ސިފައިން އާއި ހުޅުމާލެ އެއްވަރު

މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި، ގުރޫޕު އޭގައި ދިވެހި ސިފައިންގެ ކުލަބާއި، ހުޅުމާލެ ވެޓަރަންސް ކުލަބު ބައްދަލު ކުރި މެޗު އެއްވަރުވެއްޖެ އެވެ.

މުބާރާތުގައި ހުޅުމާލޭގެ ފުރަތަމަ މެޗުގައި އެ ޓީމު ވަނީ ވިލިމާލޭ ވެޓަރަންސް އަތުން ބަލިވެފަ އެވެ. ސިފައިންގެ ފުރަތަމަ މެޗުގައި އެ ޓީމުން ވަނީ ޒެލޮޓްގެ މައްޗަށް ކުރި ހޯދައިފަ އެވެ.

އާދީއްތަ ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ހުޅުމާލެ އިންނެވެ. ނަމަވެސް ސިފައިން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ 10 ވަނަ މިނެޓުގައި ހުޅުމާލެ އިން ލީޑު ނެގީ ޙުސެއިން ސިމާޒް ޖެހި ލަނޑުންނެވެ. އޭގެ ފަހުން މެޗުގައި ލަނޑު ޖަހައި ނަތީޖާ ހަމަހަމަ ކުރުމަށް ސިފައިންގެ ކުލަބުން ކުރި މަސައްކަތް ކާމިޔާބުވީ މެޗުގެ 45 ވަނަ މިނެޓުގަ އެވެ. އެ ޓީމަށް ނަތީޖާ ހަމަހަމަ ކޮށްދިނީ އަޙުމަދު ފަޒާލް އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.