅެއް ދޭނެ ކަމަށް ކޮންމެވެސް ބަޔަކު ބުނެގެން، އެ ފައިސާކޮޅު ހޯދޭނެ ގޮތެއް ހޯދަން ވެގެން ކުރާ ކަމެއް ކަމަށެވެ.

މިއީ ފަންސާސް ޕަސެންޓް ގެ ޑިސްކައުންޓު އަޅުވައިލައި، ރޯދަމަސް އަންނާތީ ބާއްވައި، މަގުމަތީ ބާޒާރު އުސޫލުން، ހަ މަސްދުވަހުގެ ޑިސްކައުންޓެއް އަޅުވައިލައި، ލާރިކޮޅަށް ހޯދަން ކުރާ މަސައްކަތެއް ބުނެވެނީ. ދިހައެއް މިލިއަން ޑޮލަރު ދައުލަތަށް ލިބެން އަންނަ ތަނެއްގައި ފަސް މިލިއަން ޑޮލަރަށް މަދުކުރެވެނީ. ރައްޔިތުންގެ ފައިސާ ނަހަމަ ގޮތުގައި ބޭނުންކުރެވޭ ގޮތަށް މި އަންނަނީ. ދައުލަތަށް ނޫނީ މާލިއްޔަތަށް ލިބެންހުރި އެތައް ފައިސާއެއް ބޮޑުތަނުން މަދުކުރެވިގެންދާ ކަމަށް މި އުސޫލުތަކުން އަޅުގަނޑުމެންނަށް މި ފާހަގަވެގެންދަނީ. އޭގެއިތުރަށް ވަރަށް ގިނަ ބޭފުޅުން ފާހަގަނުކުރާ ނުކުތާއެއްގެ ގޮތުގައި އަޅުގަނޑަށް މި ފާހަގަކުރެވުނީ، ޓްރަސްޓް ފަންޑުގެ ވާހަކަ. ޓްރަސްޓް ފަންޑަކީ މީގައި މި ބިލުގައި މި ބުނާ ގޮތުން ވެއްޖެއްޔާ ދައުލަތަށް ވަންނަންޖެހޭ ފައިސާތަކެއް ސަރުކާރަށް ވަންނާނީ.

ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް

ނާޒިލް ވިދާޅުވީ ދައުލަތަށް ފައިސާއަށް ވަދެއްޖިއްޔާ އެ ފައިސާ ބޭނުންކުރެވޭނީ ބަޖެޓުގައި ޖެހިގެން މަޖިލީހަށް ފޮނުވައިގެން މަޖިލީހުން ފާސްކޮށްގެން ކަމަށެވެ. އަދި އެނޫން ގޮތަކަށް ދައުލަތުގެ ބަޖެޓު ސަރުކާރަކަށް ބޭނުންކުރެވޭކަށް ނޯންނާނެ ކަމަށާއި، އެހެންނަމަވެސް، ފަންޑަށް ވަންނަ ފައިސާ ވެއްޖެއްޔާ ބަޖެޓަށް އެޕްރޫވަލްއަކާ ނުލައި ސަރުކާރަށް އެ ފައިސާ ބޭނުންކުރެވޭނެ ކަމަށެވެ.

އަދި އެ ބޭނުންކުރެވޭނެ މަގުން އެކަން ކުރަން، ފައިސާއަށް ފަސޭހައިން އެކްސެސްވެވޭނެ ގޮތަށް އުސޫލު ބަދަލުކުރެވިފައި ކަމަށް ނާޒިލް ވިދާޅުވިއެވެ. އަދި ސަރުކާރުން ކުރާ ކޮންމެ ކަމެއް ވެސް ފާހަގަކުރެވެނީ، ފައިސާކޮޅާއި ނޫނިއްޔާ ދައުލަތަށް ލިބޭ ރައްޔިތުންގެ ޚަޒާނާއަށް ވަންނަ ފައިސާ ހުސްކުރަން މަސައްކަތްކުރާތަން ކަމަށެވެ.

މިއީ ބިރުވެރިކަމޭ ޙަޤީޤަތުގައި. އަވައްޓެރި ޤައުމަކަށް ވެގެންދިޔަ ގޮތް އަޅުގަނޑުމެންނަށް ފެނޭ. އެ ޤައުމުގައި ވެސް އޭރު އޮތް ސަރުކާރަށް ނެތް ބާރެއް ނެތް. ހުރިހާ ބާރެއް ބޭނުންކޮށްގެން ކުރަމުންދިޔަ ކަންތައްތަކުގެ ނަތީޖާ ވެގެންދިޔައީ، ރައްޔިތުން މިކަމެއް ނިކަމެތިވެ ދިޔައީ އެމް.އެމް.އޭ އިން ފަނަރަ ބިލިއަން ރުފިޔާ ޗާޕުކުރަން ހުށަހެޅުނީމާ އެތާނގައި ތިބި އެކަން ރަނގަޅަށް ސާފުކޮށް އެނގޭ މެންބަރުން އެކަމާ ދެކޮޅުހެދީމަ އެ ބޭފުޅުން ވަކިކުރަން މި އިއްޒަތްތެރި މަޖިލީހަށް ފޮނުވާފަ. މި އިއްޒަތްތެރި މަޖިލީހުން ނިންމާފައި އެބޭފުޅުން ވަކިކޮށްލީމަ، އެއީ ޤައުމަށް ލިބޭ ކުރިއެރުންތޯ، ނޫނިއްޔާ ދިވެހި ރައްޔިތުންނަށް ލިބޭ ދެރައެއްތޯ ރައްޔިތުން އެބަ ވަރަށް ސާފުކޮށް ވިސްނައި ފިކުރުކުރަން އެބަޖެހޭ. އަޅުގަނޑު މިގޮތަށް މިދެންނެވީ، ނިމިދިޔަ ހާރުގައި ވެސް ބަޖެޓު ކޮމިޓީއަށް ހާޒިރުވެ، ބަޖެޓު ކޮމިޓީއަށް އައިސް، މި މަޖިލީހުގެ ބަޖެޓު ކޮމިޓީއަށް އެ މަޢުލޫމާތު ރާއްޖޭގެ އިޤްތިޞާދީ ކުރިއަށްތޯ، ފަހަތަށްތޯ، ކިހިނެއްތޯ، ހެދީމަތޯ ރަނގަޅަށް ދާނީ، އެ މަޢުލޫމާތު ދެއްވި ބޭފުޅުންގެ ވާހަކަ އަޅުގަނޑު މި ދަންނަވަނީ.

ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް

ނާޒިލް ވިދާޅުވީ އެމްއެމްއޭއިން ފައިސާ ޗާޕްކުރަން ވޯޓުނުދެއްވީތީ، ނޫނީ ސަރުކާރުން ބޭނުންވާ ކަންތައްތަކާއި ދެކޮޅަށް އެއްޗެކޭ ބުނީތީ، އެ ބޭފުޅުން ވަކިކޮށްލާފައި، ބޭރުކޮށްލާ ވާހަކަ ދައްކާ ކަމަށެވެ. އަދި ސަރުކާރުގައި ނޫނިއްޔާ ރައްޔިތުންގެ ތެރޭގައި ތިބި، މިކަހަލަ މުހިންމު މީހުންތައް، މުހިންމު ބަސް ބުނެވެން ތިބި ފަރާތްތައް މިއަދު ދާންޖެހިފައިވާ ކަމަށެވެ. އަދި ސަރުކާރުން ކަންތައް ކުރާ ގޮތާ ދޭތެރޭ ވަރަށް ބޮޑަށް ވިސްނައި ފިކުރުކުރަންޖެހޭ ކަމަށާއި، ސަރުކާރުން އެގޮތަށް ޢަމަލުކުރުމުން، މީގެ ދެރަ ނަތީޖާ ލިބެނީ ހުރިހާ ރައްޔިތުންނަށް ކަމަށް ނާޒިލް ވިދާޅުވިއެވެ.