ބާސެލޯނާގެ ފަސްޓް ޓީމްގެ ޑޮކްޓަރު ކާލްސް މިނާރޯ ގާސިއާ މަރުވުމާ ގުޅިގެން، ހޮނިހިރު ދުވަހުގެ ރޭ އޮސަސޫނާއާ ދެކޮޅަށް ކުޅެން ހަމަޖެހިފައި އޮތް ސްޕެނިޝް ލީގުގެ މެޗު ފަސްކޮށްފި އެވެ.

ހޮނިހިރު ދުވަހުގެ ރޭ ކުޅެން އޮތް މެޗު ފަށަން 20 މިނެޓް ކުރިން މެޗު ފަސް ކުރަން ނިންމާފައިވާކަން ވަނީ އިއުލާން ކޮށްފަ އެވެ. އެވަގުތު ބާސެލޯނާގެ އޮލިމްޕިކް ސްޓޭޑިއަމަށް ގިނަ އަދަދެއްގެ ސަޕޯޓަރުން ވަދެ ތިއްބެވެ.

އެކަމާ ގުޅިގެން ބާސެލޯނާ އިން ނެރުނު ބަޔާނެއްގައި ބުނެފައި ވަނީ، އެ ޓީމުގެ ޑޮކްޓަރު ކާލްސް މިނާރޯ ގާސިއާ މަވެފައިވާކަން ހިތާމައާ އެކު އިއުލާން ކުރާ ކަމަށެވެ.

ބާސެލޯނާގެ ރައީސް ޖޯން ލަޕޯޓާ ވިދާޅުވީ މިނާރޯ ގާސިއާއަކީ އެންމެންގެ ލޯބި ލިބިފައިވާ، މެޗުތަކުގައި ކުޅުންތެރިންނާއި ކޯޗިން ސްޓާފުންގެ އަޅާލުމުގައި އަބަދުވެސް އުޅުއްވި ފަރާތެއް ކަމަށެވެ. އޭނާގެ ކުއްލި ވަކިވުމާ އެކު ޓީމުގެ ހުރިހާ ފަރާތްތަކަށް ވެސް ވަރަށް ބޮޑަށް އަސަރު ކޮށްފައިވާ ކަމަށް ލަޕޯޓާ ވިދާޅުވި އެވެ.

އޮސަސޫނާ އިން ވެސް މިނާރޯ ގާސިއާގެ އާއިލާއަށާއި ބާސެލޯނާގެ އެންމެހާ މުވައްޒަފުންނަށް ތައުޒިޔާ ރައްދުކޮށް، މި ދަތި ވަގުތުގައި އެމީހުންނާއެކު ތިބިކަން ވަނީ ހާމަކޮށްފަ އެވެ. މެޗު އަލުން ބޭއްވޭނެ ތާރީޚެއް އަދި އިއުލާނު ކޮށްފައެއް ނުވެ އެވެ.