ފުލުހުން މުޒާހަރާގެ އަންހެން ބައިވެރިންނަށް އަނިޔާކޮށްފި
ކުއްލިއަކަށް ޕެޕަރ ސްޕްރޭ ޖެހުމުން އޭގެ އަސަރު އެންމެ ބޮޑަށް ކުރީ އަންހެނުންނަށް
އެމްޑީޕީ ކުއްލި އެއްވުން - ފުލުހުން މުޒާހަރާގެ އަންހެން ބައިވެރިންނަށް އަނިޔާކޮށްފައިވާތީ އެކަމުގެ ކަންބޮޑުވުން އާއްމުން ދަނީ ފާޅުކުރަމުން
އިދިކޮޅު އެންމެ ބޮޑު ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހޮނިހިރު ދުވަހުގެ ރޭ ކުރިއަށް ގެންދިޔަ އިހުތިޖާޖުގައި ފުލުހުން ބާރުގެ ބޭނުން ކުރުމުގެ ސަބަބުން މުޒާހަރާގައި ބައިވެރިވި ބައެއް އަންހެނުންނަށް އަނިޔާވެއްޖެއެވެ.
ފުލުހުން ވަނީ އިހުތިޖާޖު ކުރިޔަ ނުދިނުމަށް އެމްޑީޕީ ހަރުގެ ސަރަހައްދު ދެ ފަރާތުން ބެރިކޭޑް ޖަހާ ބަންދުކޮށްފައެވެ. އަދި އާއްމުން ފަހަތަށް ކޮއްޕާ، އާއްމުންގެ ސަފުތައް ފަހަތަށް ޖެއްސުމަށް މަސައްކަތް ކުރި އިރު ހަރުކަށިކަން އިސްކުރުމުގެ ސަބަބުން ބައެއް އަންހެނުންނަށް ވަނީ އަނިޔާވެފައެވެ.
އެގޮތުން މުޒާހަަރާގެ ބައިވެރިން މަޖީދީ މަގަށް ދިއުމަަށް ހިނގައިގަތުމުން ފުލުހުން ވަނީ ކުއްލި ގޮތަކަށް ބާރުގެ ބޭނުންކޮަށް ޕެޕަރ ސްޕްރޭ ޖަހާފައެވެ. ޕެޕަރސްޕްރޭ ޖެހުމުގެ ކުރިން އާއްމުން ހުއްޓިލައިގެން ސުލްހަވެރިކަމާއި އެކު އަޑު އުފުލަމުން ދިޔަ އިރު، ކުރީ ސަފުގައި ގިނަ އަންހެނުން ތިއްބެވެ.
އެހެންކަމުން ކުއްލިއަކަށް ޕެޕަރ ސްޕްރޭ ޖެހުމުން އޭގެ އަސަރު އެންމެ ބޮޑަށް ކުރީ އަންހެނުންނަށެވެ. އެގޮތުން އެތަނުގައި ތިބި ހަރު އުމުރު ފުރާގެ ދެ އަންހެނަކަށް ޕެޕަރ ސްޕްރޭގެ އަސަރުކޮށް ނޭވާލާން ވަރަށް ބޮަޑަށް އުނދަނގޫވިކަން ފާހަގަކޮށްލެވެއެވެ. އަދި ފުލުހުން ބާރުގެ ބޭނުން ކުރުމުގެ ސަބަބުން ބައެއް މީހުން ބިން މައްޗަަށް ވެއްޓި ހާނިއްކަ ވި މަންޒަރު އެތަނުގައި ތިބި ރާއްޖެޓީވީގެ ނޫސްވެރިންނަަށް ވަނީ ފެނިފައެވެ.
މީގެ އިތުރުން، ބާރުގެ ބޭނުންކޮށް ކޮައްޕުމުގެ ސަބަބުން މުޒާހަރާގަ ބައެއް އަންހެން ބައިވެރިންނަަަށް އެކިވަރުގެ އަނިޔާތައް ވަނީ ވެފައެވެ. އަދި މުޒާހަރާގަ ބައިވެރިވި ރާއްޖެޓީވީގެ އަންހެން ނޫސްވެރިޔާ އަށް ވެސް ޕެޕަރ ސްޕްރޭގެ އަސަރުކޮށްފައިވެއެވެ. އަދި ފިރިހެން ފުލުހުން މެދުވެރިކޮަށް މީޑިއާ ފަހަތަަށް ޖެއްސުމުގެ ތެރޭގައި އޭނާގެ ކަނާއަތު ތަނބިކަށްޓަށް އަނިޔާވެފައިވެއެވެ.
ހަމައެހެންމެ މުޒާހަރާ ކޮންޓްރޯލް ކުރުމަށް އަންހެން ފުލުހުން ތިބި ނަމަވެސް ފިރިހެން ފުލުހުން މެދުވެރިކޮށް އަންހެނުން ފަހަތަށް ޖައްސަން މަސައްކަތް ކުރުމުން އެކަމާއި މެދު އާއްމުން ވަނީ ނުރުހުން ފާޅުކޮށްފައެވެ.
ބައެއް މީހުން ފާހަގަކުރި ގޮތުގައި، ބައިނަލްއަގްވާމީ އަންހެނުންގެ ދުވަހާ ދިމާކޮށް ފުލުހުން އަންހެނުންނާ މެދު މިފަދަ ޢަމަލުތައް ހިންގުމަކީ ވަރަށް ނާތަހުޒީބު ދަށު ދަރަޖައިގެ ކަމެކެވެ. މިކަމަކީ އަންހެނުންގެ ޙައްޤުތަކަށް އިޙްތިރާމްކުރާ މުޖުތަމަޢުއެއްގައި ބަލައިގަނެވޭނެ ކަމެއް ނޫންކަމަށް މުޒާހަރާގެ ބައިވެރިން ފާހަގަކުރިއެވެ.
